Akif Nağı: “Açıq mətnlə verilən son bəyanatı konkret xəbərdarlıq kimi qəbul etməlidirlər”
Prezident İlham Əliyev Lökbatan qəsəbəsindəki çıxışında Ermənistana münaqişənin hansı yolla həllinin mümkünlüyü ilə bağlı yenidən açıq mesaj verib.
Ölkə başçısı deyib ki, Azərbaycan sülhün yaranmasını hamıdan çox istəyir: “...Eyni zamanda, Ermənistandan sülhə yönəlmiş çağırışlar da edilir, biz də bu çağırışları eşidirik. Əlbəttə, biz də sülh istəyirik, amma biz torpaqlarımızı istəyirik. Torpaqlarımız qayıtmayana qədər sülh olmayacaq və Ermənistanın yeni rəhbərliyi bunu çox yaxşı başa düşməlidir. Sülh istəyirlərsə, erməni əsgəri torpaqlarımızdan çıxmalıdır. Erməni əsgərinin Azərbaycan torpağında nə işi var?! Müharibədən əziyyət çəkmiş, həlak olmuş, əlil olmuş Azərbaycan vətəndaşları öz torpağında həlak olublar, əlil olublar, Ermənistan torpağında yox. Ona görə münaqişənin həllinin bir yolu var – işğalçı qüvvələr bizim torpaqlarımızdan dərhal və qeyd-şərtsiz çıxarılmalıdır. Onda bölgədə sülh yaranar. Onda Ermənistan ilə Azərbaycan arasında əlaqələr yarana bilər. Onda regionun geosiyasi vəziyyəti tamamilə dəyişə bilər və dayanıqlı sülh yarana bilər”.
Göründüyü kimi, Prezident İlham Əliyev Dağlıq Qarabağda sülhün bərpası üçün konkret mexanizm təklif edib. Birmənalı şəkildə bildirilib ki, sülhə gedən yol Ermənistanın işğaldan əl çəkməsindən keçir. İlham Əliyevin bu bəyanatı ATƏT-in Minsk Qrupu həmsədrləri üçün hansı yeni fəaliyyət istiqamətləri aça bilər və açmalıdır?
Qarabağ Azadlıq Təşkilatının sədri Akif Nağı qəzetimizə bildirdi ki, İlham Əliyevin məlum çıxışı Azərbaycanın Dağlıq Qarabağla bağlı tutduğu konkret mövqedən qaynaqlanır: “Bilirsiniz ki, bu mövzu ilə bağlı Azərbaycanın mövqeyi konkret və dəyişməz olaraq qalır. Ölkəmiz ən müxtəlif səviyyələrdə problemin həlli ilə bağlı mexanizmlər təklif edib. Bunun adına müxtəlif adlar da verirlər. Məsələn, “mərhələli həll” planının elementlərindən biri də məhz erməni silahlı birləşmələrinin işğal altındakı rayonlardan çıxarılmasıdır. Çox təəssüflər olsun ki, Ermənistanın yeni rəhbərliyi də bu istiqamətdə konkret addımlar atmır. Hətta mən deyərdim ki, əvvəlkilərdən daha çox problemin uzadılmasına çalışır. Paşinyan və həyat yoldaşı ölkələri gəzərək sülh tərəfdarı olduqlarını bəyan edirlər. Onlar hətta belə bir tezis də dövriyyəyə buraxdılar ki, əgər Azərbaycan müharibəni başlayarsa, bu, insan haqlarına, demokratiyaya yönəlik müharibə olacaq. Digər tərəfdən isə Rusiyaya yalvarırlar ki, Azərbaycana müharibəyə başlamağa imkan verməsin. Əslində, bu, Prezident tərəfindən həmsədrlərə verilən konkret xəbərdarlıqdır. Ölkə başçısı artıq örtülü terminlərlə deyil, açıq mətnlə deyir ki, torpaqlar azad edilməsə, sülhdən danışmaq yersizdir. Mənə elə gəlir ki, həmsədr ölkələr bu bəyanatdan nəticə çıxarıb Ermənistana pressinqi artırmalıdırlar. Açıq mətnlə verilən son bəyanatı konkret xəbərdarlıq kimi qəbul etməlidirlər. Bilməlidirlər ki, artıq Azərbaycanın səbr kasası dolub. Ortada nəticə olmasa, biz torpaqlarımızı silah gücü ilə azad edəcəyik. Ermənilər istəyirlər ki, heç nə dəyişmədən sülh əldə olunsun və Azərbaycan Dağlıq Qarabağda yaranan mövcud reallıqla hesablaşsın. Maraqlı paradoks yaranıb. Ermənilər həm müharibə istəmir, həm də torpaqları qaytarmağı üzərlərinə götürmürlər. Hesab edirəm ki, həmsədrlər bu yöndə aktivliyi artırmasalar, Azərbaycanın müharibədən başqa yolu qalmır. Mən bunu ölkə başçımızın səsləndirdiyi xəbərdarlıq kimi dəyərləndirirəm”.
Məhəmmədəli QƏRİBLİ
