Yeganə Hacıyeva: “Daha öncələr bu kampaniyaların sadə insanlar, siyasi aktivistlər tərəfindən aparılması müşayiət olunurdusa...”
Bir neçə gündür sosial şəbəkələrin erməni seqmentində Rusiyanın 102-ci hərbi bazasını Ermənistandan çıxarmaq çağırışının yer aldığı “Facebook” səhifəsi sürətlə tirajlanır. Həmin çağırışda hərbi bazanın Ermənistanın maraqlarına cavab vermədiyi və ölkə ərazisindən çıxarılmalı olduğu göstərilir.
Həmin səhifədə bir il əvvəl 102-ci hərbi bazanın sifarişi ilə Azərbaycan və Türkiyədəki vəziyyətlə bağlı araşdırmalar aparmış ekspertlərin fəaliyyəti “dövlətə qarşı yönəlmiş pis hərəkət” adlandırılır.
Səhifənin və orada yazılanların tirajlanması ilə “Soros” fondunun çoxdankı əməkdaşı, bu günlərdə Ermənistan hökumətində işə keçən və seçki məcəlləsində islahatları koordinasiya edən Daniel İnonisyan məşğuldur.
Habelə baş nazirin birinci müavini Ararat Mirzoyanın keçmiş sözçüsü, bu yaxınlarda 2016-cı ilin aprel döyüşlərində ölən erməni əsgərləri barədə “yersiz ifadələr” işlətdiyi üçün işdən azad edilən Karpis Paşoyan 102-ci bazaya qarşı kampaniyanın fəallarındandır. Həmin Ararat Mirzoyanın özünü də Rusiyada “Amerikanın adamı” kimi tanıyırlar.
Bu günlərdə müdafiə naziri David Tonoyan Ermənistan sərhədlərinin Rusiya hərbçiləri tərəfindən qorunması məsələsinə yenidən baxıla biləcəyini deyib. Habelə 102-ci bazaya dair müqavilənin şərtlərinə yenidən baxılmasının mümkünlüyü haqda danışıb.
Ermənistanın yeni hökuməti Rusiya ilə müttəfiqlik münasibətlərinə sadiq olduğunu və 102-ci bazanın ölkə ərazisində dislokasiyasının vacibliyini desə də, daxili informasiya məkanında rəhbər şəxslər tərəfindən ciddi anti-Rusiya kampaniyası başladılıb və tədricən geniş miqyas alır.
Sosial şəbəkələrin Ermənistan seqmentində Rusiya əleyhinə başlanmış kampaniyanın arxasında hansı qüvvələr durur?
Politoloq Yeganə Hacıyeva qəzetimizə açıqlamasında bildirdi ki, Rusiya Cənubi Qafqazda Ermənistanın dövlət kimi mövcudluğunun səbəbi, hərbi-siyasi müttəfiqi və təhlükəsizliyi qarantıdır: “Ölkənin İran və Türkiyə ilə sərhədlərinin qorunmasını Rusiya Federal Təhlükəsizlik Xidmətinin sərhəd qüvvələri həyata keçirir. Cənubi Qafqazda rus qoşunları qrupunun qərargahı da daxil omaqla, Rusiyanın Ermənistanda quru qoşunları və hərbi hava qüvvələri texnikası ilə təchiz edilmiş bazası və paytaxt İrəvan da daxil olmaqla, ölkənin 20 bölgəsində hərbi mükəlləfiyyəti mövcuddur.
Rusiyanın Ermənistandakı hərbi bazası iki istiqamət üzrə, iki dövlət arasında hərbi əməkdaşlıq sazişi və MDB ölkələrinin hərbi əməkdaşlıq konsepsiyası əsasında kollektiv müdafiə sazişi əsasında fəaliyyət göstərir. Hər iki saziş Ermənistan konstitusiyası tərəfindən tənzimlənir və parlament səviyyəsində ratifikasiya olunub. Son 4 ildə Ermənistan siyasi rəhbərliyi, siyasi qruplar və əhali arasında anti-Rusiya əhval-ruhiyyəsinin get-gedə artmasının şahidi oluruq. Bu etirazlar Ermənistan parlamentində anti-Rusiya qanun layihəsi müzakirə olunması ilə, küçələrdə anti-Rusiya etiraz aksiyaları keçirilməsi ilə, Ermənistan parlament deputatlarının bu hərbi bazalarla tanış olmaq adı altında yoxlamalar təşkil etmək kimi təxribatçı addımları ilə müşayiət olunurdu. Bütün bunlar Ermənistanın daxilində anti-Rusiya ritorikasına start verdi və daha sonralar isə bu əhval-ruhiyyə sosial şəbəkələrə daşındı”.
Yeganə Hacıyevanın sözlərinə görə, son zamanlar diqqətçəkən məqamlardan biri kimi sosial şəbəkələrin Ermənistana aid olan seqmentində Rusiya əleyinə ciddi kampaniyaya start verilməsidir: “Daha öncələr bu kampaniyaların sadə insanlar, siyasi aktivistlər tərəfindən aparılması müşayiət olunurdusa, son zamanlar bu aksiyaların sosial medialarda vüsət almış hibrid üsullarla aparılması diqqəti çəkir.
Bu aktiv anti-Rusiya kampaniyasının arxasında hansı qüvvələr dura bilər sualına gəlsək, öncə onu qeyd etməliyəm ki, Cənubi Qafqazda Ermənistan dövlətinin qurulmasından başlayaraq, bu günə qədər onun rəhbərliyinin Rusiyadan kənar qüvvələrə bağlı ola biləcəyi fikrini qəbul etmirəm.
Xüsusilə də ABŞ kimi süper güc ölkəsində prezident seçkiləri və Konqresə aralıq seçkilərinə təsir etməyə çalışan , Avropada BREXİT, Katoloniya presedentləri ilə AB-nin bütövlüyünü şübhə altına sala bilən, beynəlxalq hesabatlara görə, hibrid üsullarla Avropadakı yüz illərlə oturuşmuş demokratik təsisatları yerindən oynada bilən Rusiyanın indiki həssas bir məqamda hərbi bazaları yerləşən Ermənistanda seçkini kiməsə güzəştə gedə biləcəyi ehtimalı inandırıcı deyil .
Xüsusi diqqətçəkən məqam bu kampaniyaların baş nazir Nikol Paşınyanın Rusiya səfərindən sonra start almasıdır. Bu yerdə qeyd etmək yerinə düşər ki, məhz bu səfərdən sonra Ermənistan siyasətində Rusiyaya bağlı nüfuzlu şəxs olan, keçmiş səhra komandiri, hərbi cinayətkar eks-prezident Köçəryan həbs edildi. Bu həbsin irəlidəki parlament seçkiləri öncəsi baş verməsi onu göstərir ki, Ermənistan siyasi hakimiyyəti daxili hesablaşmalarda Rusiya kartını istifadə edir və bu üsullarla da rəqibləri bloklayır”.
Məhəmmədəli QƏRİBLİ
