Elşən Mustafayev: “Bu o anlama gəlir ki, Rusiya ilə Ermənistan arasındakı soyuq müharibə daha qaynar fazaya daxil olur”
Rusiyanın xarici işlər naziri Sergey Lavrov Paşinyan hakimiyyətinin son günlər ərzində ölkədə nüfuzlu şəxsləri həbs etməsini tənqid edib.
Lavrov bildirib ki, Ermənistanda baş verən hadisələr ölkənin yeni rəhbərliyinin sələflərini təqib edilməyəcəyinə dair vədlərinə ziddir: “İrəvanın müttəfiqi olan Rusiya erməni dövlətinin stabilliyində həmişə maraqlı olub və bu baxımdan orada baş verənlər bizi narahat etməyə bilməz. Bu həm də Ermənistanın Müstəqil Dövlətlər Birliyi (MDB) məkanında təmsil olunduğu təşkilatların normal işinin təminatı nöqteyi-nəzərdən çox vacibdir. Son günlər ərzində biz narahatlığımızı bir neçə dəfə Ermənistan rəhbərliyinə bildirmişik. Vəziyyətin konstruktiv məcrada inkişaf edəcəyinə ümid edirik”.
Qeyd edək ki, İrəvan şəhər məhkəməsi sabiq prezident Robert Koçaryan barəsində iki ay müddətinə həbs qərarı çıxarıb. İyulun 26-da R.Köçəryan Xüsusi İstintaq Komitəsinə ifadə verməyə çağırılıb. Müstəntiqlər ona “qabaqcadan bir qrup şəxslə əlbir olaraq Konstitusiya quruluşunu devirmək” barədə rəsmi ittiham elan ediblər. Sabiq prezident 2008-ci il prezident seçkilərindən sonra İrəvanda keçirilən etiraz aksiyasının zorakılıqla dağıdılmasına əmr verməkdə ittiham olunur. Həmin hadisələr nəticəsində 10 nəfər ölüb.
Bundan əvvəl Ermənistanın keçmiş müdafiə naziri Mikael Arutyunyan qeyd olunan cinayət işi çərçivəsində konstitusion quruluşun devrilməsi ittihamı ilə təqsirləndirilən şəxs qismində istintaqa cəlb edilərək barəsində axtarış elan edilib. Ermənistan Xüsusi İstintaq Xidməti Silahlı Qüvvələrin keçmiş Baş Qərargah rəisi, KTMT-nin baş katibi Yuri Xaçaturovu da 2008-ci il 1 mart aksiyalarının dağıdılması ilə bağlı cinayət məsuliyyətinə cəlb edib. Məhkəmə onun maddi təzminat qarşılığında zaminə buraxılması barədə qərar verib.
Lavrovun Ermənistandakı həbslərdən belə ciddi narahatlıq keçirməsi nə ilə əlaqəli ola bilər?
Ekspert Elşən Mustafayevin sözlərinə görə, Lavrovun bu açıqlaması gözlənilən idi: “Burada bir sıra ciddi məqamlar üzə çıxır. Paşinyan hakimiyyətə gələndə belə versiyalar səslənirdi ki, o, sırf Qərbin adamıdır. Onun hakimiyyətə Qərbin dəstəyi ilə gəlməsi də dəqiqdir. Ancaq belə bir hadisənin Rusiyanın for-postu sayılan bir ölkədə baş verməsi maraqlı idi. Rusiya Paşinyanın ilikin davranışlarına fikir verməyə başladı. O bildirdi ki, Rusiya ilə müttəfiqlik münasibətlərini saxlamaqda maraqlıdır və bu siyasət davamlı olaraq yürüdüləcək. Ancaq Moskva bu gedişləri Paşinyanın əməllərində deyil, yalnız sözlərində görməli oldu. Sonra Rusiyanın Ermənistanda dislokasiya olunan hərbi bazaları ilə bağlı qalmaqal yaşandı. Nəticədə Paşinyan hakimiyyəti Ermənistanda olan sərhəd qoşunlarının statusuna yenidən baxmaq kimi məsələni gündəmə gətirdi. Hesab edirəm ki, bütün bu hadisələr Rusiya ilə Ermənistan arasında gedən psixoloji müharibənin tərkib elementləri idi. Bu müddət ərzində Rusiya nisbətən susqun mövqe sərgiləməklə Paşinyanın konkret olaraq hansı tərəfə meylli olduğunu onun əməllərinə baxmaqla müəyyən etmək istəyib. Ölkədə baş verən həbs dalğası isə göstərdi ki, Paşinyan ölkədaxili problemlərin çözülməsi adı ilə Rusiyanın Ermənistanda mövcud olan dayaqlarını dağıdır. Həbs edilən yüksək rütbəli hərbçilər və eks-prezident Köçəryanın Rusiyanın adamı olmasına kiminsə şübhəsi ola bilməz. Onlar həbsə layiq olan adamlardı və buna şübhə ola bilməz. Ancaq məsələnin Rusiya ilə bağlı olan tərəfi maraqlıdır. Həbs edilən şəxslər Dağlıq Qarabağdakı hadisələrdə “parlayıblar”. Onlar məhz Rusiyanın dəstəyilə cəbhədə uğurlar əldə ediblər. Bir sözlə, həmin adamlar Rusiyanın 5-ci kalonuna aid edilirdi. Paşinyan hətta KTMT-nin baş katibini həbs etməklə Rusiyaya qarşı açıq savaş açdığını ortaya qoydu. Lavrovun müsahibəsində maraqlı detal var. O deyir ki, Paşinyan hakimiyyəti siyasi rəqiblərini həbs etməyəcəyinə dair söz veribmiş. Deməli, Rusiya rəhbərliyi ilə Paşinyan arasında bu mövzuda danışıqlar olub və Moskva öz narazılığını ona çatdırıb. Lavrovun hazırda açıq mətnlə Paşinyanın əməllərindən mətbuata narazılıq etməsi çox ciddi mətləblərdən xəbər verir. Bu o anlama gəlir ki, Rusiya ilə Ermənistan arasındakı soyuq müharibə daha qaynar fazaya daxil olur”.
Məhəmmədəli QƏRİBLİ
