Paşinyanın “Xaçaturov işi” KTMT-nin dünya nüfuzunu ləkələyən məqsədli plan kimi...
Elşən Həsənov: “Ermənistan rəhbərliyi həqiqətən bu problemi həll etmək istəsəydi, cinayət işi açmazdan əvvəl bunu Rusiya ilə müzakirə edərdi”
“Xüsusilə də Paşinyanın bu addımı NATO sammitində iştirakdan sonra atması onun hansı hərbi bloka simpatiya bəslədiyini aydın büruzə verir”
Ermənistan Kollektiv Təhlükəsizlik Müqaviləsi Təşkilatına (KTMT) qurumun baş katibinin dəyişdirilməsi prosesinə başlamağı təklif edib. Bu barədə şənbə günü Ermənistan XİN-in mətbuat katibi Tiqran Balayan bildirib.
Daha öncə Ermənistanın Xüsusi İstintaq Xidməti KTMT-nin baş katibi Yuri Xaçaturova qarşı 1 mart 2008-ci il tarixdə etiraz aksiyalarının dağıdılması işi çərçivəsində konstitusiya quruluşunu devirməyə cəhd ittihamı irəli sürüb. Ermənistanın bəzi informasiya resurslarının iddiasına görə, Xaçaturova elan olunan ittihamlar sırasında mənimsəmə də var. Ötən həftə İrəvan məhkəməsi onu girov müqabilində azad edib. Tiqran Balayan bildirib ki, bu, sırf hüquqi məsələdir: “Ermənistanda istintaqı aparılan cinayət işinə ölkə vətəndaşı cəlb edilib. Onun KTMT-nin baş katibi olduğunu nəzərə alaraq, bu qurumda tərəfdaş dövlətlərə KTMT-nin baş katibinin dəyişilməsi prosesinə başlamaq təklif edilib”.
Göründüyü kimi, Ermənistanın yeni hakimiyyəti, əslində. bu addımı ilə bir vaxtlar özünə arxa-dayaq saydığı böyük bir qurumu fakitiki olaraq rüsvay edir. Hər halda, NATO ilə rəqabətə iddialı olan bir qurumun reputasiyasını qorumaq üçün məsələnin üstündən bir qədər yumşaq formada da keçmək olardı. Ancaq Ermənistanın yeni hakimiyyəti bu mövzuda sanki əlinə şans düşmüş kimi davranaraq, sübut etdi ki, KTMT-nin özünə rəhbər postuna layiq bildiyi şəxsin heç də təmiz reputasiyası yoxdur. Paşinyan hakimiyyətinin KTMT-nın erməni əsilli baş katibi ilə bağlı verdiyi qərarı qurumun nüfuzuna məqsədli şəkildə vurulan ziyan kimi dəyərləndirmək olarmı?
Təhlükəsizlik məsələləri üzrə ekspert Elşən Həsənovun sözlərinə görə, Xaçaturovla bağlı yaşananlar Ermənistanın sabiq prezidenti Köçəryanın həbsi fonunda baş verir: “Onların statusları arasında oxşar və fərqli cəhətlər çoxdur. Oxşarlıq ondan ibarətdir ki, hər ikisi Rusiyanın adamıdır. Fəqr isə budur ki, biri rəsmi vəzifə daşıyır, digəri isə yox. Bununla bir daha sübut olunur ki, Paşinyan Rusiyanın Ermənistandakı bütün dayaqlarını məhv etmək yolunu tutub. Fikir verdinizsə, Xaçaturov əvvəl həbs edildi, sonra isə onu girov müqabilində azadlığa buraxdılar. Hadisəni də belə şərh etdilər ki, bu, Ermənistanın daxili işidir və ölkəyə aid olunan məsələ ilə bağlı onu məsuliyyətə cəlb ediblər. Rusiya isə bununla razılaşmır. Onlar hesab edirlər ki, bu məsələdə Paşinyanın başlıca hədəfi Xacaturov yox, KTMT olub. Əgər Xaçaturovun müəyyən statusu olmasaydı, bu məsələ Ermənistanın daxili işi olardı. Ermənistan rəhbərliyi həqiqətən bu problemi həll etmək istəsəydi, cinayət işi açmazdan əvvəl bunu Rusiya ilə müzakirə edərdi. İndi isə belə çıxır ki, KTMT baş katibinə qarşı cinayət işini Ermənistan Rusiya ilə məsləhətləşmədən edə bilər. Bu addım Rusiyaya qarşı açıq savaş açmaq deməkdir. Maraqlıdır ki, onlar bu addımı KTMT-nin digər üzvü olan Qazaxıstanın Dağlıq Qarabağ məsələsində Azərbaycanı dəstəklədiyi bir vaxtda atırlar.
Yadınızdadırsa, Xaçaturovun KTMT-yə baş katib təyin edilməsi məsələsində Rusiya çox maneələri dəf etməli oldu. Azərbaycanın haqlı etirazları fonunda onlar Ermənistanın mövqeyindən çıxış etdilər. İndi isə Paşinyanın belə bir addımı atması onları qıcıqlandırmaya bilməz. Bu, KTMT-nin nüfuzna böyük zərbədir. Hesab edirəm ki, Paşinyan bunu bilərəkdən edib. Xüsusilə də Paşinyanın bu addımı NATO sammitində iştirakdan sonra atması onun hansı hərbi bloka simpatiya bəslədiyini aydın büruzə verir”.
Məhəmmədəli QƏRİBLİ
