Arzuxan Əlizadə: “Bütün bunlar erməni həyasızlığını özündə ehtiva edir”
“Ermənistan və qondarma “DQR” arasında hərbi-siyasi əməkdaşlıq haqqında razılığa ehtiyac var”. Bunu erməni mətbuatına açıqlamasında separatçı rejimin “parlament üzvü” Vardes Baqryan bildirib.
O, həyasızcasına iddia edib ki, tərəflər belə müqavilənin imzalanmasında gecikirlər: “Bu, 2016-cı ilin aprel müharibəsindən sonra aktual müzakirə olundu. Lakin bundan iki il keçdi və belə bir sənəd hələ də mövcud deyil. Əlbəttə ki, belə bir sənəd olsa, o zaman hüquqi baxımdan tərəflər nə edəcəyini biləcək”.
Separatçı qurum təmsilçisi iddia edir ki, guya Azərbaycanın hərbi ritorikası artdığı üçün, belə bir sənədin imzalanması lazımdır: “Ermənistanla “DQR” arasında fərqli səviyyələrdə mövcud razılıqlar var. Ancaq belə bir sənəd də imzalanmalıdır”.
Baqryan açıqlamasında bir az da ifrata vararaq qeyd edib ki, indiki vaxtda Azərbaycan Naxçıvan istiqamətində aktivliyini artırıb. Çünki hər kəs üçün "Sevanda üzmək və Şuşada çay içmək arzusu" sirr deyil: “Biz Naxçıvanla sərhəd zonasında baş verən hadisələrdən narahatıq və prosesləri izləyirik. Heç kəs deyə bilməz eç kəs deyə bilməz Azərbaycan nə vaxt hərbi əməliyyatlara başlayacaq. Biz hər gün buna hazır olmalıyıq. Çünki başqa bir alternativimiz yoxdur. Layiqli bir cavab vermək üçün belə bir müqavilə olmalıdır”.
Göründüyü kimi, erməni həyasızlığı bütün formalarda özünü göstərir. Heç kəsə sirr deyil ki, Azərbaycan ərazilərini təkcə Dağlıq Qarabağdakı erməni separatçıları işğal etməyib. Ərazilərimizin işğalında iştirak edən başlıca qüvvə Ermənistan silahlı qüvvələri olub. Bu gün Qarabağ cəbhəsində Azərbaycan Ordusu ilə üzbəüz qalan məhz Ermənistan ordusudur. Bu azmış kimi, indi də separatçı qurumla hərbi-siyasi əməkdaşlıq haqda dəm vururlar.
Sözügedən məsələ ilə bağlı fikirlərini “Bakı-Xəbər”lə bölüşən AMİP-in baş katibi Arzuxan Əlizadənin sözlərinə görə, ermənilər bu məsələni gündəmə gətirməklə Azərbaycana psixoloji təsir göstərirlər: “Dəfələrlə ermənilər bu məsələni gündəmə gətiriblər. Onlar öz aləmlərində belə hesab edirlər ki, guya belə bir müqavilə hüquqi baxımdan onlar üçün müəyyən üstünlükləri təmin edəcək. Ancaq məlumdur ki, bütün bunlar erməni həyasızlığını özündə ehtiva edir. Məsələ ondadır ki, belə bir razılaşmanın olması nəyisə dəyişmir. Onsuz da separatçı qurumda bütün prosesləri Ermənistan idarə edir və Azərbaycan ərazilərini işğalda saxlayan da adıçəkilən dövlətdir. O da məlumdur ki, separatçı qurumu Ermənistan daxil heç bir dövlət tanımayıb. Ermənistan da ATƏT-in Minsk Qrupunun vasitəçiliyi ilə aparılan danışıqlara xələl gəlməsin deyə, bu addımı atmır. Çünki Ermənistan defakto öz istəyinə çatıb. Yəni Dağlıq Qarabağ və ətraf 7 rayonu işğal edib. Hüquqi baxımdan isə işğalı rəsmiləşdirə bilmirlər. Bütün hallarda, onlara lazımdır ki, heç olmasa nəticəsiz danışıqlar davam etsin. Ermənistan düşünür ki, Azərbaycanın hərbi əməliyyatlara başlamağındansa, status-kvonun davam etməsi sərfəlidir. Ona görə də biz bütün sahələrdə işğalçı Ermənistana təzyiqləri artırmalıyıq. Ermənistan belə bir addım atsa, o zaman Azərbaycan bunu beynəlxalq qurumlar səviyyəsində qaldırmalıdır. Eyni zamanda, danışıqlardan çıxmalıdır. Hesab edirəm ki, Ermənistan Azərbaycanın belə bir addım atacağını görsə, o zaman belə bir saziş imzalamaqdan çəkinə bilər. Baxmayaraq ki, belə bir sazişin imzalanması praktiki baxımdan nəyisə dəyişmir. Ona görə ki, Azərbaycan ərazilərini işğal edən və işğalda saxlayan Ermənistandır. Sadəcə, işğalçı dövlətə təzyiqi artırmaq baxımından bunu etmək lazımdır”.
Vidadi ORDAHALLI
