Elşən Manafov: “Paşinyan istəsə də, bu məsələ ilə bağlı təkbaşına qərar verə bilməz”
İrəvan Rusiyanın Ermənistandakı sərhəd qoşunlarının statusunu yenidən gözdən keçirmək istəyir. Ermənistanın yeni müdafiə naziri David Tonoyan bəyan edib ki, bu, daş üzərində cızılan sənəd deyil, zaman keçdikcə, bu cür müqavilələrə hüquqi əlavələrin edilməsi zəruridir.
Lakin müdafiə naziri Ermənistanın müstəqillik əldə etdikdən sonra, 1992-ci ilin yanvarında imzalanan Rusiya Federasiyası sərhəd qoşunlarının Ermənistandakı statusu haqqında müqaviləyə hansı konkret düzəlişlərin həyata keçiriləcəyinə aydınlıq gətirməyib.
Ancaq erməni nazir bu yaxınlarda Şirak vilayətinin Panik kəndində rusiyalı hərbi qulluqçuların törətdiyi atəşfəşanlıqla bağlı yaranan insidentə görə həmin dəyişikliklərin sürətlənəcəyi anonsunu verib. Məlumdur ki, rus sərhədçilər Ermənistanın İran və Türkiyə ilə sərhədlərini qoruyurlar. Ermənistanın həmin funksiyanı öz üzərinə götürmək istəyinin sonu nə ilə nəticələnə bilər?
Politoloq Elşən Manafovun sözlərinə görə, David Tonoyanın Rusiya sərhəd qoşunlarının statusunun dəyişdirilməsi barədə bəyanatı Ermənistanın müstəqillik əldə etməsindən bu yana bölgəni qoruyan rus hərçbilərinə yönəlik ən sərt çıxışdır: “Düşünürəm ki, Ermənistandakı Rusiya qoşunlarının statusunun dəyişdirilməsi təkcə Paşınyan hökumətinin mövqeyindən asılı deyil. Bunun üçün Ermənistan parlamentinin də razılığı olmalıdır. Maraqlıdır ki, erməni nazirin sözügedən bəyanatı Gümrüdəki rus hərbçilərinin ölkə rəhbərliyinə xəbər vermədən hərbi təlimlərə başlamasından sonraya təsadüf edir. Bir çox mütəxəssislər rus hərbçilərinin həmin hərbi təlimlərini Paşinyan hökumətinə xəbərdarlıq kimi qiymətləndirmişlər. Prinsipcə, rəsmi İrəvan da məsələyə bu cür yanaşmış və müxtəlif rəsmilərin dililə öz etirazını bildirib. Ermənistan hökumətinin birbaşa və dolayısıyla etirazına baxmayaraq, ölkədəki rus hərbçilərinin geniş tərkibli hərbi təlimlərə başladığı xəbər verilir. Məlumata görə, 3 min rus əsgərinin yer aldığı taktiki təlim iyulun 28-dək davam edəcək. Ermənistan parlamentində hələ də Rusiyaya bağlı olan Sarkisyanın liderliyindəki Respublika Partiyası üstün mövqelərə malikdir. Buna baxmayaraq, yaxınlarda keçirilməsi nəzərdə tutulan növbədənkənar parlament seçkilərində Paşinyanın rəhbərlik etdiyi partiyanın qalib gələcəyi şübhə doğurmur. Yalnız bu zaman Ermənistandakı Rusiya Federasiyasının sərhəd qoşunlarının statusunun dəyişdirilməsinə ölkə parlamentində aydınlıq gətirilə bilər. Yəni Paşinyan istəsə də, bu məsələ ilə bağlı təkbaşına qərar verə bilməz”.
Qeyd edək ki, İrəvanda müdafiə naziri David Tonoyanın rusiyalı sərhədçilərin ölkədə qalma şərtlərini tənzimləyən müqaviləyə yenidən baxılacağı ilə əlaqədar dediklərindın sonra ciddi qorxuya düşüblər. Nazirliyin mətbuat xidmətinin rəhbəri A.Ovvanisyan erməni mətbuatında yayılan xəbərləri təkzib edib. Onun sözlərinə görə, jurnalistlər naziri düz anlamayıblar.
Görünür ki, ölkənin hərbi rəhbərliyinin çıxışı Moskvada neqativ reaksiyaya səbəb olub və buna görə mətbuat xidməti rus və erməni hərbçilər arasında dostluğun əbədi olduğu haqqında danışmağa başlayıb. Sən demə, nazir ümumiyyətlə rus sərhədçilər barəsində danışmayıb. Bir çox erməni jurnalistində isə nazirin çıxışını əks etdirən səs yazısı olduğunu bəyan edirlər.
Məhəmmədəli QƏRİBLİ
