Yeganə Hacıyeva: “Makron bunu etməyə cəhd göstərsə, ciddi nəticələrin şahidi olarıq”
Ölkə Prezidenti cənab İlham Əliyevin Prezident Emmanuel Makronun dəvəti ilə Fransaya növbəti səfəri Azərbaycanla Fransa arasındakı münasibətlərin çox yüksək səviyyədə olduğunu göstərdi.
Qeyd edək ki, Qarabağ münaqişəsinin sülh və danışıqlar yolu ilə həllində Fransanın da üzərinə böyük məsuliyyət düşür. Onlar ATƏT-in Minsk Qrupunun vasitəçilik missiyası ilə məşğul olan digər iki həmsədr dövlət - Rusiya və ABŞ qədər bu münaqişənin həllinə birbaşa cavabdehlik daşıyırlar. Çünki illərdir bu üç ölkə vasitəçilik missiyasını üzərinə götürüb və demək olar ki, başqa dövlətləri bu missiyaya yaxın buraxmırlar. Odur ki, Fransa da daxil olmaqla, bu üç dövlətdən Qarabağ münaqişəsinin ədalətli həllini gözləmək və tələb etmək bizim haqqımızdır. İlham Əliyevin Fransaya reallaşan səfəri zamanı keçirdiyi görüşlərdə Dağlıq Qarabağ münaqişəsinin həlli ilə bağlı məsələnin müzakirəsi prioritet təşkil edib. Ölkə başçısının həm Senatda, həm də Emmanuel Makronla keçirdiyi görüşlərdə bu mövzuya xüsusilə toxunulub. Fransanın dövlət başçısı problemin həlli ilə bağlı öz səylərini əsirgəməyəcəyini bildirib. Fransanın bu istiqamətdə rolunun artırılmasında Makron hansı rolu oynaya bilər?
Politoloq Yeganə Hacıyeva qəzetimizə açıqlamasında bildirdi ki, Dağlıq Qarabağ problemi ilə yaxından maraqlanmaq Fransanın öhdəliyi olan məsələdir: “Bilirsiniz ki, Fransa uzun müddətdir Dağlıq Qarabağ məsələsinin sülh yolu ilə nizama salınması üçün təsis edilən ATƏT-in Minsk Qrupu həmsədrlərindən biridir. Çox təəssüflər olsun ki, biz ümumən həmin təsisatın fəaliyyətindən razı deyilik. Çünki ortada heç bir real nəticə yoxdur. Qeyri-konstruktivlik nümayiş etdirən Ermənistana qarşı isə heç bir konkret cəza tələbi irəli sürülmür. Təəssüflər olsun ki, biz indiyə kimi belə bir prinsipial mövqeni Fransadan da görməmişik. Hətta mən deyərdim ki, orada yaşayan erməni lobbisinin güclü təsiri ilə biz məhz bu münaqişə çərçivəsində bəzi xoşagəlməz hallarla üzləşmişik. Bura Dağlıq Qarabağa edilən qanunsuz səfərlərin sayında Fransa vətəndaşlarının çoxluğunu, eləcə də qondarma qurum rəhbərlərinin Fransada sərbəst hərəkətini, hətta orada rəsmilərlə görüşlər keçirməsini aid edə bilərik. Hesab edirəm ki, İlham Əliyevin Fransa səfəri çox uğurlu oldu. Onun istər Senatda, istərsə də Makronla keçirdiyi görüşü yüksək dəyərləndirmək olar. Makron bildirib ki, Fransa Dağlıq Qarabağ münaqişəsinin nizamlanmasına dəstək göstərməkdə davam edəcək.
Fransa Prezidenti vurğuladı ki, uzunmüddətli əsasda və regionun bütün xalqlarının marağı daxilində bu münaqişənin tək variant olan danışıqlar yolu ilə həllinin tapılmasında səylərini davam etdirəcək. Əslində, bu yanaşmada mən qeyri-adi nəsə görmürəm. Makrondan əvvəlki sələfləri də belə diplomatik açıqlamalar verirdi. Bu məsələdə köklü ölkələrin maraqları öndə dayanır. Yəni şəxsiyyət faktorunun təsiri çox deyil. Makron Fransanın milli maraqlarından kənara çıxa bilməz. Amma ölkə başçılarının şəxsi keyfiyyətləri prosesi sürətləndirə bilər. Biz Medvedyevin Rusiya Prezidenti olduğu dönəmdə Dağlıq Qarabağla bağlı danışıqlarda aktivliyin artdığını müşhidə etdik. Amma ortada heç bir nəticə olmadı. Makronda bu çeviklik hiss edilir. Ümid edək ki, ortaya konkret mövqe qoyacaq. İndiki məqamda məhz buna ehtiyac var. Bunun da kökündə Ermənistana təzyiq dayanır. Bunu Makron etməyə cəhd göstərsə, ciddi nəticələrin şahidi olarıq”.
Məhəmmədəli QƏRİBLİ
