Ermənistanda baş verən son proseslər bu ölkədə daxili ziddiyyətlərin gedərək daha kəskin xarakter aldığını göstərir. Buna əsas səbəb isə hakimiyyətə yeni gələn Nikol Paşinyanın yenə də əvvəlki iqtidar üzvlərinə qarşı sərt addımlar atması, onların əksəriyyətini həbsə atmasıdır.
Bunlardan biri də Ermənistan keçmiş prezidenti Robert Köçəryandır. Qeyd edək ki, Robert Köçəryan 2008-ci ildə İrəvanda keçirilmiş mitinqlərdə insanlara atəş açmaq əmri verməkdə ittiham edilir. Ermənistanda nəşr olunan “Jamanak” qəzeti, ittiham təsdiqini tapacağı halda, hazırda Rusiyada olan keçmiş prezidentin iyulun 26-da həbs ediləcəyini istisna etməyib. Qəzet bununla bağlı istintaq komissiyasının bir sıra faktlar əldə etdiyini və Köçəryanın Ermənistana qayıtmasını gözlədiklərini bildirib. “Jamanak” 26 iyul dindirilməsini “Köçəryanın həbsinə hazırlıq” adlandırıb.
Məlumat üçün bildirək ki, Robert Köçəryan iyulun 26-da dindiriləcək. Ermənistanın Xüsusi Təftiş Xidmətinin rəisi Sasun Xaçaturyan bildirir ki, Köçəryanın istintaqa ifadəsi kameraya alınacaq. O, Köçəryanın iyulun 26-da dindiriləcəyini təsdiqləyib: “Ayın 26-da istintaqın qarşısına çıxmağa hazır olmalıdır. Çox güman ki, onun ifadəsi kameraya alınacaq. Bunun cəmiyyətə açıqlanması isə istintaqı aparacaq orqanın qərarından asılıdır”.
Qeyd edək ki, 2008-ci il martın 1-də Serj Sarkisyanın qalib gəldiyi prezident seçkisindən sonra kütləvi etirazlar olmuş, hüquq-mühafizə orqanları ilə etirazçılar toqquşmuşdu. Martın 1-də səhər polislər İrəvandakı Azadlıq meydanında gecələyən müxalifətçilərə hücum etmişdi. Müxalifətçilər seçkinin rəsmi nəticələrinə etiraz edirdilər. Həmin gün baş vermiş toqquşmalarda 10 nəfər həlak olub, yüzlərlə adam yaralanıb. Bundan başqa, keçmiş müdafiə naziri Mixael Arutunyan “1 mart” işi üzrə təqsirləndirilən qismində cəlb olunub, ona ittiham irəli sürülüb, axtarış elan edilib. Məhkəmə Arutyunyan barəsində iki aylıq qiyabi həbs qərarı çıxarıb. Ümumiyyətlə, bu prosesdə xeyli sayda hərbçinin adı keçir. Belə vəziyyətdə hərbçilərin həbsi isə Ermənistanda yeni hakimiyyətə qarşı ciddi narazılığa rəvac verib. “Qraparak” qəzetinə Müdafiə Nazirliyindəki yüksək çinli məmur bu xüsusda bildirib ki, Ermənistan Müdafiə Nazirliyinin yüksək vəzifəli şəxləri və general heyəti baş nazir Nikol Paşinyanın təşəbbüsü ilə orduda və nazirlikdə başladılan çoxsaylı araşdırmalara görə olduqca hiddətlidir. Onun sözlərinə görə, Milli Təhlükəsizlik Xidmətinin apardığı istintaqlar nəticəsində nazirlikdə yaranan gərgin vəziyyət erməni generallarda qıcıq yaradıb: “Bizim hamımıza cinayətkar kimi baxırlar. Məqsəd korrupsiya və qanun pozuntularının ifşa olunması yox, ordunu hamının hədəfinə çevirməkdir. Bir general axtarışa verilib, digərləri həbs olunub, qalanları şahid kimi istintaqa cəlb olunub, başqa biri siyasəti fəaliyyətə qoşularaq “pozulub”... Axı onların hamısı bu və ya digər şəkildə ordu və ordu quruculuğu ilə bağlılığı olan adamlardır. Yəni ordudakıların hamısının başını kəsirlər... bəs kim qalacaq? Heç olmasa ordunun bir hissəsində hökumət şou göstərməməli idi. Qoy, nə istəyirlər etsinlər, amma ordudan kənar sahələrdə!”. Müdafiə Nazirliyinin adının çəkilməsini istəməyən yüksək vəzifəli şəxsi “Qraparak” qəzetinə açıqlamasında onu da əlavə edib ki, nədənsə, Paşinyan hökuməti bütün gücünü məhz ordu və Müdafiə Nazirliyindəki korrupsiya faktlarının üzə çıxarılması ətrafında cəmləşdirib. İqtisadiyyatın göz qabağında olan bərbad vəziyyətinə görə ölkəyə gələn investisiyaların hara yoxa çıxdığını isə araşdırmaq istəmirlər. Qəzet bunu Paşinyanın "arxası möhkəm" oliqarxlarla mübarizədən çəkinməsilə əlaqələndirib. Ermənistanın "Jamanak" qəzeti də yazır ki, hazırda bu ölkənin Milli Təhlükəsizlik Xidməti müdafiə və ümumilikdə hərbi sahədə hökm sürən özbaşınalıq, korrupsiya, rüşvətxorluq, xüsusilə gənclərin saxta sənədlərlə ordudan yayınması hallarının araşdırılması və ictimailəşdirilməsi məsələləri ilə məşğul olur. Qəzet öz etibarlı mənbələrinə istinadən xəbər verir ki, Noyemberyan ərazisində yerləşən hərbi hissələrdə əsgərlər hər dəfə postlara döyüş növbətçiliyinə getməzdən öncə evləri ilə əlaqə saxlayaraq, valideynlərindən onlara ərzaq almaları üçün pul göndərmələrini xahiş edirlər: "Hər dəfə hər əsgərdən 7-10 min dram məbləğində pul toplayırlar. Məsələ bundadır ki, mövqelərdə yerləşdirilən və döyüş növbəsi üçün postlara qalxan əsgərlərə yemək verilmir. Bu səbəbdən ərzaq və siqaret almaları üçün əsgərlər evlərinə, öz valideynlərinə müraciət etmək məcburiyyətində qalır". Bütün bunlar isə onu göstərir ki, Paşinyanın gəlişi də orduda real acınacaqlı vəziyyəti dəyişməyib. Sadəcə, Paşinyan öz nüfuzunu qorumaq üçün orduda bəzi yüksəkçinli hərbçiləri qurban verir. Belə vəziyyət isə ondan narazılığı artırır.
Nahid SALAYEV
