"Ola bilsin ki, yanvarın 23-də Astana görüşü ümumiyyətlə baş tutmasın"
Yayılan məlumatlara görə, Suriya müxalifəti Astana danışıqlarına hazırlığı dondurmaq qərarına gəlib. Belə ki, Azad Suriya Ordusu daxil olmaqla, 12 təşkilat tərəfindən yayılan bəyanatda rəsmi Dəməşqdən atəşkəs rejiminə əməl etmək tələb edilib:
"Biz 2017-ci il yanvarın sonunda Astana şəhərində keçiriləcək danışıqlara hazırlıqla bağlı bütün əlaqələri dondururuq".
Sənəddə bildirilir ki, Suriya ordusu ilə rəsmi Dəməşqi dəstəkləyən qüvvələr Hama, Deraa əyalətləri və Şərqi Quta regionunda atəşkəs rejimini dəfələrlə pozub.
Məlumat üçün qeyd edək ki, dekabrın 29-da Suriyada münaqişə tərəfləri arasında atəşkəsin bərpa olunması ilə bağlı razılaşma imzalanıb. Atəşkəs rejimi dekabrın 30-da, yerli vaxtla saat 00:00-da qüvvəyə minib. Bu ay Qazaxıstanın paytaxtı Astana şəhərində Türkiyə və Rusiyanın iştirakı ilə Suriya üzrə çoxtərəfli sülh danışıqlarının keçirilməsi planlaşdırılır.
Bu arada Türkiyənin xarici işlər naziri Mövlud Çavuşoğlu Suriya münaqişəsi ilə bağlı danışıqların Astanada keçirilmə vaxtını açıqlayıb. Onun sözlərinə görə, görüş yanvarın 23-də keçiriləcək. M.Çavuşoğlu onu da bildirib ki, atəşkəsi pozanlara qarşı tədbirlər görüləcək: "Biz Suriyada atəşkəs rejimini pozan qruplaşmalara qarşı beynəlxalq sanksiyaların tətbiq olunması istiqamətində iş görürük, tərəflər arasında razılaşmanın əldə olunmasına çalışırıq. Atəşkəs müqaviləsinin imzalanmasından sonra rejimin tez-tez müxtəlif qruplaşmalar tərəfindən pozulduğunu görürük. Sabitliyi pozanları dayandıra bilməsək, Astana görüşü də əhəmiyyətini itirəcək. Rejimi pozanlar arasında "Hizbullah" və digər qruplaşmalar var. İran da bu yöndə lazım olan addımları atmalıdır".
Bütün bunların fonunda, bir qrup müxalif qüvvənin danışıqlarda iştirak etməyəcəyini bəyan etməsi nəyin göstəricisidir? Bunda Qərbin nə dərəcədə rolu var? Məsələyə münasibət bildirən Vətəndaş və İnkişaf Partiyasının sədr müavini Ramil Hüseynov bunu istisna etmədi. Onun fikrincə, Rusiya, Türkiyə və İranın ortaq məxrəcə gəlməsi yetərli deyil: "ABŞ və ərəb ölkələri prosesə dəstək vermədən Suriyada ciddi və dayanıqlı atəşkəsə nail olmaq çətin məsələdir. Ancaq müşahidələr göstərir ki, Rusiya hələlik bu məsələdə xüsusi fəallıq göstərmir. Xüsusən də Səudiyyə Ərəbistanı və Qətərin bu prosesdən kənarda qalması yaxşı heç nə vəd etmir. İstəsək də, istəməsək də bu belədir. Üstəlik, ABŞ və onun təşkil etdiyi 45 koalisiya dövləti də bu gün prosesdə iştirak etmir. Rusiya Suriya məsələsini Türkiyə və İranın iştirakı ilə həll etməyə çalışır. O üzdən ola bilsin ki, Qərbin maraqları təmin olunmadığı üçün, Əsədə müxalif qüvvələr yekdil mövqedən çıxış etməkdən yayınır. Ola bilsin ki, yanvarın 23-də Astana görüşü ümumiyyətlə baş tutmasın. Yaxud da nəticəsiz başa çatsın. Bu məsələdə Birləşmiş Ştatların nə cür mövqe sərgiləyəcəyi önəmlidir. Rusiya hesab edir ki, Tramp yanvarın 20-də prezident kimi vəzifəsini icra etməyə başlayacağına görə yeni administrasiyanın mövqeyi hələ tam bəlli deyil. Ancaq, istənilən halda, ABŞ-ın Səudiyyə Ərəbistanına təsir imkanları böyükdür. Bəzi məlumatlara görə, İŞİD-ə maliyyə yardımını Səudiyyə Ərəbistanı edir. Onu da nəzərə almaq lazımdır ki, İdlib, Əl Bab və başqa bölgələr İŞİD və digər terrorçu qüvvələrin təsiri altındadır. Ona görə də danışıqların baş tutacağını indidən birmənalı şəkildə bəyan etmək çətindir". Vidadi ORDAHALLI
