ABŞ-da Donald Tramp rəsmən vəzifəsinin icrasına başlayana kimi Vaşinqton və Moskva arasında yeni savaşa start verilə bilər. Artıq ABŞ rəsmən Rusiyanı hədəfə alacağıın da bəyan edib. Söhbət tərəflər arasında gözlənilən mümkün kibermüharibədən gedir.
ABŞ-ın daxili təhlükəsizlik naziri Cey Conson bildirib ki, ABŞ prezident seçkiləri zamanı edilən haker hücumlarına cavab vermək üçün plan üzərində işləyir: "ABŞ prezidentinin dediyi kimi, haker hücumuna cavab ölçülərinin siyahısı müzakirə edilir. Biz onları olduqca diqqətlə fikirləşirik". Daha əvvəl Amerika xüsusi xidmət orqanları Rusiyanı rəsmən ABŞ-da seçkilərə təsir etmək cəhdlərində ittiham edib. Mərkəzi Kəşfiyyat Agentliyi bu qənaətə gəlib ki, Rusiya hakerləri Demokratlar Partiyasının funksionerlərinin elektron poçtlarına hücum edərək, Hillari Klintonun prezidentlik kampaniyasını gözdən salmağa cəhd göstəriblər. Hesab edilir ki, əməliyyatın məqsədi Donald Trampın ötən aykı seçkilərdə qələbəsinə yardım göstərmək olub. Yüksək rütbəli Ağ Ev rəsmiləri deyirlər ki, bütün bunlar Rusiya prezidenti Vladimir Putinin bilgisi olmadan baş verə bilməzdi. ABŞ prezidenti Barak Obama öz səlahiyyət müddətinin sonuna kimi ittihamlara cavab vermək xahişilə xüsusi xidmət orqanlarına müraciət edib. Obama deyir ki, Birləşmiş Ştatlar Rusiya və ABŞ seçkilərinə müdaxilə etməyə çalışan istənilən xarici hökumətə qarşı addımlar atacaq: "Heç şübhəsiz, xarici hökumət bizim seçkilərin bütövlüyünü sual altına almağa çalışırsa, biz əməli addımlar atmalıyıq. Və biz bunu edəcəyik. Bu hərəkətlərin bəziləri açıq-aşkar ola, bəziləri isə şəffaf olmaya bilər". Onun sözlərinə görə, səsvermənin nəticələrinə bir çox amillər sirayət edib, lakin şübhəsiz, haker hücumları bu amillərdən biridir.
Hillari Klinton da prezident seçkilərində məğlub olmasında Rusiyanın müdaxiləsinin rolu olduğunu bildirərək, Vladimir Putinin ona qarşı şəxsi qərəzinə görə ona mane olmaq istədiyini deyib. Noyabr ayında seçkilərdən sonra ictimaiyyət arasında az görünən Klinton bu açıqlamanı Nyu- Yorkda kampaniya donorları ilə görüş zamanı verib. Görüşdən alınan audio yazıya əsasən, Klinton deyib: "Putinin mənə qarşı şəxsi qərəzinə görə bizim seçki sistemi, bizim demokratiyaya kiberhücum onun özü tərəfindən idarə edilib". Demokratlar Partiyasından prezidentliyə namizəd deyib ki, Putinin ona mənfi münasibəti 2011-ci ildə dövlət katibi olduğu zaman Rusiyada parlament seçkilərinin saxtalaşdırıldığını deməsilə əlaqədardır. Kreml isə ittihamlarla razılaşmır və Moskva bu iddiaları gülünc adlandırıb. Prosesdə adı hallanan Donald Tramp, öz növbəsində, Obama administrasiyasının haker əməlyyatı ilə bağlı indiyədək gözləmə mövqeyi tutmasını sual altına alıb: "Rusiya, yaxud başqa bir tərəf hakerlikdə iştirak edibsə, Ağ Ev niyə bu qədər gözləyib? Niyə onlar yalnız Hillari seçkiləri uduzduqdan sonra şikayət ediblər?". İndi narahatlıq doğuran məqam odur ki, Tramp hakimiyyətə gələnə qədər Obama Rusiya ilə kibermüharibəyə start verə bilər. Bu müharibəni daynadırmaq isə Trapm üçün də çətin olacaq. İndilikdə Tramp inauqurasiya mərasiminə daha çox diqqət yetirir. Qeyd edək ki, Amerika demokratiyasının əsas əlamətlərindən biri hakimiyyətin dinc yolla vəzifədən gedən prezidentdən sələfinə ötürülməsidir. Paytaxt Vaşinqtonu bütün dünya tərəfindən izlənəcək parad məkanına çevirmək isə ABŞ-da ənənə halını alıb. Ordu başçıları bu böyük günə "DC Armory" adlı arenada iri bir xəritə ilə hazırlaşır. Bu xəritə Vaşinqton şəhərinin kiçik versiyasıdır. Burada ölkənin hər bir yerindən rəsmilər Amerikanın 58-ci inauqurasiyası üçün paradın marşrutunu planlaşdırır. Məşq üçün Silahlı Qüvvələr Vaşinqtonun hazırlanan xəritəsindən istifadə edir. Bu xəritədə paradın marşrutu və hərbi, federal və yerli rəsmilərin yer alacağı logistik vəziyyət qeyd olunur. İnauqurasiya yanvarın 20-də baş tutacaq. İndi Tramp bütün diqqətini bu prosesə yönəldib. Amma belə görünür, Obama ona heç də asan miras qoymur və bura Rusiya ilə kibermüharibə də daxildir. Yanvarın 20-nə qədər bu müharibə başlasa, ekspertlər Trampın belə onu çətin durdura biləcəyini bəyan edir.
Nahid SALAYEV
