Arzuxan Əlizadə: "Tramp ölkəsinin milli təhlükəsizliyinə əsas təhdidlər sırasına Rusiyanı daxil etməməklə qarşı tərəfə siyasi reverans edir"
Məlum olduğu kimi, ABŞ-ın yeni seçilmiş prezidenti Donald Tramp ölkəsinin milli təhlükəsizliyinə əsas təhdidlər sırasına Rusiyanı daxil etməyib. Bu barədə məlumatı "Foreign policy" nəşri ABŞ Müdafiə Nazirliyinin xidməti hesabatına istinadən yayıb.
D.Trampın keçid administrasiyasının hazırladığı "Müdafiənin prioritetləri" adlı sənədə İŞİD-lə mübarizə və onun məhv edilməsinə dair strategiyanın işlənib hazırlanması, müdafiənin gücləndirilməsi, kibertəhlükəsizliyə dair hərtərəfli strategiyanın hazırlanması və Pentaqonun işinin səmərəliliyinin artırılması daxildir. Sənəddə Rusiyanın adı çəkilməyib.
Qeyd edək ki, hazırkı ABŞ administrasiyası və Pentaqon rəhbərliyi Rusiyanı ABŞ-ın milli təhlükəsizliyinə təhdidlərdən biri sayır. Bu arada ABŞ Ukraynadakı vəziyyətə və Krımın Rusiyaya ilhaq edilməsinə görə rəsmi Moskvaya qarşı sanksiyalar siyahısını genişləndirib. Siyahıya daha 7 fiziki şəxs (Mixail Dedov, Mixail Klişin, Kirill Kovalçuk, Dmitriy Lebedev, Dmitriy Mansurov, Oleq Minayev, Yevgeniy Priqojin) və onlarla təşkilat daxil olunub. Bundan əlavə, Rusiya bayrağının dalğalandığı iki tanker - "Marşal Jukov" və "Stalinqrad", eləcə də Vaşinqton tərəfindən məhdudiyyətlər altında olan "Novatek" şirkəti də siyahıdadır. Görünən odur ki, Barak Obama vaxtının bitməsinə az qalmış bütün mümkün vasitələrdən Rusiyaya qarşı istifadə edir. Belə bir situasiyada Trampın ölkəsinin milli təhlükəsizliyinə əsas təhdidlər sırasına Rusiyanı daxil etməməsini siyasilər necə dəyərləndirir?
Məsələyə münasibət bildirən AMİP-in baş katibi Arzuxan Əlizadənin sözlərinə görə, sözügedən məsələ barəsində indidən konkret mülahizələr irəli sürmək çətindir: "Düzdür, Donald Tramp Rusiya ilə münasibətlərin qaydaya salınacağı ilə bağlı bir sıra optimist vədlər vermişdi. O cümlədən, Rusiya prezidenti Vladimir Putin də Trampın seçilməsinə rəğbətini gizlətməmişdi. Şübəsiz ki, Tramp prezidentlik vəzifəsini icra etməyə başladıqdan sonra ABŞ-ın Rusiya ilə münasibətlərinin yoluna qoyulması ilə bağlı səylərini artıracaq. Bu da Putinlə aparılan danışıqların nəticəsindən asılı olacaq. Hesab edirəm ki, Tramp ölkəsinin milli təhlükəsizliyinə əsas təhdidlər sırasına Rusiyanı daxil etməməklə qarşı tərəfə siyasi reverans edir. Bununla Rusiya ilə münasibətləri yaxşılaşdırmaqda maraqlı olduğunu bəyan edir. Görək rəsmi Moskva, daha doğrusu, prezident Vladimir Putin bunu necə dəyərləndirəcək. Tərəflər arasında əsas fikir ayrılığı Ukrayna ilə bağlıdır. 2014-cü ildə Kiyevdə baş verən etiraz aksiyalarından sonra prezident Yanukoviç hakimiyyətdən getdi. Qərbpərəst qüvvələrin hakimiyyətə gəlməsi Rusiyanın Donbasda separatçılara dəstək verməsinə və Krımı ilhaq etməsinə gətirib çıxardı. Ancaq düşünmürəm ki, Putin sözügedən məsələlərdə ABŞ-a ciddi güzəştə getsin. Belə olacağı halda isə Birləşmiş Ştatlar milli təhlükəsizlik məsələsinə yenidən baxa bilər. Bir daha qeyd edim ki, bu, ABŞ-Rusiya danışıqlarının nəticəsindən asılı olacaq".
Vidadi ORDAHALLI
