Qabil Hüseynli: "Rusiya gedib Afrikada baza yaratmaqdansa, öz əhalisinin normal dolanışığını təmin edə bilsə, yaxşı olar"
Rusiya Şimali Afrikada ilk hərbi bazasını qurmağa hazırlaşır. Bu barədə xəbərlər Liviya milli ordusunun komandiri general Halife Hafterin Moskvaya səfər etməsindən sonra yayılıb. Moskvanın dəvəti ilə reallaşan səfər çərçivəsində general Rusiya müdafiə naziri Sergey Şoyqu ilə görüşüb. Görüşdə Liviyadakı son vəziyyət və Rusiya ilə Liviya arasında hərbi əməkdaşlıq məsələləri müzakirə edilib.
General Rusiya xarici işlər naziri Sergey Lavrovla da görüşüb. "Moskva Liviyada siyasi prosesin uğurlu bir şəkildə davam etməsi üçün ölkədəki müxtəlif siyasi qüvvələrlə əməkdaşlıq etməyə hazırdır" - bu barədə Rusiya Xarici İşlər Nazirliyinin görüş barədə yaydığı məlumatda bildirilir.
Rusiya ilə Liviya arasında keçirilən son danışıqlar Moskvanın Şimali Afrikada ilk hərbi bazasını qurmaq planının bir parçası kimi dəyərləndirilir.
Hərbi mənbələr Putinin Suriyanın Lazkiye şəhərindəki Hmeymim bazasından sonra Aralıq dənizində ikinci hərbi baza qurmaq planlarını işə saldığını deyir. Yeni hədəf isə Liviyanın Binqazi şəhəridir. Binqazidə qurulması planlaşdırılan bu hərbi baza ilə Rusiya həm dəniz, həm də hava qüvvələri ilə Avropaya 700 km yaxınlaşmış olacaq.
O da bildirilir ki, Liviyanın neft qaynaqları da Putinin hədəfindədir. Qeyd edilir ki, ölkədəki siyasi qarışıqlıqdan faydalanan Rusiya general Hafterə rəqibləri qarşısında əlini gücləndirmək üçün verəcəyi dəstək qarşılığında Liviya neft bazarına girməyə çalışacaq.
Rusiyanın Liviya həmləsi Yaxın Şərqdə ABŞ-ı sıxışdırmaq niyyətindən irəli gələ bilərmi?
Politoloq Qabil Hüseynli qəzetimizə açıqlamasında bildirdi ki, Rusiyanın yeni istəyi maraqlı görünür: "Deyilən layihələrin həyata keçirilməsi külli miqdarda vəsait tələb edir. Hazırda Rusiyanın iqtisadiyyatı elə səviyyədə deyil ki, o, bütün dünya boyu ABŞ-la rəqabət aparmaq iqtidarında olsun. Yaxın Şərqdə Rusiya açıq müharibə aparır və nəticələr göz qabağındadır. Liviyaya gəldikdə isə, ora Şimali Afrika ölkəsidir. Yəqin ki, Qəddafinin əsarətindən qurtarmağı bacaran həmin ölkə yenidən başqa bir əsarət altına girmək istəyir. SSRİ-dən qalma belə ənənə mövcud idi. Rusiya gedib ABŞ-ın düz qulağının dibində - Kubada hərbi baza qururdu. Hazırda Rusiyanın həmin qüdrəti yoxdur. Təbii ki, bu cür niyyətlər güc nümayişi istəyindən irəli gəlir. Mənə elə gəlir ki, Rusiya gedib Afrikada baza yaratmaqdansa, öz əhalisinin normal dolanışığını təmin edə bilsə, yaxşı olar. Belə üsullarla ABŞ-ı qorxutmaq mümkün deyil. Bunun üçün iqtisadiyyatı ABŞ səviyyəsinə gətirmək lazımdır".
Məhəmmədəli QƏRİBLİ
