Mehman Muradlı: "Qərb mediasının tərəfsizliyini şübhə altına salmış olacaq"
Avropa Parlamenti Rusiyanın Avropa Birliyinə qarşı "düşmən təbliğatının" artdığını bildirib və üzv dövlətləri dezinformasiya ilə mübarizə səylərini çoxaltmağa çağırıb. Rusiya prezidenti Vladimir Putin Avropa Parlamentinin bu çağırışından qəzəblənib və onun Rusiyaya "demokratiya dərsi keçməsini" şiddətlə qınayıb.
Noyabrın 23-də Avropa parlamentariləri "Russia Today" (RT) telekanalı və "Sputnik" xəbər agentliyi də daxil, Rusiyanın dövlət media qurumlarını "tam saxta" xəbərlər yaydığına görə qınayan qətnaməyə səs verib.
Onlar bildirib ki, Kreml saxta informasiya yaymaq, demokratik dəyərləri şübhə altına almaq və Avropanı parçalamaq üçün beyin mərkəzləri, çoxdilli televiziya stansiyaları, "psevdoxəbər agentlikləri" və yerli sosial media da daxil, "müxtəlif vasitə və alətlərdən" yararlanır.
Qətnamədə deyilir ki, Rusiyanın 2014-cü ildə Ukraynanın Krım ərazisini qanunsuz ilhaqından bəri Kreml Avropa Birliyinə qarşı təbliğata başlayıb.
Parlamentarilər Avropa Birliyini "cüzi olan" kommunikasiya gücünü genişləndirməyə və "maarifləndirmə, təhsil, onlayn və yerli media, araşdırma jurnalistikası və informasiya savadlılığı" sahələrinə daha çox diqqət yetirməyə çağırıb.
Onlar "Avropada Kremldən qaynaqlanan fəaliyyətlərin, o cümlədən dezinformasiya və təbliğatın sürətlə yayılmasından ciddi rahatsız olduqlarını" bildirib. Qətnamədə deyilir ki, bu fəaliyyətin məqsədi "Avropa Birliyini zəiflədərək parçalamaqdır".
Putin Moskvada jurnalistlərə deyib ki, bu qətnamə "Qərb cəmiyyətində demokratik düşüncələrin siyasi deqradasiyasından" xəbər verir.
Qətnamə 304 səslə qəbul edilib. Deputatların 179-u sənədin əleyhinə səs verib, 208-i tərəfsiz qalıb.
Bununla Avropa Parlamenti, faktiki olaraq, Rusiyaya qarşı informasiya müharibəsi açdığını rəsmən bəyan edib. Bu, faktiki olaraq, "soyuq müharibə"nin bərpası anlamına gəlir. Avropanın bu yöndəki fəaliyyətində bütün media resurslarını Rusiya əleyhinə cəlb etməsi həmin KİV-lərin media azadlığının itirilməsi ilə nəticələnə bilərmi?
Media ilə bağlı işlərdə hüquqi təcrübəsi olan hüquqşünas Mehman Muradlı qəzetimizə açıqlamasında bildirdi ki, əslində, Avropa Parlamenti tərəfindən mətbu orqanlara qarşı bu cür qərarların verilməsi söz azadlığı və insan haqlarının birbaşa pozulması deməkdir: "Avropa Parlamentinin bu qərarı bir daha sübut etdi ki, demokratik dəyərlər və söz azadlığı, sadəcə, "gözdən pərdə asmaq" xarakteri daşıyır. Nəzərə alaq ki, bir müddət əvvəl BBC-nin və "Azadlıq" radiosunun Rusiyada fəaliyyəti müvəqqəti dondurularkən, bütün dünya mediası, eləcə də Avropa Parlamenti bunu söz azadlığının boğulması kimi qələmə verirdi. Hətta Rusiyada diktatura rejiminin hökm sürdüyü və azad mətbuata qarşı təzyiqlərin total şəkildə aparıldığı ittihamları səsləndirilirdi. Lakin bunlara baxmayaraq, hazırda Rusiyada sözügedən mətbu orqanlarla yanaşı, Qərb mediasının müxtəlif orqanları sərbəst şəkildə fəaliyyət göstərir. Onlar istədiyi kimi Rusiya hakimiyyətini tənqid edir. Amma bu cür mətbu orqanlara Rusiyada kimsə bir söz demir. Əksinə, onlara lazımi şərait yaradılır. Rusiya prezidentinin iştirakı ilə keçirilən bir çox tədbirlərə Qərb mediasının nümayəndələri dəvət edilir. Hətta bəzi hallarda Vladimir Putinin siyasəti onlar tərəfindən tənqid edilir. Bunu isə, başda Vladimir Putin olmaqla, Rusiya rəsmiləri normal qarşılayır.
Rusiya KİV-nin Avropa Parlamenti tərəfindən susdurulması və bu istiqamətdə əks-təbliğatın gücləndirilməsi ilə bağlı qərar qəbul olunursa, bu, demokratik dəyərlərlə tamamilə ziddiyyət təşkil edir. Eyni zamanda, Qərb mediasının tərəfsizliyini şübhə altına salmış olacaq".
Məhəmmədəli QƏRİBLİ
