Arzu Nağıyev: "Avropanın supergüc hesab edilən dövlətlərinin hər birinin ayrılıqda İslam dövlətləri ilə iqtisadi, siyasi və hərbi sahələrdə ikitərəfli əlaqələri mövcuddur"
Avropa Parlamenti Türkiyənin Avropa İttifaqına üzvlüyü ilə bağlı 2005-ci il oktyabrın 3-də başlanan müzakirə prosesinin müvəqqəti dondurulması haqqında qərar qəbul edib. 479 parlamentar qərarın lehinə səs verib, 107-si bitərəf qalıb, 37-si isə əleyhinə çıxıb.
Qeyd edək ki, Avropa Parlamentinin qərarları tövsiyə xarakterlidir. Avropa Parlamentinin Türkiyənin Aİ-yə üzvlüyü ilə bağlı müzakirələrin dondurulmasına dair qərarını şərh edərkən Türkiyə XİN rəhbəri Mövlud Çavuşoğlu deyib ki, Avropa İttifaqının Ankaraya təzyiq cəhdləri mənasızdır: "Aİ, ilk növbədə, öz mövqeyini və siyasətini yenidən nəzərdən keçirməlidir. Bu cür üsullarla Türkiyəyə təzyiq etmək cəhdləri mənasızdır... Türkiyə Aİ qurumlarının obyektiv tənqidini və istənilən konstruktiv qərarını qəbul etməyə hazır olduğunu həmişə bəyan edib. Lakin qərəzliliyə yol verildikdə, Ankara buna qarşı çıxış edir. Bizim üçün bu cür qərarların heç bir hüquqi qüvvəsi yoxdur".
Onun sözlərinə görə, qərəzli və subyektiv addımlar Avropa Parlamentinin və ümumilikdə, Aİ-nin imicinə ziyan vurur: "Ankaraya qarşı uzun müddətdir ikili standartlar siyasəti aparılır".
Prezident Rəcəb Tayyib Ərdoğan sözügedən qərarın Türkiyə üçün heç bir əhəmiyyət kəsb etməyəcəyini bildirib.
Avropa Parlamentinin bu qərarı Aİ ilə İslam dünyası arasında münasibətlərə necə təsir edəcək?
Ekspert Arzu Nağıyev qəzetimizə açıqlamasında bildirdi ki, burada söhbət heç də İslam dünyası ilə qarşıdurma yaratmaqdan getmir: "Türkiyənin Avropa İttifaqına üzv olmaması üçün verilən bəyanatlar da yeni deyil. Dəfələrlə istər Böyük Britaniya rəhbərləri, istərsə də Fransa, Almaniya və digər dövlətlər bunun əleyhinə olduqları haqda bəyanatlar yayıb. Hazırda isə, düşünürəm ki, bu proseslər Türkiyənin Rusiya ilə yaxınlaşması yönündə verdiyi mesajların məntiqi nəticəsidir. Yəni əvvəllər Türkiyənin aqrar dövlət olaraq Avropa bazarına girməsi, Avropanın türkləşməsi səbəb kimi göstərilirdisə, bu gün artıq başqa bəhanələr gətirilir. Rusiya amili, miqrantlarla bağlı Türkiyənin atacağı addımlar, ölüm hökmünü tətbiq etmək istəyi, insan haqlarının qorunmaması barədə saxta ittihamlar ön plana çəkilir. Avropanın İslam dünyası ilə münasibətlərinin gərginləşəcəyinə gəldikdə isə, burada ciddi bir problem yaşanmayacaq. Çünki Avropanın supergüc hesab edilən dövlətlərinin hər birinin ayrılıqda İslam dövlətləri ilə iqtisadi, siyasi və hərbi sahələrdə ikitərəfli əlaqələri mövcuddur".
Məhəmmədəli QƏRİBLİ
