Qərb ölkələrinin PKK üzərindən Türkiyəyə qarşı yeni təhlükəli oyuna start verməsi bölgədə olduqca gərgin bir duruma səbəb olmaqdadır. Türkiyənin xarici işlər naziri Mövlud Çavuşoğlu NATO Parlament Assambleyasının İstanbulda keçirilən 62-ci Baş Məclisindəki çıxışında bu məsələyə toxunarkən bildirib ki, hətta PKK-nı terrorçu qruplaşmalar siyahısından çıxarmaq istəyirlər:
"Bölgəmizdə çoxlu problemlər var. Ancaq hadisələrin inkişafına mənfi tərəfdən baxmaq istəmirik. Az inkişaf etmiş ölkələr və terrora qarşı mübarizə məsələləri gündəliyimizdə olmalıdır. Danışıqdan əməkdaşlığa keçməliyik.
Təəssüf ki, hazırda ən böyük problem bir çox ölkələrdə terror qruplaşmalarının rahatlıqla fəaliyyət göstərməsidir. Bu gün İŞİD-ə qarşı mübarizə edir deyə terrorçu PKK və onun Suriyadakı qollarından biri YPG-yə silah vermək böyük xətadır. Dostlarımızın belə faciəli xəta etməsini istəmirik. Hansı terror qruplaşması olursa-olsun, hamısına qarşı birlikdə mübarizə aparmalıyıq. İŞİD təkcə hava əməliyyatları ilə yox edilə bilməz. Bunu əvvəldən də söyləyirdik". Xatırladaq ki, PKK və onun Suriydakı qolunu silahla təchiz edən əsas ölkə ABŞ-dır. Türkiyənin çağırışlarına baxmayaraq, ABŞ hələ də burada PKK-nı silahla təchiz etməklə məşğuldur. Almaniya və bəzi Avropa ölkələrində isə PKK sərbəst fəaliyyət göstərir. Amma Qərbin PKK üzərindən Türkiyəyə qarşı oyunları təkcə bununla bitmir. Türkiyənin "Yeni Şafak" qəzeti yazır ki, məhz kürdlər vasitəsilə Qərb tərəfindən Suriyada Türkiyəyə qarşı "şeytan üçbucağı" yaradılır. Buna səbəb isə Türkiyənin Suriyada uğurla həyata keçirdiyi və bölgədə onu əsas söz sahiblərindən birinə çevirən "Fərat qalxanı" əməliyyatıdır. Bu əməliyyat Suriyada Türkiyəyə xeyli ərazini nəzarət altına almağa imkan verib. "Yeni Şafak" qəzeti yazır ki, hazırda "Fərat qalxanı" əməliyyatının əsas hədəfi Əl-Bab şəhərinin azad olunmasıdır. Buna səbəb PKK terror təşkilatının Suriya qolu olan PYD-nin silahlı qanadı YPG-nin Əl-Baba yaxınlaşması olub. Əməliyyata start verən müxalif Azad Suriya Ordusu Hazvan, Süsyan, Aldana, Kıyran, Uglan və Avlan kəndlərini İŞİD-dən alıb. Azad Suriya Ordusunun birlikləri hazırda Əl-Bab şəhərinin yaxınlığındadır. Qeyd edək ki, Əl-Bab İŞİD terror təşkilatının Suriyada Rakka şəhərindən sonra əsas ikinci mərkəzidir.
Amma müəyyən qüvvələr Türkiyəyə bağlı güclərin Əl-Babı ələ keçirməsində heç də maraqlı deyil. "Yeni Şafak" qəzeti yazır ki, bu fonda Əl-Babın çevrəsində, İŞİD-lə yanaşı, PYD, Əsəd gücləri, "Hizbullah", şiə yaraqlılar, İran və Amerika da var: "Bütün güclərin ortaq hədəfi "Fərat qalxanı" əməliyyatını Əl-Babda darmadağın etmək və terror dəhlizini (kürd dəhlizi) Əl-Babın cənubunda həyata keçirməkdir". Bölgədəki mənbələrin məlumatına görə, sosial mediada fotolar paylaşaraq Münbiçdən çəkildiyini elan edən PYD, Fəratın şərqinə keçmək əvəzinə, Münbiçin cənubuna enir: "PYD ünsürləri Afrin kantonuna doğru irəliləməyin yollarını axtarırlar. Azad Suriya Ordusunun fəaliyyətindən sonra PYD-nin Afrin kantonuna gedən yolu bağlanıb. Buna görə də onlar Əl-Babın cənubuna keçərək, Kobani kantonu ilə birləşmək istəyirlər. PYD-nin bir qismi isə Münbiçin cənubuna çəkilərək Əsədin nəzarətindəki Ayn Əl Baydaya çatmağı və oradan Afrin kontonuna birləşməyi planlaşdırır". Bəşər Əsədin də Türkiyə ilə üz-üzə gəlmək istəmədiyi üçün PYD-ni dəstəklədiyi deyilir: "Bütün bu proseslərə İran və Amerika da dəstək verir".
Qeyd edək ki, "kürd dəhlizi"nin Türkiyənin cənubunda, Suriyanın şimalında yaradılması planlaşdırılır. Bu, Şimali İraq Kürd Muxtariyyətindən başlayaraq Aralıq dənizinə qədər zolağa kürdlərin nəzarət etməsi deməkdir. Əslində, Amerika bu dəhlizi yaradaraq kürdlərin əli ilə bölgəyə nəzarət etməyi planlaşdırır. Burada əsas hədəf isə, aydındır ki, Türkiyədir. Amma "Fərat qalxanı" əməliyyatı Türkiyəyə qarşı qurulan planları əngəlləyir. Elə bu səbəbdən indi əsas hədəf "Fərat qalxanı" əməliyyatının uğursuzluğa düçar olmasını təmin etməkdir. Bunun üçün isə kürd kartından istifadə yenə əsas planda yer alır. Planın əsas hissəsi isə Əl-Babda həyata keçirilməlidir. Bu şəhər strateji mövqeyi ilə seçilir. PKK-nın Suriya qolu bu şəhəri ələ keçirərək Suriyada elan etdiyi kürd kantonları birləşdirməyə çalışır. Bu kantonlar, qeyd olunduğu kimi, Türkiyə sərhədində yerləşir. Türkiyə bəyan edib ki, sərhədində terror qurşağının yaranmasına yol verməyəcək. Türkiyə prezidenti Rəcəb Tayyib Ərdoğan dəfələrlə bildirib ki, Əl-Babın PYD-nin nəzarətinə keçməsinə imkan verilməyəcək. Bu fonda gözlənir ki, Əl-Bab uğurunda döyüşlər daha şiddətli xarakter alsın. Türkiyənin bu fonda bölgəyə əlavə hərbi qüvvələr yeritməsi də tamamilə gözləniləndir.
Tahir TAĞIYEV
