Antiterror mübarizəsi çərçivəsində Türkiyədə PKK təşkilatına qarşı əməliyyatlar genişlənir. Burada PKK-ya hərbi zərbələr endirilməsi ilə yanaşı, qurumun siyasi müstəvidə də zərərsizləşdirilməsi istiqamətində əməli addımlar atılır.
Artıq bəlli olduğu kimi, sözügedən terror təşkilatının siyasi qanadı sayılan Xalqların Demokratik Partiyasının (HDP) həmsədrləri Səlahəddin Dəmirtaş və Figen Yüksəkdağ Diyarbəkir sülh və cəza məhkəməsinin qərarı ilə həbs olunub. Rəsmi məlumata görə, HDP həmsədrləri də daxil olmaqla, haqqında cinayət işi açılan 11 deputat terrorçuluğu dəstəkləmək, terror aktlarının törədilməsində iştirak, ölkəni parçalamağa cəhd, terror təşkilatlarına üzv olmaq kimi ağır ittihamlarla təqsirləndirilib. Səlahəddin Dəmirtaşın ilk məhkəmə iclası da keçirilib. Adana 2-ci Ağır Cəza Məhkəməsindəki iclasda Dəmirtaşı müdafiə etmək üçün bir neçə vəkil iştirak edib. Prokuror isə Dəmirtaşa 5 il həbs cəzasının verilməsini tələb edib. PKK-ya bağlı siyasi müstəvidə fəaliyyət göstərən digər şəxslərin də neytrallaşdırılması istiqamətində əməli addımlar atılır. Eyni zamanda türk hərbçiləri PKK terrorçularının fiziki məhvi istiqamətində də əməliyyatları genişləndirir. Bu fonda Türkiyə Hərbi Hava Qüvvələri PKK terror təşkilatı ilə mübarizə çərçivəsində İraqın şimalında və Suriyada silahlı qrupa hava zərbələri endirməkdə davam edir. Həmçinin quru əməliyyatları ilə də PKK terrorçularının zərərsizləşdirilməsi xüsusi diqqət mərkəzindədir. Belə vəziyyətdə PKK-çılar yenə əsas çarəni qaçmaqda görür. PKK-nın üz tutduğu əsas məkanlardan biri isə Ermənistandır. İndi həm Ermənistan ərazisində, həm də onun işğal altında saxladığı Azərbaycan ərazilərində PKK-çıların məskunlaşdırılması davam edir. Əsilsiz Erməni İddiaları ilə Mübarizə Dərnəyinin (ASİMDER) rəhbəri Göksal Gülbey yenidən bu məsələyə nəzər salaraq bildirir ki, Ermənistanın işğal etdiyi Azərbaycanın Qarabağ bölgəsində PKK düşərgələri qurulub: "Həmçinin, Türkiyədə terror törədilməsi üçün hazırlanan partlayıcılarda istifadə olunan ammonyak nitrat maddəsi də PKK-ya Ermənistandan çatdırılır". Onun sözlərinə görə, Ermənistan rəsmiləri, xüsusilə Diaspor Nazirliyi Avropa və Türkiyədə PKK və digər terror təşkilatları ilə gizli əməkdaşlıq edir: "Ermənistan PKK-ya logistik dəstək verir. Bu dəstək silah, təlim və Avropa ölkələrinə viza alınması şəklindədir. Avropadakı erməni səfirlər vasitəsilə hazırda gəmilərlə Mersin limanına gələn ammonyak nitrat kimyəvi maddəsi Ermənistan nömrəli TIR-lara yüklənir. TIR-ların tranzit keçidi olduğu üçün türk gömrükçüləri və polisləri araşdırma apara bilmir. Bu maddələr Gürcüstan, yaxud İran üzərindən Ermənistana daşınır. Orada həmin maddələr PKK-ya verilir. PKK da Türkiyədə terror aktlarını törətmək üçün bu maddələrdən partlayıcılar düzəldir". Hazırda PKK-nın Ermənistana və Qarabağa axınının davam etməsi isə burada vəziyyəti daha da gərginləşdirir. Digər tərəfdən, qeyd olunduğu kimi, ermənilər PKK üzvlərinin Avropaya, o cümlədən Almaniyaya axını üçün də zəruri dəstək verirlər. Yeri gəlmişkən qeyd edək ki, Ermənistanla yanaşı, hazırda PKK-ya Almaniya təərfindən də müəyyən dəstək müşahidə olunmaqdadır. Türkiyənin xarici işlər naziri Mövlud Çavuşoğlu da bildirib ki, Türkiyə ərazisində fəaliyyət göstərən terrorçulara ən çox Almaniya dəstək verir: "Təəssüf ki, Almaniya Türkiyə tərəfdə deyil. Bu ölkə davamlı olaraq anti-Türkiyə mövqeyində olanları qəbul edir. Biz onlardan terrorçu PKK qruplaşmasının Almaniyadakı 4 min üzvünü istədik. Onlar birini də vermədi. PKK Almaniyanın hər şəhərində Türkiyədə terrorçu fəaliyyətlə məşğul olanlara pul toplayır". Bu günlərdə prezident Rəcəb Tayyib Ərdoğan da bu məsələyə görə Almaniyanı sərt tənqid edib: "Almaniya işini etibarlı görmür. Terror bumeranq kimi dönüb bir gün Almaniyanı da vuracaq. Terrorçuların etdiklərini və onlara verilən dəstəyi görürük. Bir tərəfdən terror qruplaşmasının nümayəndələrinə dözümlə yanaşacaqsınız, digər tərəfdən də terrora qarşı mübarizəni dəstəklədiyinizi deyəcəksiniz. Elə iş olmaz. Bir tərəfdən PKK-ya terrorçu deyirsiniz, digər tərəfdən dolayı, ya birbaşa dəstək verirsiniz. Bu necə dostluq, necə dürüstlükdür? Biz, belə bəyanatlardan çox, terrora qarşı mübarizədə əməli fəaliyyətə üstünlük veririk". Beləliklə, PKK-ya hələ də xaricdən böyük dəstək var və bölgə dövlətləri sırasında Ermənistan bu xüsusda daha çox seçilir. Bu isə Ermənistana qarşı terror dəstəyinə görə daha sərt addımların atılmasını zərurətə çevirir.
Nahid SALAYEV
