Yaxın Şərqdə Türkiyənin güclənmək niyyəti və buradan gələn təhlükələrin önlənməsi məqsədilə hərbi əməliyyatlara start verməsi Qərb ölkələrində heç də birmənalı qarşılanmır. Xüsusən də bu vaxta qədər kürdlərə dəstək verən qüvvələr Ankaranın fəaliyyətindən ciddi narahatlıq duyur.
Çünki belə vəziyyətdə Yaxın Şərqdə kürd kartı üzərindən maraqlarını həyata keçirmək istəyənlər niyyətlərinə çatmayacaq. Türkiyə isə, bütün təpkilərə rəğmən, ilk növbədə təhlükəsizliyi məqsədilə Yaxın Şərqdə hərbi fəaliyyətini genişləndirir.
Belə bir vaxtda Türkiyə ordusunun dəstəyi ilə Suriyada həyata keçirilən "Fərat qalxanı" əməliyyatının növbəti mərhələsi başlayıb. Türkiyə ordusunun "Fərat qalxanı" əməliyyatı çərçivəsində dəstəklədiyi müxalif Azad Suriya Ordusu Əl-Bab şəhərinin İŞİD terror təşkilatından azad edilməsi əməliyyatına start verib. Buna səbəb PKK terror təşkilatının Suriya qolu olan PYD-nin silahlı qanadı YPG-nin Əl-Baba yaxınlaşması olub. Əməliyyata start verən müxalif Azad Suriya Ordusu Hazvan, Süsyan, Aldana, Kıyran, Uglan və Avlan kəndlərini İŞİD-dən alıb. Azad Suriya Ordusunun birlikləri hazırda Əl-Bab şəhərinin 2 kilometr yaxınlığındadır. Bu vəziyyət isə, indiki ABŞ hakimiyyəti başda olmaqla, bir sıra ölkələri ciddi narahat edir. Eyni zamanda, bu xüsusda ABŞ-ın Türkiyəyə verdiyi vədlərə əməl etmədiyi də özünü qabarıq surətdə göstərir. Belə ki, ABŞ həm PKK-ya bağlı qüvvələrin Münbiçdən çəkilməsini təmin etməyib, həm də kürdlərin Türkiyədən əvvəl Əl-Bab şəhərini tutmasını istəyir. Türkiyənin "Hürriyet" qəzeti də yazır ki, ABŞ rəhbərliyinin "YPG Münbiçdən çəkiləcək" bəyanatları həqiqəti əks etdirmir. Qəzet yazır ki, PKK terror təşkilatının Suriya qolu olan PYD-nin silahlı qanadı YPG də Münbiçin qərbindəki səkkiz kəndi İŞİD-dən alaraq strateji Əl-Baba doğru həm şərq, həm də qərb istiqamətindən irəliləyir. Beləliklə, Fərat çayının qərbindəki Afrin və Münbiçi birləşdirməyi planlaşdıran təşkilat iki bölgə arasında körpü rolunu oynayan Əl-Babın 9,8 kilometrliyinə yaxınlaşıb. Eyni zamanda, Dəməşq rejimi də Əl-Babı ələ keçirməyi planlaşdırır. Məhz bu səbəbdən Türkiyə qırıcılarının Suriyanın şimalında hava əməliyyatları həyata keçirməsinə mane olur.
Türkiyənin "Star" nəşrinin yazdığına görə, Əl-Baba yaxınlaşan ASO-nun qarşısını almaq üçün İŞİD, PYD, "Hizbullah", Dəməşq və ABŞ ittifaq qurub. Dörd ildir Əl-Babın İŞİD-in əlində olmasına səsini çıxarmayan Bəşər Əsədin qüvvələri və "Hizbullah" döyüşçüləri Suriyanın qərbi və cənubundan, ABŞ-ın rəhbərlik etdiyi 63 ölkədən ibarət koalisiyanın dəstəklədiyi PYD isə Suriyanın şərqi və şimal-şərqindən Əl-Baba doğru irəliləməyə başlayıb. Dəməşqdən verilən rəsmi açıqlamalarda bildirilir ki, Suriya ordusu və müttəfiqləri Türkiyəyə bağlı güclərin Əl-Baba hücum etməsinə icazə verməyəcək. ABŞ Müdafiə Nazirliyindən verilən açıqlamada da ASO-nun Əl-Bab əməliyyatına dəstək vermədiyi açıqlanıb. Məhz belə vəziyyətdə Türkiyənin narazılıqlara baxmayaraq hərbi əməliyyatlar aparması onun, kürdlərlə yanaşı, ABŞ-ın rəhbərlik etdiyi koalisiya gücləri ilə də toqquşmasına səbəb ola bilər. Türkiyə isə Əl-Babdan geri çəkilmək istəmir. Qeyd edək ki, Əl-Bab İŞİD terror təşkilatının Suriyada Rakka şəhərindən sonra əsas ikinci mərkəzidir. Əl-Bab strateji mövqeyi ilə seçilir. PKK-nın Suriya qolu olan PYD bu şəhəri ələ keçirərək Suriyada elan etdiyi kürd kantonları birləşdirməyə çalışır. Bu kantonlar Türkiyə sərhədində yerləşir. Türkiyə bəyan edib ki, sərhədində terror qurşağının yaranmasına yol verilməyəcək. Türkiyə prezidenti Rəcəb Tayyib Ərdoğan dəfələrlə bildirib ki, Əl-Babın PYD-nin nəzarətinə keçməsinə imkan verilməyəcək. Amma indiki vəziyyətdə Qərb ölkələri Türkiyənin bölgə siyasətinin həyata keçməsinə qarşı çıxır. Hesab olunur ki, ABŞ-da hakimiyyət dəyişikliyindən sonra bölgədə vəziyyət Türkiyənin istədiyi istiqamətdə dəyişə bilər. ABŞ prezidenti seçilən Donald Tramp "The Wall Street Journal" qəzetinə müsahibəsində bəyan edib ki, Yaxın Şərqdə fərqli siyasət yürüdəcək. Bildirib ki, ABŞ Suriyada Bəşər Əsədə qarşı yox, İŞİD-ə qarşı mübarizə aparacaq: "Bəzi insanlarla müqayisədə mənim Suriyadakı vəziyyətə bağlı mövqeyim fərqlidir. Suriya İŞİD-lə mübarizə aparır, biz də həmçinin. Hazırda Rusiya Suriya ilə sıx ittifaqdadır. Bizim Suriyaya yaxın olan İranla münasibətlərimiz normallaşıb. Biz Suriyada üsyançıları dəstəkləsək də, onlar barədə dürüst anlayışımız yoxdur. Əsədin hədəfdə olması isə Rusiya ilə qarşıdurmaya gətirib çıxara bilər".
Tahir TAĞIYEV
