Ramil Hüseynov: "Bəzi məsələlərdə tərəflər arasında razılığın əldə olunması mümkündür"
İki aydan sonra Donald Tramp Birləşmiş Ştatların 45-ci prezidenti kimi fəaliyyətə başlayacaq. Trampın qarşısında duran əsas vəzifələrdən biri kampaniya dövründə tərəfdarlarına verdiyi vədlərə əməl etmək və eyni zamanda uzun seçki kampaniyasından sonra bölünmüş ölkədə birliyə nail olmaq üçün balans tapmaqdan ibarətdir.
Trampın qarşıdan gələn həftələrdə kabinetinə yeni təyinatlar edəcəyi gözlənir. Onun təyinatları həm də yeni prezidentin siyasi kursunun necə olacağı ilə bağlı fikir yürütməyə imkan verəcək.
Bu arada yayılan məlumata görə, ABŞ-ın yeni seçilmiş prezidenti Donald Tramp andiçmədən sonra Rusiyaya gedəcək. Bu haqda Rusiyanın tanınmış "İzvestiya" nəşrinə ABŞ-ın Respublikaçılar Partiyasındakı yüksək vəzifəli mənbə bildirib. Mənbənin sözlərinə görə, Donald Tramp Rusiyanın Suriyada hava əməliyyatlarını yeniləməsi haqqında bilmirdi. "Hazırda Kreml və Trampın komandası arasında heç bir ciddi əlaqə yoxdur", - nəşrin həmsöhbəti bildirib.
Daha əvvəl Tramp və Vladimir Putin arasında telefon söhbəti olub. Tərəflər ölkələr arasında mövcud münasibətləri qeyri-kafi adlandırıb və münasibətlərin normallaşması üçün işləyəcəklərini bildirib.
Onu da qeyd edək ki, Rusiya prezidenti Vladimir Putin Trampı ilk təbrik edən prezidentlərdən olub. Demokrat Obamanın 8 illik prezidentliyi dövründə iki dövlət arasında dəfələrlə fikir ayrılıqları yaşanıb və bu da münasibətlərin gərginləşməsi ilə nəticələnib. Xüsusən də Ukraynada baş verən hadisələrdən sonra münasibətlər nəzərəçarpacaq dərəcədə pisləşib. Trampın seçki kampaniyası dövründə Rusiya ilə münasibətləri yoluna qoyacağını xüsusi bəyan etməsi bu baxımdan müəyyən marağa səbəb olub. Ona görə də Donald Trampın fəaliyyətə başladıqdan sonra Rusiyaya səfər etməsi nə dərəcədə realdır?
Məsələyə münasibət bildirən VİP-in sədr müavini Ramil Hüseynovun sözlərinə görə, indidən birmənalı fikir söyləmək çətindir: "Ona görə ki, tərəflər arasında mövcud olan fikir ayrılıqlarının yaxın dövrdə həlli real görünmür. Bəlkə də Tramp ilk səfərini Moskvaya etdi, amma bu o demək deyil ki, münasibətlərdə ciddi yaxınlaşma olacaq. Çünki heç kəs deyə bilməz ki, Rusiya Krımı və separatçıların əlində olan Donetski, Luqanskı Ukraynaya qaytaracaq. Münasibətlərin normal məcraya düşməsi üçün bu məsələdə razılıq olmalıdır. İndiki situasiyada Putinin hansısa ciddi güzəşt edəcəyi real deyil. Həmçinin, iki dövlətin Suriyada geosiyasi baxımdan toqquşması məsələnin kifayət qədər mürəkkəb olmasından xəbər verir. Hələ bilmək olmur Suriyada, o cümlədən İraqda baş verənlərin sonu necə olacaq... Birləşmiş Ştatların super dövlət olaraq öz maraqları var. Bu maraqları təkcə kimin prezident seçilməsi müəyyən etmir. Ona görə də bütün bunların həlli heç də asan görünmür. Ancaq bütün bunlara baxmayaraq, ABŞ-da yeni hakimiyyətlə Rusiya arasında danışıqların intensiv xarakter alacağı gözlənir. Bəzi məsələlərdə tərəflər arasında razılığın əldə olunması mümkündür".
Vidadi ORDAHALLI
