Parlament seçkilərinin başa çatmasından sonra tranzit əhəmiyyəti Azərbaycan üçün də mühüm olan qonşu Gürcüstanda proseslərin hansı istiqamətdə cərəyan edəcəyi və xarici siyasətdə hansı dəyişikliklər ola biləcəyi xüsusi maraq doğurur.
Xatırladaq ki, oktyabrın 8-də Gürcüstan parlamentinə və Acarıstan Muxtar Respublikasının Ali Sovetinə seçkilər keçirilib. Seçicilərin 50 faizdən çoxu seçkilərdə iştirak edib. Bununla da səsvermə baş tutmuş hesab olunub. Seçkilərdə ən çox səsi hakim "Gürcü arzusu" partiyası qazanıb.
Seçkilərin ilkin nəticələri elan ediləndən sonra baş nazir Georgi Kvirikaşvili və "Gürcü arzusu" koalisiyasının yaradıcısı, keçmiş baş nazir Bdzina İvanişvili tərəfdarları qarşısında çıxış edib. Saakaşvilinin partiyasının bir qrup tərəfdarı isə Mərkəzi Seçki Komissiyasının qarşısına toplaşıb. Binanın ətrafına xüsusi təyinatlılar yeridilib. Ancaq müxalifət nümayəndələrinin bir qrupunun MSK rəhbəri ilə keçirdiyi görüşdən sonra aksiyaçılar dağılışıb. "Vahid Milli Hərəkat" partiyası elan edib ki, seçkilər saxtalaşdırılıb və nəticələrini tanımayacaqlar. İlkin nəticələrin açıqlanmasından sonra "Vahid Milli Hərəkat" partiyasının rəhbərliyi məşvərətə toplaşıb və sonrakı addımları müzakirə edir. Partiyanın kütləvi etiraz aksiyalarına başlayacağı gözlənir. Seçki kampaniyası dövründə Saakaşvilinin partiyası olduqca izdihamlı mitinqlər keçirmişdi və partiyanın seçkilərdə qalib gələcəyinə dair əminlik formalaşmışdı. Saakaşvili isə elan etmişdi ki, nəticələr açıqlanan kimi Gürcüstana dönəcək. Lakin indi aydın görünür ki, Saakaşvilinin revanşı baş tutmur və onun partiyası seçki nəticələrinə qarşı küçələrə çıxsa, Gürcüstanı iğtişaşlar bürüyə bilər. Bəzi ekspertlər isə, Qərb bu aksiyalara dəstək verəcəyi təqdirdə, Gürcüstanda yeni rəngli inqilabı belə istisna etmir. Çünki Qərb indiki hakimiyyətin dəyişməsində maraqlı tərəf kimi çıxış edir. Buna səbəb Bdzina İvanişvilinin Rusiyanın adamı kimi tanınması və qarşıdakı dövrdə ölkəni yenidən Rusiyanın orbitinə qaytara biləcəyidir.
Qeyd edək ki, seçici səslərinin hesablanmasından sonra məlum olub ki, paralamentə "Gürcü arzusu", "Vahid Milli Hərəkat" partiyası və "Gürcüstan vətənpərvərləri alyansı" düşəcək. Sonuncu Gürcüstan parlamentində üçüncü siyasi qüvvə kimi təmsil olunacaq. Çünki "Gürcüstan vətənpərvərləri alyansı" parlamentə keçid üçün lazım olan 5% səsi toplayıb. Son nəticələrə görə, "Azad Demokratlar", Leyboristlər Partiyası, Respublikaçılar Partiyası isə 5%-lik baryeri aşa bilməyib. "Gürcü arzusu" səslərin 50 faizinə yaxınını, "Vahid Milli Hərəkat" 28 faizini toplaya bilib. Qeyd edək ki, Gürcüstan parlamentinə 150 deputatın 77-si partiya siyahısı üzrə (proporsional), 73-ü birmandatlı dairələrdən (majoritar) seçilməlidir. 73 birmandatlı dairədə deputat mandatı uğrunda 816 nəfər mübarizə aparır. Birmandatlı dairələrdə deputat seçilmək üçün birinci turda namizədlərdən birinin 50 faiz+1 səs toplaması tələb olunur. MSK bundan öncə birmandatlı dairələrin əksəriyyətində seçkilərin ikinci turunun keçirilməsinin gözlənildiyini açıqlayıb. Elə nəticələr də birmandatlı dairələrin əksəriyyətində seçkilərin ikinci turunun keçirilməsinin qaçılmaz olduğunu göstərir. Amma "Vahid Milli Hərəkat" partiyasının seçkilərin nəticələri ilə bağlı mövqeyi, yuxarıda qeyd olunduğu kimi, fərqli vəziyyət yarada və ölkədə yeni qarşıdurmaların başlamasına səbəb ola bilər. Belə vəziyyət mütləq mənada Gürcüstanın xarici siyasətinə təsir edə bilər. Amma əksər ekspertlər bu fikirdədir ki, Gürcüstanda kimin hakimiyyətdə olmasından asılı olmayaraq, Azərbaycanla münasibətlərdə dəyişiklik baş verməyəcək.
Gürcüstanın Strateji və Beynəlxalq Tədqiqatlar Fondunun baş elmi əməkdaşı Georgi Badridze də bildirir ki, ölkəsində seçkilərin nəticələri Azərbaycanla münasibətlərə təsir etməyəcək. O, mətbuata açıqlamasında bildirib ki, iki ölkə arasında qarşılıqlı münasibətlər həyati maraqlara əsaslanıb, onlar tamamilə üst-üstə düşür və bir-biri ilə əlaqəlidir: "Gürcüstanda kimin qalib gəlməsinə baxmayaraq, yeni hökumət Azərbaycanın etibarlı tərəfdaşı və dostu olaraq qalacaq". Ekspert, həmçinin, Gürcüstan-Rusiya münasibətlərinin perspektivlərinə də münasibət bildirib: "Rusiya öz xalqının rifahını qurmaq əvəzinə Sovet İttifaqı üçün nostalji hisslər keçirir. Belə olduğu halda Gürcüstan-Rusiya münasibətlərində problem qalacaq. Bununla yanaşı, Rusiya Gürcüstanın 20 faiz ərazisini işğal altında saxlayır. Mən həmişə demişəm ki, Rusiya separatçıları dəstəkləmək, Gürcüstan, Ukrayna və hətta Azərbaycanın müstəqilliyinə xələl gətirmək əvəzinə öz gücünü normal münasibətlərə yönəltsəydi, heç kim başqa tərəfə keçmək istəməzdi".
Nahid SALAYEV
