Rusiya ilə Ukrayna arasında münaqişənin şiddətləndiyi bir vaxtda Vyanada Rusiya ilə gizli görüşün keçirildiyi ortaya çıxıb.
“Bloomberg”in yüksək səviyyəli mənbələrə istinadən verdiyi məlumata görə, Britaniya, Fransa, Almaniya və Rusiyanın keçmiş yüksək vəzifəli şəxsləri iyul ayında Vyanada Moskva ilə Kiyev arasında müharibəyə son qoymaq üçün mümkün sülh danışıqlarının şərtlərini müzakirə etmək üçün bir araya gəliblər.
Mənbələrin verdiyi məlumata görə, görüşdə Britaniya milli təhlükəsizlik müşaviri Tim Barrou, keçmiş Almaniya dövlət katibi Markus Ederer və veteran fransız diplomatı Pyer Vimont iştirak edib. Ancaq görüşdə iştirak edən Rusiya nümayəndəsinin adı açıqlanmır. Sadəcə onun keçmiş Kreml rəsmisi olduğu bildirilir.
Bütün bunlar bir daha təsdiqləyir ki, tərəflər arasında gərginliyə baxmayaraq, pərdəarxası səylər də davam etdirilir.
Qeyd edək ki, bir müddət əvvəl də Almaniya və Rusiya nümayəndələrinin Bakıda gizli görüşdüyü ortaya çıxıb. Məsələ Azərbaycan Prezidenti İlham Əliyev Berlinə səfəri zamanı da gündəmə gəlib. Prezidenti İlham Əliyevlə kansler Mertsin birgə mətbuat konfransında bununla bağlı kanslerə sual ünvanlanıb. Lakin kansler Merts bu cür təmaslardan tamamilə xəbərsiz olduğunu bildirib. Lakin Mertsdən dərhal sonra çıxış edən Azərbaycan lideri Əliyev Almaniya kanslerinin iddialarını təkzib edərək, Bakının əlində olan rəsmi dövlət məlumatlarını açıqlayıb.
“…Bu məlumatı biz “The Times” qəzetindən öyrəndik. Bizim bundan xəbərimiz yox idi. Təbii ki, belə mötəbər mətbu orqanda çıxan məqaləyə biz diqqətlə yanaşaraq araşdırma aparmışıq və dünən mən Berlinə gəlməzdən öncə Azərbaycan Dövlət Sərhəd Xidmətindən məlumat istəmişəm ki, “The Times” qəzetində adları keçən şəxslər Azərbaycanda bir vaxtda olublar, yoxsa yox. Sizə onu deyə bilərəm ki, bu məlumat təsdiqləndi. İyulun 12-də Berlin-Bakı reysi ilə iki nəfər tanınmış şəxs, - birinin xanım Merkelin administrasiyasının rəhbəri olduğu haqqında məlumat var, - cənab Pofala və cənab Platsik Bakıya gəlmişdilər və iyulun 14-də Bakıdan Berlinə geri qayıtmışdılar. Eyni zamanda, ayın 12-də Rusiyanın keçmiş Baş naziri cənab Zubkov və Rusiya Prezidenti yanında Vətəndaş Cəmiyyəti Şurasının rəhbəri cənab Fadeyev Moskvadan Bakıya gəlmişdilər və biri ayın 13-də, o biri isə ayın 14-də Bakıdan ayrılmışdılar. Bizə bu barədə nə Almaniyadan, nə Rusiyadan hər hansı bir xəbər daxil olmamışdı. Yəni sadəcə olaraq, bizim ərazimiz bizdən xəbərsiz istifadə edilmişdir. Belə bir görüşün olub-olmaması ilə bağlı da mən konkret bir şey deyə bilmərəm. Çünki biz bunu görməmişik. Amma dediyim bu uçuş statistikası deməyə əsas verir ki, belə bir gizli görüş Bakıda keçirilmişdir. Əgər bu görüş Ukrayna-Rusiya müharibəsini sonlandıracaqsa, əlbəttə ki, biz bunu alqışlayırıq” – deyə Prezident İlham Əliyev bildirib.
Tahir TAĞIYEV
