Ceyhun Məmmədov: “Ermənistan çalışmalıdır ki, ən qısa vaxtda bu prosesi yekunlaşdırsın”
Azərbaycan Prezidentinin köməkçisi və Prezident Administrasiyasının Xarici siyasət şöbəsinin müdiri Hikmət Hacıyev bildirib ki, Azərbaycan və Türkiyəyə qarşı ərazi iddialarını nəzərdə tutan maddə Ermənistan Konstitusiyasından çıxarılmalıdır.
H.Hacıyev bildirib ki, daxil olan siqnallar Ermənistanda yeni konstitusiyanın qəbul edilməsi prosesinin başladığını göstərir.
“Bu ərazi iddiaları konstitusiyadan çıxarıldıqdan sonra Azərbaycan yekun sülh müqaviləsinin imzalanmasında heç bir problem görmür. Üstəlik, regionumuzda artıq faktiki olaraq dinc vəziyyət mövcuddur", - deyə Hacıyev bildirib.
Bu proses Ermənistanda təxminən nə vaxt yekunlaşa bilər? Yeni Konstitusiyanın qəbul olunması prosesi ilin sonuna qədər mümkün ola bilərmi?
Millət vəkili Ceyhun Məmmədov baki-xeber.com-a bildirdi ki, bu gün Azərbaycan və Ermənistan arasında münasibətlərin normallaşması prosesi gedir. “Azərbaycanın bəzi tələbləri var ki, o tələblər Ermənistan tərəfindən yerinə yetirilməli və icra olunmalıdır. Azərbaycan Ermənistan tərəfə dəfələrlə öz mövqeyini çatdırıb. Ermənistanda Konstitutsiya ilə bağlı proseslərin başlaması çoxdan idi ki, gözlənilirdi. Azərbaycan tərəfin sülh prosesində əsas şərtlərindən biri də məhz bu məsələdir. O mənada bu gün biz getdikcə münasibətlərin daha da normallaşdığını görürük. Ermənistan da artıq bir müddətdir Konstitutsiya üzərində işləyir. Ermənistan çalışmalıdır ki, ən qısa vaxtda bu prosesi yekunlaşdırsın”.
C.Məmmədov qeyd etdi ki, çünki sülh prosesi, sülh prosesinin davam etməsi, irəliyə getməsi sırf Ermənistanın bu məsələni həll etməsindən aslıdır. “Düşünürəm ki, ilin sonuna qədər bu prosesin yekunlaşdırılmasına ehtiyac var. Proses yekunlaşdırılmalıdır, proses gecikdirilməməlidir. Hər halda Ermənistan bunu anlayır. Yəni Konstitusiya dəyişikliyinin ardınca isə digər proseslərin icrasına başlanmalıdır. Hesab edirəm ki, o mənada biz ilin sonuna yekun sülh müqaviləsinin imzalanmasının şahidi ola bilərik. Fikrimcə, Ermənistan da bunun üçün çalışmalıdır, bu istiqamətdə addımlar atmalıdır ki, sülh müqaviləsi imzalansın və iki ölkə arasında sülh və ehtimad bərpa olunsun”-deyə C.Məmmədov vurğuladı.
İradə SARIYEVA
