Arzuxan Əlizadə: “Ola bilər ki, ortada danışılmış oyun var və Simonyan Paşinyandan sonrakı dövrə hazırlaşır”
Məlum olduğu kimi, Ruben Rubinyan doqquzuncu çağırış Ermənistan parlamentinin sədri seçilib. Onun lehinə 64 deputat səs verib. Rubinyanın parlamentin spikeri postuna namizədliyini hakim "Vətəndaş müqaviləsi" partiyası irəli sürüb. Rubinyan əvvəlki çağırış parlamentdə vitse-spiker vəzifəsini tuturdu.
Parlamentinin sədri seçilən Rubinyan artıq dörd nəfəri vəzifəyə təyin edib. Konkret olaraq, o, Elina İşxanyan və Lusine Bekçyanı köməkçiləri, Qreta Zorunts və Arman Barxudaryanı isə müşavirləri təyin edib. Qeyd edək ki, parlamentin keçmiş sədri Alen Simonyanın köməkçiləri və müşavirləri də onunla birlikdə istefa veriblər.
Maraqlıdır, Paşinyan bu kadr dəyişiklikləri ilə nə strategiya güdür? Simonyanı şübhəli şəkildə istefaya göndərdi, Rubeni spiker qoydu. Üstəlik, Simonyanın komandası da onunla getdi. Ola bilərmi ki, Paşinyan Simonyanın üstündə gələcək ssenariləri qurur?
Sözügedən məsələni baki-xeber.com-a şərh edən AMİP sədri, millət vəkili Arzuxan Əlizadənin fikrincə, Paşinyanın bunda bir neçə məqsədi ola bilər: “Əvvəla, Simonyanın istefası gözlənilməz oldu. Ona görə ki, Simonyan Paşinyan komandasının ən fəal personalarından biri idi. Paşinyanın seçki kampaniyasına çox ciddi dəstək verirdi, son günə qədər təbliğat prosesində iştirak etdi. Simonyan Rusiyaya qarşı ən çox tənqidi mövqedən çıxış edən persona idi. Bir sıra hallarda Rusiyanın ünvanına Paşinyanın demədiyi tənqidi fikirləri, Simonyan bir növ deyirdi. Üstəlik, Simonyan parlamentdə Rusiyapərəst müxalifətə qarşı daha sərt tənqidi ritorika ilə çıxış edirdi, onların müstəqil olmadığını açıq deyirdi. O baxımdan, Simonyanın seçkilərdən sonra şübhəli formada siyasi səhnədən getməsi və hətta mandatından imtina etməsi müəyyən suallar doğurur. Ona gör ki, Simonyan siyasi səhnədən gedəndən sonra hakimiyyətə qarşı hansısa tənqidi fikirlərlə çıxış etmir. Sanki kölgəyə çəkilib. Ola bilər ki, ortada danışılmış oyun var və Simonyan Paşinyandan sonrakı dövrə hazırlaşır. Yəni müəyyən mərhələdən sonra Simonyan baş nazir olsun. Hər şey ola bilər. Ən azından ona görə ki, Simonyan Paşinyanın komandasında sıradan bir fiqur deyildi. Bütün bunların Qərblə razılaşdırılmış formada həyata keçirilməsi də mümkün ssenarilərdən biri ola bilər. Bu, alınacaqmı? İndidən bunu demək çətindir və bütün bunlar geosiyasi proseslərdən, Ermənistandakı siyasi vəziyyətin gedişindən asılı olacaq”.
Vidadi ORDAHALLI
