Ramil Məmmədli: “Bunun başlıca səbəbi beynəlxalq hüququn, BMT-nin böhranlı bir vəziyyətdə olması ilə əlaqədardır”
Birləşmiş Ştatlar Prezidenti Donald Tramp növbəti dəfə özünün “Truth” sosial media hesabında üzərində Venesuelanın xəritəsi və "51-ci ştat" yazısı olan şəkil paylaşıb. Həmin şəkildə Bolivar Respublikasının ərazisi ABŞ-ın bayrağının rəngləri ilə rənglənib.
Qeyd edək ki, Donald Tramp əvvəllər də oxşar şəkillər paylaşıb. O, dəfələrlə Venesuela, Kanada və Danimarkanın muxtar ərazisi olan Qrenlandiyanın ABŞ-a birləşdirilməsi ehtimalını müzakirə edib. Bu il yanvarın 3-də ABŞ Venesueladakı mülki və hərbi hədəflərə hücum edib, Prezident Nikolas Maduro və onun həyat yoldaşı Siliya Flores tutularaq ABŞ-a aparılıblar.
Əlbəttə ki, Trampın Venesuela ilə bağlı yanaşması beynalxalq hüquqa, bir dövlətin suverenliyinə zidd yanaşmadır. Bu, müstəqil dövlət olan, BMT üzvü olan Venesuelaya hörmətsizlikdir. Bütün bunların fonunda Trampın Venesuelanı 51-ci ştat kimi göstərməsinə BMT niyə susdu, susmasına nə ad vermək olar?
Hərbi ekspert Ramil Məmmədli baki-xeber.com-a açıqlamasında Trampın Venesuela ilə bağlı açıqlamasına BMT-nin susqunluqla yanaşmasını bir sıra amillərlə əlaqələndirdi: “Bunun başlıca səbəbi beynəlxalq hüququn, BMT-nin böhranlı bir vəziyyətdə olması ilə əlaqədardır. Problem ondadır ki, bir neçə ildir beynəlxalq hüquq, BMT-nin müəyyən etdiyi prinsiplər işləmir. Kim güclüdürsə, öz bildiyini edir, digər dövlətlərin ərazisini ilhaq edir, bombalayır və s. BMT Təhlükəsizlik Şurasının 5 daimi üzvü bir-biri ilə rəqabətdədir, aralarında ciddi geosiyasi nüfuz müharibəsi gedir. Nəticədə BMT bu dövlətlərin əlində necə deyərlər, bir oyuncağa çevrilib. BMT TŞ-nin bir daimi üzvü Ukraynanın suverenliyini pozaraq ölkə ərazisinin 20 faizini işğal edib. Beş ilə yaxındır ki, qanlı müharibə aparır. Digər daimi üzvü Fransa beynəlxalq hüququ pozaraq uzun illər Qarabağ separatçılarına himayədarlıq edib. Ona görə də bütün bunlar BMT-ni gərəksiz bir quruma çevrilib. Uzun illər ABŞ BMT-nin əsas donoru olub. Tramp prezident olandan sonra ABŞ BMT-nin bir sıra orqanlarından çıxdı. Həmçinin ABŞ BMT-yə olan maliyyə borcunu ödəməkdən imtina edir. Bu gün Tramp dünyanın gözü qabağında Kubanı neft idxal etməkdən təcrid edib. Ölkə yanacaqsız, elektrik enerjisiz qalıb. Nəticədə Kuba əhalisinin sosial vəziyyəti dözülməz dərəcədə pisləşib. Bir beynəlxalq qurum, aparıcı dövlət buna etiraz etmir. Paradoksal məqam həm də odur ki, Venesuela xalqı da baş verənlərə etiraz etmir. Hansısa kütləvi mitinqlər keçirilmir, buna görə Trampa etiraz etmir. Problem həm də bundadır. ABŞ Venesuela prezidenti Maduronu hakimiyyətdən uzaqlaşdırdıqdan sonra faktiki olaraq bu ölkəyə nəzarət edir. Venesuelə neftinin hansı dövlətə satılmasını faktiki olaraq Vaşinqton müəyyən edir. Halbuki əvvəl Kubanı neftlə Venesuelə təmin edirdi. İndi isə ABŞ buna icazə vermir. Bütün bunlar bax belə paradoksal vəziyyətin yaranmasına gətirib çıxarıb”.
Vidadi ORDAHALLI
