"Corriere della Sera" qəzeti yazır ki, İtaliya Avropa İttifaqına Ermənistan da daxil olmaqla bir neçə ölkədə qanunsuz miqrantlar üçün repatriasiya mərkəzlərinin yaradılmasını təklif edəcək. Nəşrin məlumatına görə, İtaliyanın daxili işlər naziri Matteo Piantedosi tezliklə keçiriləcək Avropa Şurasının iclasında Avropa fondları tərəfindən maliyyələşdirilən və əsasən Afrikada yerləşən qanunsuz miqrantların repatriasiyası üçün yeni mərkəzlərin yaradılması təklifini təqdim edəcək.
Qəzetin məlumatına görə, təşəbbüsün həyata keçirilməsində iştirak edə biləcək ölkələrin ilkin siyahısına Ruanda, Qana, Seneqal, Tunis, Liviya, Mavritaniya, Misir, Uqanda, Özbəkistan, Ermənistan, Monteneqro və Efiopiya daxildir. Qeyd olunur ki, sənədsiz miqrantların repatriasiyası üçün yeni mərkəzlər "Albaniya modeli" çərçivəsində nəzərdə tutulanlara bənzər olacaq. 2023-cü ildə İtaliya və Albaniya Albaniyada miqrantlar üçün iki mərkəz yaratmaq barədə razılığa gəliblər. İtaliya hökumətinin təşəbbüsü ötən həftənin sonlarında 50 mindən çox insanın quru və dəniz yolu ilə İspaniyanın Seuta anklavında yaşanan miqrant böhranı fonunda təqdim olunacaq. Son məlumatlara görə, Mərakeşdən kütləvi sərhəd keçidi zamanı ölənlərin sayı ən azı 72 nəfərə çatıb.
Daha öncə "Politico" mənbələrə istinadən yazıb ki, Aİ ölkələri Özbəkistan və Ruandada miqrant mərkəzləri yaratmağı nəzərdən keçirir. Almaniya, Avstriya, Danimarka, Yunanıstan və Hollandiya Aİ-də sığınacaq axtaranlar tərəfindən rədd edilən miqrantlar üçün mərkəzlərin yaradılmasını müdafiə edir. Yunanıstanın Baş naziri Kiriakos Mitsotakis bildirib ki, Aİ "bu strukturların yaradılması ilə bağlı ilk razılaşmaları 2026-cı ildə bağlamağı və 2027-ci ildə fəaliyyətə başlamağı" hədəfləyir. Aİ-nin miqrant göndərmək istədiyi ölkələrin dəqiq siyahısı müəyyən edilməyib. Uqanda nəzərdən keçirilir, lakin Liviya və Misir Avropaya yaxın olduqları üçün siyahıdan çıxarılıb. Nəşrin mənbəyi aydınlaşdırıb ki, "qayıdış mərkəzləri"nin yaradılması Avropa İttifaqı rəhbərliyinin deyil, hər bir ölkənin məsuliyyəti olacaq.
Tahir TAĞIYEV
