Azər Həsrət: “Donald Trampın belə davranması təəccüblü deyil”
ABŞ-ın NATO-dakı səfiri Metyu Uitaker "Fox News"a açıqlamasında bildirib ki, Ukrayna və Avropa tərəfdaşları ilə "Patriot" tutucu sistemlərinin birgə istehsalı ilə bağlı danışıqlar davam edir, lakin bu qışdan əvvəl razılaşma əldə olunmayacaq.
Uitaker bildirib ki, Vaşinqton hazırda müdafiə sənayesi bazasını genişləndirmək üçün Ukrayna və Avropa tərəfdaşları ilə birlikdə "Patriot" hava hücumundan müdafiə tutucularının birgə istehsalını araşdırır.
O bildirib ki, "Sənaye bazamızı genişləndirmək və Ukraynanın və Avropanın müdafiəsini dəstəkləmək üçün ukraynalılar və avropalılarla birgə istehsal imkanları mövcuddur".
ABŞ-ın NATO-dakı səfirinin sözlərinə görə, bu cür razılaşmalar üzrə danışıqlar, xüsusən də Türkiyədə Ukrayna Prezidenti Volodimir Zelenski ilə görüşlərdən, sonradan Kiyevdə danışıqlardan və lazımi texnologiyalara malik şirkətlərlə əlaqələrdən sonra davam edir.
Eyni zamanda, ABŞ diplomatı vurğulayıb ki, qış mövsümü ilə əlaqədar olaraq Ukraynaya mümkün qədər tez hava hücumundan müdafiə vasitələri ilə təmin etmək əsas prioritetdir.
Qeyd edək ki, ABŞ Prezidenti Donald Tramp Ankarada keçirilən NATO sammiti çərçivəsində Ukrayna Prezidenti Volodimir Zelenski ilə görüşü zamanı bildirmişdi ki, ABŞ Ukraynaya "Patriot" zenit-raket komplekslərinin istehsalı üçün lisenziya verəcək.
ABŞ Prezidenti Donald Tramp və Ukrayna Prezidenti Volodimir Zelenski bir neçə gün əvvəl Ağ Evdə görüşərək "Patriot" sistemləri üçün raket tutucularının lisenziyalı istehsalını müzakirə ediblər. Liderlər həmçinin diplomatik proseslərin sürətləndirilməsi yollarını nəzərdən keçiriblər. "Patriot" zenit-raket kompleksləri üçün raketlərin Ukraynada lisenziya əsasında istehsal olunması əsas müzakirə mövzusu olub.
Tramp bir neçə gün əvvəl “Patriot”la bağlı Zelenskiyə söz verdi.
İndi niyə fikrindən yayınır?
Siyasi şərhçi Azər Həsrət baki-xeber.com-a “ Donald Trampın belə davranması təəccüblü deyil. Çünki birincisi, o, həmişə bir tərəfi göstərib digər tərəfdən vurur”-deyə bildirdi.
A.Həsrətin sözlərinə görə, ikinci bir tərəfdən də ümumiyyətlə bu anlaşmanın qışa qədər imzalana bilməyəcəyi haqqında deyilənlərin bir məntiqi əsası da var. “Çünki bu cür məsələlər elə bir anda olmur. Bunun üçün əlbəttə ki, ilkin bazanın yaradılması, ilkin sənədləşmə işlərinin aparılması, razılaşmalar, razılaşmaların ayrıntıları və s. məsələlər həll edilməlidir. Yəni bunlar da dövlət bürokratiyasıdır, vaxt aparacaq. O baxımdan mən düşünmürəm ki, nəticə etibarilə ABŞ bu məsələdə Ukraynanı qapı arxasında saxlayaq. Söz verilibsə, əməl ediləcək. Sadəcə biraz vaxt aparacaq. Bundan başqa da bilirsiniz ki, Donald Tramp çalışır ki, NATO ölkələri vasitəsilə Ukraynaya yardım etsin. Özü də bir dəfə açıqlamasında demişdi ki, biz Ukraynaya birbaşa yardım etmirik, amma Avropa ölkələrinin vasitəsilə bunu edirik. Sadəcə burada diqqət çəkən məqam odur ki, Amerika Birləşmiş Ştatları gərəkli malları, məhsulları, silahları, yaxud da onlar üçün lazım olan məhsulları Avropa ölkələrinə, NATO üzvü olan dövlətlərə pulla satır. Həmin ölkələr də onu pulla alıb Ukraynaya qarşılıqsız verirlər. Yəni burada Amerika Birləşmiş Ştatları heç nə itirmir”.
A.Həsrət qeyd etdi ki, ABŞ malını, məhsulunu, silahını satır, pulunu qazanır. “Yəni bu məsələdə də görünür, o həll edilməli məqamlar qalıb. Ona görə də bir qədər uzadılacaq. Amma bütün bunlara baxmayaraq Ukrayna onsuz da getdikcə qüvvətlənir, güclənir. Əlavə olaraq da yeni texnologiyalar hazırlayır. Yəni faktiki olaraq bu gün müharibə Ukraynanın içərisindən Rusiyanın içərilərinə doğru yayılmaqdadır. Biz hər gün Rusiyanın hansısa şəhərlərində, o cümlədən də Moskvada böyük böyük obyektlərin vurulduğunun şahidi oluruq. Ondan savayı, Rusiyanın çox böyük ərazilərində yanacaq, ərzaq qıtlığı var. Yəni faktiki olaraq Ukrayna Rusiyanı gətirib o bataqlığa elə saplayıb ki, Rusiya oradan çətin ki bir daha çıxa bilsin. Yəni müharibə bir qədər də uzansa, Rusiyanın vəziyyəti həddən artıq çətin olacaq. Üstəlik də Ukraynaya əlavə dəstək davam edəcək və nəticə etibarilə qazanan tərəf Ukrayna olacaq. Ona görə mən düşünürəm ki, Donald Trampın bu məsələdə bir qədər tələskənliyə yol verməməsi əslində işin xeyrinədir. İşin deyəndə Ukraynanın xeyrinədir. Yəni Ukrayna gücləndikcə Rusiya zəifləyir. Müharibə uzandıqca Rusiyanın zəifləməsi sürətlənir. Əlbəttə ki, buradan qazanan tərəf Ukraynadır və Ukrayna ilə birlikdə də dünyanın mütərəqqi kəsimidir”-deyə A.Həsrət qeyd etdi.
İradə SARIYEVA
