Tural İrfan: “Burada İsrailin İran əhalisinə təsiri də rol oynayır”
İsrailin Baş naziri Benyamin Netanyahu geosiyasi, hərbi və texnoloji məsələlərin geniş spektrini əhatə edən bir sıra siyasi bəyanatlar verib.
Benyamin Netanyahu vurğuladı ki, regionun geosiyasi xəritəsi kəskin şəkildə dəyişib: İsrailin bir sıra güclü hücumlarından sonra Yaxın Şərq və İranın özü artıq eyni deyil. Netanyahu qeyd edib ki, Tehranın son zamanlar hücum etməməsi İran rəhbərliyinin İsrailin cavabının gücünü bilməsi ilə bağlıdır. O, İsrailin çəkindirici potensialının birbaşa eskalasiyanın qarşısını almaq üçün əsas olduğunu iddia edib. Netanyahu həmçinin əlavə etdi ki, rejimlə sərt qarşıdurmaya baxmayaraq, İran əhalisinin böyük əksəriyyəti İsrailə heyranlıq və hörmətlə yanaşır.
Netanyahu deyir ki,İran əhalisi onlara hörmətlə yanaşır.
Doğurdanmı, İran xalqı İsrailə hörmətlə yanaşır? Bu fikrin əsası varmı?
Milli Cəbhə Partiyasının sədr müavini Tural İrfan baki-xeber.com-a bildirdi ki, İranın hazırki rejimi hakimiyyətini qorumaq üçün xalqa həddən artıq təziq göstərir. “İstənilən bəhanə ilə insanları günahsız edam edir. Özü də bu edamları dinlə bağlayır. İran hazırda nəinki təkcə İsrail və Yaxın Şərq üçün, ümumiyyətlə bütün dünya üçün təhlükə saçmağa başlayıb. Yaxın Şərq, Körfəz ölkələrini yer üzündən silməklə hədələyir. Nüvə silahı istehsal etməyə tələsməklə dünya üçün daha ağır nəticələrə gətirəcək addımlar atmağa cəhd edir. Belə olduqda İran əhalisi də çıxış yolları, xilas yolları axtarır. İş o yerə çatıb ki, hətta İsrailə belə heyranlıq və rəğbətlərini gizlətmirlər. İllər boyu yığılıb qalmış qəzəb və molla rejiminə nifrət hətta düşmənə belə heyranlıq yaradır. Çünki İran rejimi özünü yenilməz, ilahi hakimiyyət hesab edir. Məhz İsrailin belə bir zülmkar rejimə qarşı olması insanları bu duruma gətirib. Əgər birini canavar parçalayırsa fərq etmir ki, həmin vəhşidən onu xilas edən yaxşı adamdır, yaxud pis adam. Bu məntiqlə də İran xalqı Netanyahuya və İsrailə rəğbətlə, xilaskar gözü ilə baxırlar”.
T.İrfan qeyd etdi ki, hələ indi rejimin dəhşətli basqıları qarşısında tam ifadə edə bilmirlər, əgər rejim çöksə İran bayrağından əvvəl İsrail bayrağı qaldıracaqlar. “Rejim hətta xalqı ateist olmağa, dinə nifrət etməyə təhrik edib. Cinayətləri din, məzhəb adı törətdiyi üçün əhali rejimlə bərabər dinə də qarşıdır artıq. Sanki dindən, müqəddəslərdən də ikrah edirlər. Vaxtilə Təbriz inqilabının lideri Ayətullah Məhəmməd Kazım Şəriətmədari rejim qurulanda bəyan etmişdi ki, dini siyasətə, hakimiyyətə qatmaq olmaz. Çünki bir vaxt hakimiyyət səhv etsə camaat o səhvi rejimlə birgə dində görəcək. Yaxud hakimiyyət devrilsə din də aradan gedəcək. Lakin onu bu kimi azad fikirlərinə görə ABŞ agenti elan edib ev dustağı etdilər və öldürdülər. İsrail Qəzzada, Fələstində törətdiyi cinayətlərlə özü üçün dünyada qəddar obraz yaradıb. Amma iş o yerə çatıb ki, əhali iki zalım arasında seçim edərək Netanyahunu seçib. Təbii ki, burada İsrailin İran əhalisinə təsiri də rol oynayır. Dəfələrlə bəyan edib ki, onlara azadlıq istəyir. İranda artıq xalq o rejimə kim qarşıdırsa onu dost, xilaskar hesab edir. Nəticə olaraq belə demək olar ki, İran xalqını İsrailə rəğbət bəsləməyə rejimin öz qəddar siyasəti olub. Dövlətin bütün iqtisadi resurslarını, büdcəsini Yəmən, İraq, Livan və başqa yerlərdəki terror təşkilatlarına sərf edərək əhalinin sosial, iqtisadi durumunu arxa plana keçiriblər. Etiraz edənləri kütləviliklə qırdılar, qalanları da şərləyib edam etdilər. Ancaq İran əhalisinin İsrailə rəğbəti də emosional münasibətdir. Rejim o yerə çatdırıb ki, adamlar düşmənə belə sevgi bəsləyir. Amma Netanyahu İrana və xalqına heç zaman xoşbəxtlik gətirə bilməz. Çünki onun missiyası və həyat fəlsəfəsi, siyasəti regiona və dünyaya müharibə və bədbəxtlik gətirməkdən ibarətdir. Xalqın bu duruma gəlməsində molla rejimi günahkardır və məsuliyyət daşıyır”-deyə T.İrfan bildirdi.
İradə SARIYEVA
