Azərbaycan sürətlə öz hava qüvvələrini gücləndirir və bunu 4,2 milyard dollarlıq müqavilə çərçivəsində 40 qabaqcıl JF-17C Block III qırıcı təyyarəsinin alınması da təsdiqləyir. “Forbes” jurnalının məlumatına görə, bu, ölkə tarixində ən böyük döyüş təyyarəsi alışıdır.
Nəşrin yazır ki, köhnəlmiş MiQ-29-ları əvəz edəcək bu 4,5 nəsil təyyarələr Bakıya Cənubi Qafqazın ən güclü hərbi hava qüvvələrinə çevrilmək şansı verir. Bundan əlavə, Azərbaycan Çinin yeni HQ-9BE strateji hava hücumundan müdafiə sistemlərini nümayiş etdirərək, onları Rusiyanın S-300 və İsrailin Barak kimi mövcud arsenalına əlavə edib.
“Forbes” qeyd edir ki, 5 martda Naxçıvana dron hücumundan sonra milyardlarla dollarlıq investisiyalar qoyulub. İranla müharibənin başlamasından bəri Azərbaycan bir daha zərbə almayıb.
İyulun ortalarında Azərbaycan Hərbi Hava Qüvvələrinin yeni JF-17C qırıcıları Sovet Su-25ML hücum təyyarələri və Çexiya L-39 Albatros reaktiv təlim təyyarələri ilə birlikdə müxtəlif yüksəkliklərdə döyüş manevrləri həyata keçirib.
Bakı ilk JF-17-ni 2024-cü ilin sentyabr ayında alıb. 2025-ci ilin may ayının sonuna qədər sifariş 16-dan 40 təyyarəyə qədər artırılıb və müqavilənin ümumi dəyəri 1,6 milyard dollardan 4,2 milyard dollara qədər artaraq Pakistanın o dövrdəki ən böyük müdafiə ixrac müqaviləsi olub. JF-17 qırıcısı Pakistan və Çinin birgə hazırladığı təyyarədir.
“Forbes”ə görə, bu, Azərbaycanın köhnəlmiş MiQ-29 Fulcrum donanması ilə müqayisədə əhəmiyyətli bir yenilənmədir və çox güman ki, Azərbaycanı həm keyfiyyət, həm də kəmiyyət baxımından Cənubi Qafqazda ən güclü hava qüvvələrinə malik ölkəyə çevirəcək.
JF-17 tədarükünün təsdiqlənməsi, Çindən əldə etdiyi HQ-9BE strateji hava hücumundan müdafiə sistemlərinin ilk dəfə ictimaiyyətə nümayişindən sonra baş tutub və bu sistemlər 2025-ci ilin noyabr ayında ictimaiyyətə təqdim edilib.
Nəşrin məlumatına görə, JF-17C və HQ-9BE sistemlərinin alınması Azərbaycan Hərbi Hava Qüvvələrinin və hava hücumundan müdafiə sisteminin onilliklər ərzində ən böyük modernləşdirilməsidir.
“Forbes” xatırladır ki, MiQ-29 qırıcıları Azərbaycana SSRİ-dən miras qalmayıb. Bakı onları 2000-ci illərdə təhvil verilməzdən əvvəl təyyarəni modernləşdirən Ukraynadan ikinci əl şəkilində alıb. Stokholm Beynəlxalq Sülh Araşdırmaları İnstitutunun (SIPRI) məlumat bazasına görə, Azərbaycan bir neçə iki nəfərlik MiQ-29UB döyüş təlim təyyarəsi də daxil olmaqla 16 MiQ-29 alıb. Təhvillər 2011-ci ildə başa çatıb və Ukrayna ən azı 43 R-73R/T hava-hava raketi də təhvil verib.
Tahir TAĞIYEV
