Mübariz Göyüşlü: “Azərbaycana qarşı cinayətkar, separatçı fəaliyyəti olan insanla bağlı müraciət, çağrış nəticə verməyən bir məsələdir”
Hazırda Bakıda həbsdə olan separatçı və cinayətkar Ruben Vardanyanın ətrafında növbəti şou başladılıb. Xaricdəki havadarlarının süni ajeotaj cəhdləri azmış kimi indi də həyat yoldaşı Veronika Zonabend işə düşüb. O, Azərbaycan İnsan Hüquqları üzrə Müvəkkili Səbinə Əliyevaya müraciət edərək həbsxanasındakı ermənilərə baş çəkmək üçün beynəlxalq qadın humanitar nümayəndə heyətinin Bakıya səfərini təşkil etməsini xahiş edib.
Zonabend deyib ki, R.Vardanyan 2023-cü ilin sentyabrında həbs olunduğundan bəri ailəsi ilə şəxsən görüşə bilməyib.
Qeyd olunur ki, Vardanyanın arvadı iyulun 30-da Səbinə Əliyeva və Nikol Paşinyana “humanitar səfərin praktiki təşkili” ilə bağlı konkret təkliflərlə rəsmi məktublar göndərib.
Göründüyü kimi, Vardanyanın arvadı beynəlxlaq missiya ilə Azərbaycana gəlib separatçıları görmək iddiası doğrudan da bir şoudur. O, bununla cinayətkar ərinin “günahsız” olduğunu göstərmək, buna beynəlxalq aləmin diqqətini cəlb etmək niyyəti güdür.
"Müasir İnkişaf" İctimai Birliyinin sədri, Crossmedia.az saytının baş redaktoru, siyasi şərhçi Mübariz Göyüşlü baki-xeber.com-a bildirdi ki, Vardanyan istər həyat yoldaşı, istər yaxınları olsun, hamısı onun pulu ilə bəslənib. “Ermənistan daxilində də, xaricində onu dəstəkləyən qüvvələrin bütün bu cəhdləri bir nəticə verməyəcək. Vardanyanın arvadı da, başqaları da sadəcə ucuz şou düzəldirlər. Bu şou vasitəsilə də Azərbaycan hakimiyyətinə, Azərbaycanın ədalətli məhkəmə sisteminə təzyiq göstərməyə çalışırlar ki, Vardanyanı azadlığa buraxdıra bilsinlər. Azərbaycana qarşı cinayətkar, separatçı fəaliyyəti olan insanla bağlı müraciət, çağrış nəticə verməyən bir məsələdir. Bu adamın konkret olaraq Azərbaycan ərazi bütövlüyünə, suverenliyinə qarşı separatçı fəaliyyəti olub. Yəni separatizmlə ilə məşğul olub. Konkret ləğv olunmuş, tarixin arxivinə gömülmüş “Dağlıq Qarabağ Respublikasında” “dövlət naziri” vəzifə tutduğunu elan edib və bu birbaşa Azərbaycan dövlətinə, xalqına qarşı separatçılıq olub. Bu Azərbaycan dövlətinə və xalqına qarşı cinayətdir, dövlətimizin ərazi bütövlüyünə, suverenliyinə qəsddir. Belə bir fəaliyyətlə məşğul olan şəxsin müdafiəsi istiqamətində hansısa cəhdlərin edilməsi keçərli deyil.
Hansısa dəstə “beynəlxalq humanitar missiya” adı altında Bakıya gəlib onunla görüşmək və ətrafında növbəti şou yaratmaq niyyətindədir. Yəni bu “missiyanın” da məqsədinin çirkin olduğu gizlin deyil.
Azərbaycan dövlətinin rəhbərliyi, aidiyyəti hüquq-mühafizə sistemi var.
Yəni bunun mümkün olub olmamasına aidyyəti qurumlar baxacaqlar.
Amma mən bir siyasi şərhçi olaraq fikrim belədir ki, buna yol vermək olmaz və o görüşü təşkil etməyə ehtiyac yoxdur”.
M.Göyüşlünün fikrincə, Vardanyanın arvadının çağrışı qətiyyən nəzərə alınmalı deyil və Vardanyanın taleyindən onun kimi davranmaq istəyənlər dərs götürsünlər: “Bilsinlər ki, bir daha Azərbaycan dövlətinə, onun suverenliyə, ərazi bütövlüyünə qarşı qəsd etməyə qalxmasınlar və bunun nəticəsi daha ağır ola bilər”-deyə M.Göyüşlü qeyd etdi.
İradə SARIYEVA
