ABŞ və İsrail münaqişə başlayandan bəri İranın enerji obyektlərinə qarşı ən böyük bombardmanlardan birini həyata keçirməyi düşünürlər.
CBS News mənbələrinə görə, elektrik stansiyaları və neft emalı zavodları nəzərdən keçirilən potensial hədəflər arasındadır. ABŞ administrasiyası hücumların ABŞ və digər iqtisadiyyatlara təsir göstərə biləcəyi ilə bağlı narahatlıqlar səbəbindən qlobal maliyyə bazarları bazar ertəsi günü yenidən açılmadan əvvəl əməliyyatın yekunlaşdırılmasını müzakirə edir, lakin son tarix müəyyən edilməyib. Əməliyyatın bu həftə sonu keçirilməsi nəzərdə tutulur.
Amerika mənbələri bildirib ki, İsrail mümkün hərəkətlər barədə məlumatlandırılıb və addımlarını Vaşinqtonla əlaqələndirir. Lakin ABŞ prezidenti Donald Tramp hələlik əməliyyatın başlanması ilə bağlı yekun qərar verməyib.
Cümə günü Kemp Deviddə keçirilən ABŞ Nazirlər Kabinetinin iclasında hərbi əməliyyat planları müzakirə edilib. Mənbələrə görə, Ağ Evin bəzi siyasət müşavirləri yeni eskalasiya mərhələsinə qarşı çıxıblar.
Jurnalistlərlə görüş zamanı Tramp Tehrana qarşı sərt tədbirlər görməyə hazır olduğunu bəyan edib. "Biz onlara çox sərt zərbələr endirəcəyik. Bir anda onlar deyəcəklər ki, “Artıq buna dözə bilmirik", - deyə Amerika prezidenti bildirib.
Diplomatiyaya qayıtmaq ehtimalı ilə bağlı suala Tramp belə cavab verib: "Düşünürəm ki, biz sadəcə qalib gəlmək istəyirik".
ABŞ-İsrail birgə əməliyyatı, Vaşinqtonun vasitəçiliyi ilə əldə edilən atəşkəsdən sonra İsrailin aktiv döyüşə qayıtması demək olacaq. CBS News-un məlumatına görə, İran anlaşma memorandumunun ləğvindən və iyulun əvvəlində Amerika əməliyyatlarının bərpasından bəri İsrailə heç bir zərbə endirməyib.
İsrail sözçüsü CBS News-a bildirib ki, ölkənin tammiqyaslı hərbi əməliyyatlara yenidən başlamaq qərarı barədə heç bir məlumatı yoxdur və İrana qarşı hər hansı bir hücumda iştirak etmək üçün müraciət almayıb.
Ağ Evin mətbuat katibi Kerolin Livit isə bildirib ki, ABŞ Trampın prezidentliyi dövründə İranın nüvə silahı əldə etməsinin qarşısını almaq və qalib gəlmək əzmindədir.
Pentaqonun sözçüsü Şon Parnell prezident son qərarı verənə qədər mümkün hədəflər barədə şərh verməkdən imtina edib, lakin ABŞ ordusunun dövlət başçısının istənilən əmrini yerinə yetirməyə hazır olduğunu bildirib.
ABŞ-ın keçmiş hərbi rəsmisinin sözlərinə görə, enerji infrastrukturuna zərbələr İran ordusunun dövlətin fəaliyyətini davam etdirmək qabiliyyətini azaltmaq məqsədi daşıya bilər.
Bundan əvvəl Trampla görüşdə İsrailin Baş naziri Netanyahu İranın yerüstü təchizat marşrutlarına zərbələr də daxil olmaqla, neçə variantı açıqlamışdı. Mənbələrə görə, Netanyahu ABŞ müdafiə naziri Pit Heqsetlə də danışıqlar aparıb.
ABŞ ordusu artıq İranda həm hərbi, həm də mülki strukturlar tərəfindən istifadə edilən körpülər də daxil olmaqla, ikili məqsədli hədəflərə zərbələr endirib.
Bundan əlavə, cümə günü Vaşinqtonda Tehranda elektrik enerjisinin kəsilməsi ehtimalı müzakirə olunub, lakin bu məsələ ilə bağlı heç bir qərar qəbul edilməyib.
Tramp əvvəllər sosial media hesabında ABŞ-ın Hörmüz boğazında gəmilərə edilən hücumlara cavab olaraq İran körpülərinə və ya elektrik stansiyalarına zərbə endirəcəyini bildirmişdi.
Tahir TAĞIYEV
