ABŞ Prezidenti Donald Tramp Vaşinqtonun Ukrayna ilə nadir torpaq ehtiyatları ilə bağlı imzaladığı müqavilənin “istənilən vaxt ABŞ-a istədiyini götürmək" hüququ verdiyini bildirib.
RBC-Ukraynanın məlumatına görə, Ağ Ev rəhbəri bunu "Voice of Real America" televiziya kanalına verdiyi müsahibədə bildirib. Razılaşmanı xatırladan Tramp Ukraynanın "çox zəngin, nadir metallar baxımından çox münbit torpaqlara" sahib olduğunu vurğulayıb. O, həmçinin resurslara çıxışın dəyərinin 300 milyard dolları keçə biləcəyini, lakin müqavilənin yenə də gəlirli olacağını və Vaşinqtonun pulunu geri alacağını deyib.
Vəsaitlərin qaytarılması deyərkən, ABŞ prezidenti Vaşinqtonun Ukraynaya dəfələrlə etdiyi yardımı, xüsusən də Kiyevin aldığı hərbi yardımı nəzərdə tutub. "Ukrayna çox zəngindir. Onun torpaqları nadir torpaq ehtiyatları baxımından çox münbitdir. Biz istənilən vaxt ora gedib, demək olar ki, istədiyimiz hər şeyi götürə bilərik", - deyə ABŞ prezidenti bildirib. Nəticədə Tramp bunun "çox yaxşı bir razılaşma" olduğu qənaətinə gəlib.
Xatırladaq ki, ötən ilin aprel ayında Ukrayna və ABŞ arasında ABŞ-Ukrayna İnvestisiya Bərpası Fondunun yaradılması haqqında saziş imzalanıb. Sənəd Ukraynanın strateji ehtiyatlarının, xüsusən də litium, titan, qrafit, uran, eləcə də neft və təbii qaz yataqlarının işlənməsi üçün birgə investisiya qoyuluşunu nəzərdə tutur. Sazişə görə, yeraltı və təbii sərvətlərə mülkiyyət hüququ Ukraynada qalır və fond iki ölkə arasında bərabər tərəfdaşlıq prinsipləri əsasında fəaliyyət göstərir. Saziş çərçivəsində Ukrayna müəyyən təbii ehtiyatların istifadəsi üçün yeni lisenziyalardan və royaltilərdən əldə edilən gəlirlərin bir hissəsini fonda yönəldəcək. Daha sonra hökumət ABŞ ilə müqavilə çərçivəsində alınan vəsaitlərin mineral hasilatı layihələrinin, enerji inkişafı, infrastruktur və müharibədən sonrakı yenidənqurmanın maliyyələşdirilməsi üçün istifadə edilməli olduğunu bildirib. Ukrayna tərəfi həmçinin vurğulayıb ki, "müqavilə ölkə üçün ABŞ qarşısında heç bir borc öhdəliyi yaratmır" və Ukrayna iqtisadiyyatına Amerika və beynəlxalq investisiyaların axınını stimullaşdırmaq məqsədi daşıyır. ABŞ prezidenti Donald Tramp isə bildirir ki, Ukrayna ilə yeraltı sərvətlər haqqında müqavilə Amerika vergi ödəyicilərinə Ukraynaya etdikləri yardım qarşılığında müəyyən "gəlir" təmin etməlidir. “ABŞ pulunu geri almalıdır”- deyə o bildirib.
SAMİRƏ
