Əli Mustafa: “Fikrimcə, burada diplomatik səylərdən daha çox hərbi dəstəyin artırılmasından söhbət gedir”
Polşanın baş naziri Donald Tusk Ukrayna müharibəsi ilə bağlı diqqət çəkən məqamlara toxunub: “Prezident Zelenski ilə söhbətimdən sonra mənə tamamilə aydındır ki, növbəti 100 gün bu müharibənin nəticəsini həll edə bilər. İndi şansların əlli-əlliyə olduğunu deyərdim. Çox şey ABŞ prezidenti tərəfindən qəbul edilən qərarlardan asılıdır. Digər insanlar da mühüm rol oynayırlar - məsələn, “Starlink” və digər sistemlərdən söhbət getdikdə İlon Mask. Beləliklə, bunların bir hissəsi siyasətdən kənara çıxır”.
Nəzərə almaq lazımdır ki, müharibə başlayandan Polşa Ukraynaya hərbi və digər yardımlarda fəal rol oynayır. Ukraynaya hərbi yardımın böyük hissəsi Polşa üzərindən çatdırılır. Almaniyadan sonra ən çox ukraynalı qaçqın Polşaya sığınıb. O baxımdan Tuskun proqnozları nə dərəcədə realdır? Hər halda müəyyən informasiyalara malikdir ki, müharibənin gedişi ilə bağlı belə əmin danışır. Sanki Polşa baş naziri eyham vurur ki, Ukraynanın qələbəsi Trampdan asılıdır.
Sözügedən məsələni baki-xeber.com-a şərh edən siyasi şərhçi Əli Mustafanın fikrincə, Donald Tusk Polşa hökuməti başçısı kimi Ukrayna savaşı ilə bağlı vəziyyətdən kifayət qədər məlumatlıdır: “Ümumilikdə, Avropa dövlətləri içərisində Rusiya-Ukrayna müharibəsinin ən çox təsirinə məruz qalan, bunu hiss edən ölkə Polşadır. Eyni zamanda Polşa fərqindədir ki, Ukrayna təslim olarsa, Rusiyanın növbəti hədəfi Polşa olacaq. Ona görə də Varşava ilə Kiyev arasında bəzi tarixi məsələlərlə bağlı fikir ayrılıqlarının olmasına baxmayaraq, Polşa müharibə başlayamndan sonra hər zaman Ukraynanı dəstəkləyib. Hesab edirəm dəstəkləməkdə də davam edəcək. Polşa prezidenti Karol Navrotski Ukraynaya münasibətdə bir qədər fərqli siyasət yeritsə də, baş nazir Tusk Kiyevi tam dəstəkləyir. Ukrayna üçün əlindən gələni edən siyasətçi kimi qəbul edilir. Konkret olaraq Tuskun müharibə ilə bağlı açıqlamasına gəldikdə əlbəttə, ABŞ-ın müharibənin taleyində rolu müstəsnadır. Fikrimcə, burada diplomatik səylərdən daha çox hərbi dəstəyin artırılmasından söhbət gedir. İlon Maskın “Starlink” mobil internet sistemi Ukrayna hərbçilərinin cəbhədə uğur qazanmasında mühüm rol oynayır. Ancaq NATO-nun lideri olan ABŞ prezidenti Trampın hərbi yardımları artırmasına ehtiyac daha böyükdür. ABŞ bu kimi məsələlərdə müstəsna rola malikdir. Polşa hesab edir ki, ABŞ hərbi dəstəyi artırsa, Rusiyanı məğlub etmək mümkün olacaq. Rusiyanı yalnız ABŞ atəşkəsə məcbur edə bilər. Belə görünür ki, müharibə həm də Rusiyanın tükəndirilməsinə xidmət edir”.
Vidadi ORDAHALLI
