Əli Orucov: “Azərbaycanın iştirakı Mərkəzi Asiya ölkələrinin müstəqilliyinin möhkəmlənməsinə xidmət edir”
Qırğızıstanın Çolpon-Ata şəhərində Azərbaycanın və Mərkəzi Asiya ölkələrinin dövlət başçılarının qeyri-rəsmi görüşü keçirilib. Azərbaycan Prezident İlham Əliyev görüşdə çıxış edib. Görüşün sonunda Çolpon-Ata Bəyannaməsi imzalanıb.
Prezidenti İlham Əliyev görüşdə bildirib ki, Mərkəzi Asiya ölkələri ilə münasibətlərin inkişaf etdirilməsi Azərbaycanın xarici siyasət prioritetlərindən biridir: “Mərkəzi Asiya ölkələri ilə münasibətlər bizim xarici siyasət prioritetlərimizdən biridir. Son üç il yarım ərzində mən Orta Asiyanın qardaş ölkələrinə ümumilikdə 16 dəfə səfər etmişəm. Həmkarlarım bu müddət ərzində Azərbaycana 26 dəfə səfər ediblər. Bu statistika ən yaxşı şəkildə münasibətlərin dinamizmini və yaxınlığını, eləcə də Mərkəzi Asiya ilə Azərbaycanın bu gün vahid geosiyasi və geoiqtisadi bölgəyə çevrilməsini göstərir”.
Prezident Əliyev onu da qeyd edib ki, bu, onun bu formatın tamhüquqlu üzvü kimi məsləhətləşmə görüşündə ilk dəfə iştirakıdır: “Sizi əmin etmək istəyirəm ki, Azərbaycan öz növbəsində əməkdaşlığı gücləndirmək və ölkələrimizi və xalqlarımızı daha da yaxınlaşdıracaq bütün səylərini göstərəcək”.
Bu Orta Asiya ölkələri+Azərbaycan formatında rəsmən ölkəmizin iştirak etdiyi ilk toplantıdır. Mərkəzi Asiya ölkələrinin Məşvərət Şurasında Prezident İlham Əliyevin ilk dəfə iştirak etməsinin əhəmiyyətini ekspertlər necə dəyərləndirir?
Sözügedən məsələni baki-xeber.com-a şərh edən AMİP funksioneri Əli Orucovun fikrincə, Prezident Əliyevin sözügedən tədbirə ilk dəfə qatılması mühüm hadisədir: “Bu, Azərbaycan dövlətinə verilən önəmin göstəricisidir. Məsələ ondadır ki, son 5 ildə dünyada geosiyasi proseslər sürətlə dəyişir. Bu proseslər yeni çağırışlarla müşahidə edilir. Rusiya-Ukrayna müharibəsi, Yaxın və Orta Şərqdə baş verən təlatümlər yeni geosiyasi düzənin formalaşmağından xəbər verir. Bütün bunlar, o cümlədən Qarabağın işğaldan azad edilməsi Azərbaycanın regionda mühüm aktora çevrilməsinə təkan verir. Nəzərə almaq lazımdır ki, bu gün Azərbaycan Şərqlə Qərbi, Şimalla Cənubu birləşdirən vacib tranzit həlqəsidir. Azərbaycanın yerləşdiyi coğrafi mövqe, yeritdiyi müstəqil xarici siyasət Mərkəzi Asiya ölkələrinin Rusiya və Çindən asılılığının azalmasına xidmət edir. Xüsusən də Rusiyanın təsir imkanlarının azaldılması baxımından mühüm əhəmiyyət kəsb edir. Çünki həm Cənubi Qafqaz, həm də Mərkəzi Asiya ölkələri uzun illər Rusiya imperiyasının işğalı altında olub. Düzdür, 90-cı illərin əvvəllərində SSRİ süqut etdi və Mərkəzi Asiya ölkələri müstəqillik əldə etdilər. Ancaq təkcə siyasi müstəqillik yetərli deyil. Önəmli olan həm də Rusiyadan iqtisadi asılılığı azaltmaqdır. Bu baxımdan Azərbaycan Mərkəzi Asiya ölkələri üçün Avropaya bir körpüdür. Əvvəllər əsasən Rusiya üzərindən Avropa ilə əlaqələr qurulurdusa, ticarət aparılırdısa, son illər Azərbaycan üzərindən bu işlər həyata keçirilir. O üzdən, Azərbaycanın Mərkəzi Asiya ölkələrinin Məşvərət Şurasında təmsil olunması region dövlətlərinin müstəqilliyinin möhkəmlənməsinə xidmət edir”.
Vidadi ORDAHALLI
