Akif Nağı: “Rusiya ilə bağlı vaxtında düzgün qərarlar qəbul olunmasa onda müharibənin miqyası həddən artıq genişlənə bilər”
Rusiya Silahlı Qüvvələri Ukrayna paytaxtında süni intellektlə işləyən elektron müharibəyə davamlı dronlar istehsal edən obyektə zərbə endirib. Britaniya mediasının məlumatına görə, bu, Amerikanın Terminal Muxtariyyəti korporasiyasına məxsusdur və Ukraynadakı münaqişə zamanı ABŞ şirkətinin obyektinin hədəfə alındığı ilk haldır. Guardian qəzetinin məlumatına görə, şirkət rəsmi olaraq 2023-cü ildə Delaverdə qeydiyyatdan keçib. Dağıdılan fabrikdə uzun mənzilli hücum dronları istehsal olunub. Bu dronlar radio siqnalları kəsildikdə nəzarəti ələ alan süni intellekt əsaslı rəhbərlik sistemləri ilə təchiz olunub.
Şirkətin və Ukrayna Müdafiə Nazirliyinin nümayəndələri jurnalistlərin şərh istəklərinə cavab verməyiblər. Keçmiş yüksək vəzifəli ABŞ kəşfiyyat rəsmisi Entoni Vinçi hadisə ilə bağlı şərh verib. "Ruslar istehsal müəssisəsinin kimə məxsus olduğuna əhəmiyyət vermirlər; bu, hədəfdir və onlar üçün Amerika, yoxsa başqasının olması vacib deyil", - deyə ekspert bildirib.
Azad Vətən Partiyasının sədri Akif Nağı baki-xeber.com-a bildirdi ki, Amerikanın Rusiyaya qarşı hərəkətləri artıq konkret istiqamət götürür və eyni zamanda Rusiya da eyni dərəcədə cavab verir. “Amerika da artıq açıq şəkildə Ukrayna tərəfindən müharibədə iştirak edir. Rusiya rəhbərliyinin son açıqlamalarına görə, təkcə Ukrayna yox, Ukraynanı müdafiə edən, onun tərəfindən müharibədə bu və digər formada iştirak edən ölkələr vurulmalıdır. Çox təhlükəli bir tendensiyadır. Əgər belə bir müharibə başlayarsa, bu Amerika-İran müharibəsinin başqa bir variantı olacaq. Çünki İran da Amerikanın Yaxın Şərqdəki müttəfiqlərinin ərazilərini, oradakı Avropa, Amerika hərbi bazalarını, aeroportları, binaları da vurur. Ümumən o atmosferi yaratmağa çalışırlar ki, bu təkcə bu və ya digər ölkənin ərazisi ilə kifayətlənməyəcək, geniş bir ərazini əhatə edəcək. Ona oxşar bir ssenari də artıq Rusiya tərəfindən ortaya gətirilir”.
İsrailin Ukrayanya o qədər ciddi dəstək vermədiyini deyən A.Nağı qeyd etdi ki, meydanda Amerikanın müttəfiqi kimi durur. “Ona görə də ən azından Amerikanı və Avropanı Ukraynaya ciddi dəstəkdən geri çəkindirmək üçün ola bilər ki, Rusiya Amerikanın, Avropanın ərazilərini də vursun. Bu artıq uzaq bir perspektiv deyil. Əgər Rusiya rəhbəri, ekspertlər tərəfindən bu fikir səsləndirilsə, bu elə-belə bir məsələ deyil. Ukraynanın ərazisindəki Amerika obyekti, müəssisəsi vurulur. Bu o deməkdir ki, Amerika vurulur. Bu ona işarə edir ki, bir azdan Amerika ərazisinə hansısa ballistik raketlər göndərilə, yaxud Amerikanın Avropadakı hansısa bazaları, müəyin nöqtələri, müəyyən hərbi zavodları vurula bilər. Yəni Ukraynaya silah göndərən, tədarük edən Avropa ölkələrindən söhbət gedir. Bu insidentə onun başlanğıcı kimi baxa bilərik. Rusiya artıq ona işarə edir ki, müəyyən çərçivələri keçir, “heç kim mənim qarşısını dayanmayacaqdır. Ona görə də bu ciddi bir siqnal kimi hər kəs tərəfindən qəbul olunmalıdır”. Rusiyanın bu istiqamətdəki hər hansı bir cəhdlərinin qarşısını almaq və yaxud hansısa bir yol axtarıb tapmaq üçün hələ gec deyil. Amma Rusiya ilə bağlı vaxtında düzgün qərarlar qəbul olunmasa onda müharibənin miqyası həddən artıq genişlənə, yüksək səviyyədə qızışa, qızışdırıla bilər. O da dünya üçün çox böyük bir təhlükədir. Buna görə də Qərb və ABŞ fikirləşməlidir ki, Rusiya ilə çox böyük qlobal Üçüncü Dünya Müharibəsinə gedirlər, yoxsa hələ buna hazır deyillər. Əgər hazır deyillərsə, onda Rusiyanın bu hərəkətlərini cilovlamaq, qarşısını almaq üçün müəyyən qabaqlayıcı tədbirlər görməlidirlər”-deyə A.Nağı əlavə etdi.
İradə SARIYEVA
