Ukraynanın Energetika Nazirliyi Azərbaycanın "Ukrayna Dəmir Yolları"nın işini dəstəkləmək üçün 40 tona yaxın avadanlıq təhvil verdiyini bildirib. Bu barədə Ukraynanın Energetika Nazirliyi "X" sosial şəbəkəsində məlumat yayıb.
Məlumata görə, avadanlıq ukraynalı dəmiryolçuların işinə dəstək olmaq və kritik infrastrukturun fəaliyyətini təmin etmək məqsədilə Energetika Nazirliyinin enerji habı vasitəsilə dəmir yolunun regional bölmələrindən birinə çatdırılıb. Məlumatda bildirilib: "Demək olar ki, hər gün hab vasitəsilə Ukraynanın müxtəlif regionlarına yeni avadanlıq göndərilir. O, Rusiyanın daimi hücum təhlükəsi şəraitində həm enerji sektorunun, həm də digər kritik infrastruktur obyektlərinin fasiləsiz işini təmin etməyə kömək edir". Nazirlik Ukraynaya göstərdiyi dəstəyə və kritik infrastrukturun möhkəmləndirilməsindəki yardımına görə Azərbaycana minnətdarlığını bildirib. Bu fonda Dövlət Dumasının Müdafiə Komitəsinin üzvü Andrey Kolesnik bildirib ki, Azərbaycanın Ukraynaya enerji avadanlığı tədarükü Rusiyanın hərbi planlarına təsir göstərməyəcək. Bu obyektlər qanuni hədəf olaraq qalacaq. Parlamentarinin sözlərinə görə, Bakının köməyinə cavab Ukrayna ərazisindəki enerji infrastrukturunun daha da məhv edilməsi olmalıdır. O vurğulayıb ki, bu, Rusiya Silahlı Qüvvələrinin vəzifəsidir və onlar bunu yerinə yetirəcəklər. Kolesnik qeyd edib ki, hətta qeyri-hərbi avadanlıq təchizatı da Kiyevin enerji sektorunu qoruyub saxlamasına kömək edir. Lakin onun fikrincə, bu, bu obyektlərin zərbələr üçün qanuni hədəf statusunu dəyişmir. Deputat əlavə edib ki, Rusiya ordusu infrastrukturu bərpa etmək cəhdlərindən asılı olmayaraq öz missiyalarını yerinə yetirməyə davam edəcək.
Bir müddət əvvəl Dövlət Duması Azərbaycanı Avropaya yaxınlaşmaq və Rusiyadan uzaqlaşmaq riskləri barədə xəbərdar etmişdi. Dövlət Dumasının deputatı Aleksandr Tolmaçev iddia edib ki, Azərbaycanın Rusiyadan uzaqlaşmaq və Avropa ölkələrinə yaxınlaşmaq kursu uğurlu olmayacaq və ciddi iqtisadi və siyasi problemlərə səbəb olacaq. Bakının Almaniya ilə strateji dialoqa başlamaq istəyi ilə bağlı son açıqlamalarını şərh edərkən parlament üzvü qeyd edib ki, Moskva ilə güclü və perspektivli əlaqələrin kəsilməsi artıq Ermənistan üçün ciddi çətinliklərlə nəticələnib və respublika bu çətinliklərin öhdəsindən təkbaşına gəlməli olur. Tolmaçev vurğuladı ki, Avropa dövlətləri ilə tərəfdaşlıq özlüyündə pis bir şey deyil. Əsas problem ondadır ki, yeni müttəfiqlər Rusiya Federasiyası ilə bütün əməkdaşlığı tamamilə dayandırmağı əsas şərt kimi irəli sürürlər. Tolmaçev vurğulayıb ki, "Azərbaycanın Ukrayna və Ermənistanın səhvlərindən dərs çıxarmaması təəssüf doğurur".
Tahir TAĞIYEV
