Akif Nəsirli: “Bu addım həm də Azərbaycanın investisiya ixrac edən ölkə kimi rolunun artdığını göstərir”
Azərbaycan-Qırğız İnvestisiya Fondunun vəsaitlərinin artırılması barədə qərar qəbul olunub.
Bu barədə Prezident İlham Əliyev Çolpon-Ata şəhərində keçirilən Azərbaycan və Qırğızıstan Dövlətlərarası Şuranın 3-cü iclasında bildirib.
Azərbaycan Prezidenti qeyd edib: “Şadam ki, Azərbaycan-Qırğız Fondu uğurla fəaliyyət göstərir. Fondun vəsaitlərinin artırılması barədə qərar qəbul etdik və bir neçə layihə artıq həyata keçirilir. Əminəm ki, Fond inkişaf etdikcə, layihələrin sayı da artacaq. Bu, ortaq məqsədlərimizə xidmət edəcək”.
Bu qərarın əhəmiyyətini necə dəyərləndirmək olar? Bu nə deməkdir?
Liberal İqtisadçılar Birliyinin rəhbəri Akif Nəsirli baki-xeber.com-a bildirdi ki, Azərbaycan-Qırğız İnvestisiya Fondunun vəsaitlərinin artırılması barədə qərar, ilk növbədə, iki ölkə arasında iqtisadi əməkdaşlığın yeni mərhələyə keçdiyini göstərir. Bu, sadəcə maliyyə həcminin artırılması deyil, həm də qarşılıqlı investisiya layihələrinin sayının və miqyasının genişləndirilməsi üçün əlavə imkanların yaradılması deməkdir.
“Fondun kapitalının artırılması Azərbaycan və Qırğızıstan şirkətlərinin kənd təsərrüfatı, sənaye, logistika, enerji, turizm və digər sahələrdə birgə layihələr həyata keçirməsinə daha çox maliyyə dəstəyi verəcək. Bu isə həm biznes əlaqələrinin möhkəmlənməsinə, həm də yeni iş yerlərinin yaradılmasına xidmət edə bilər.
Qərarın digər mühüm tərəfi ondan ibarətdir ki, Azərbaycan Mərkəzi Asiyada iqtisadi mövqeyini gücləndirməyə çalışır. Türk Dövlətləri Təşkilatı çərçivəsində iqtisadi inteqrasiyanın dərinləşməsi fonunda belə fondlar üzv ölkələr arasında ticarət və investisiya əlaqələrinin inkişafı üçün praktik mexanizm rolunu oynayır.
Bu addım həm də Azərbaycanın investisiya ixrac edən ölkə kimi rolunun artdığını göstərir. Yəni Azərbaycan artıq yalnız xarici sərmayə cəlb edən deyil, eyni zamanda dost və tərəfdaş ölkələrdə iqtisadi layihələrə sərmayə yatıran dövlət kimi çıxış edir”.
A.Nəsirli qeyd etdi ki, uzunmüddətli perspektivdə fondun vəsaitlərinin artırılması iki ölkə arasında ticarət dövriyyəsinin böyüməsinə, nəqliyyat-logistika marşrutlarının inkişafına və Orta Dəhliz boyunca iqtisadi əməkdaşlığın daha da genişlənməsinə müsbət təsir göstərə bilər. “Bu baxımdan qərar həm iqtisadi, həm də geosiyasi əhəmiyyət daşıyan strateji addım kimi qiymətləndirilə bilər”-deyə A.Nəsirli qeyd etdi.
İradə SARIYEVA
