Arzuxan Əlizadə: "Ermənistanın yeni xarici siyasət kursu regionda rəqabəti gücləndirə bilər"
Ermənistanın Baş naziri Nikol Paşinyan hökumət iclasından sonra keçirdiyi brifinqdə Rusiya ilə münasibətlərə dair açıqlamalar verib. O bildirib ki, Ermənistan artıq yalnız bir tərəfdaşa bağlı qalmaq istəmir və xarici siyasətdə alternativ istiqamətlər formalaşdırır.
Paşinyanın sözlərinə görə, Ermənistan son dövrdə Çin, ABŞ, Böyük Britaniya, Hollandiya, Fransa və bir sıra digər ölkələrlə strateji əməkdaşlığa dair sənədlər imzalayıb. O iddia edib ki, Rusiya bunu problem kimi qəbul edir və münasibətlərin eksklüziv olmasını istəyir. Ermənistan isə bu yanaşmanı qəbul etmir və hesab edir ki, müxtəlif ölkələrlə paralel strateji münasibətlər qurmaq suveren dövlətin hüququdur.
Baş nazir Ermənistanın etibarsız tərəfdaş olması ilə bağlı ittihamları da rədd edib. O, 2022-ci ildə KTMT-nin öhdəliklərini yerinə yetirməməsində Ermənistanın günahı olmadığını bildirib və Rusiya sülhməramlılarının Qarabağdakı fəaliyyətinə görə də İrəvanın məsuliyyət daşımadığını vurğulayıb.
Paşinyan, həmçinin, Belarus Prezidenti Aleksandr Lukaşenkonun Ermənistanla bağlı əvvəlki tənqidi fikirlərinə toxunaraq, suveren dövlət haqqında bu cür ifadələrin yolverilməz olduğunu deyib. Onun sözlərinə görə, Ermənistanın müxtəlif ölkələrlə əməkdaşlığını genişləndirməsi ölkənin beynəlxalq əhəmiyyətini göstərir və tərəfdaş dövlətlərin də Ermənistana maraq göstərdiyini nümayiş etdirir.
Paşinyan sonda Ermənistanın mövqeyinə hörmətlə yanaşılmasına çağırıb və ölkəsinin suveren xarici siyasət yürütmək hüququna malik olduğunu bildirib.
Paşinyanın Ermənistanın Rusiya ilə eksklüziv münasibətlər modelindən imtina etdiyini və ABŞ, Çin, Fransa, Böyük Britaniya kimi ölkələrlə strateji tərəfdaşlığı genişləndirdiyini bəyan etməsi İrəvanın xarici siyasətində hansı yeni mərhələdən xəbər verir? Bu siyasət Ermənistanın Rusiya ilə münasibətlərinə və Cənubi Qafqazda geosiyasi balansın gələcəyinə necə təsir göstərə bilər?
Paşinyanın açıqlamaları göstərir ki, Ermənistan xarici siyasətdə uzun illər üstünlük verdiyi Rusiyayönlü modeldən daha çoxşaxəli diplomatiyaya keçməyə çalışır. İrəvan ABŞ, Avropa ölkələri, Çin və digər tərəfdaşlarla münasibətləri genişləndirməklə həm siyasi, həm də iqtisadi baxımdan bir mərkəzdən asılılığı azaltmağa çalışır.
Lakin bu siyasət Ermənistan-Rusiya münasibətlərində gərginliyi daha da artıra bilər. Rusiya Cənubi Qafqazı öz ənənəvi təsir dairəsi hesab etdiyindən, İrəvanın Qərblə yaxınlaşmasını narahatlıqla izləyir. Bu isə gələcəkdə siyasi, iqtisadi və təhlükəsizlik sahələrində yeni fikir ayrılıqlarına səbəb ola bilər.
Bununla yanaşı, Ermənistanın balanslaşdırılmış xarici siyasət cəhdi Cənubi Qafqazda geosiyasi rəqabəti daha da gücləndirə bilər. Regionda Rusiya, Qərb, Türkiyə və digər güclərin maraqları toqquşduğu üçün İrəvanın yeni kursu regional proseslərə də təsirsiz qalmayacaq. Bunun nə dərəcədə uğurlu olacağı isə Ermənistanın müxtəlif güclər arasında tarazlığı qoruyub saxlaya bilməsindən asılı olacaq.
AMİP lideri, deputat Arzuxan Əlizadə "Bakı-Xəbər" qəzetinə açıqlamasında Paşinyanın son bəyanatlarını şərh edib.
Onun sözlərinə görə, bu açıqlamalar Ermənistanın son illərdə balanslaşdırılmış deyil, daha çox çoxvektorlu xarici siyasət modelinə keçidi sürətləndirməyə çalışdığını göstərir. Əlizadə qeyd edib ki, İrəvan ənənəvi olaraq təhlükəsizlik sahəsində Rusiyadan asılılığını azaltmaq və Qərb ölkələri, eləcə də digər qlobal güclərlə əlaqələrini genişləndirmək niyyətini açıq şəkildə nümayiş etdirir.
Deputat vurğulayıb ki, bu kursun uğuru Ermənistanın yeni tərəfdaşlardan siyasi, iqtisadi və təhlükəsizlik baxımından nə dərəcədə real dəstək ala bilməsindən asılı olacaq. Onun sözlərinə görə, Rusiya hələ də regionda ciddi hərbi, iqtisadi və enerji təsirinə malik aktordur və bu münasibətlərin kəskin zəifləməsi Ermənistan üçün müəyyən risklər yarada bilər.
Əlizadə həmçinin bildirib ki, Cənubi Qafqazın geosiyasi mənzərəsi baxımından Ermənistanın bu siyasəti regionda rəqabəti daha da gücləndirə bilər. Onun sözlərinə görə, böyük güclərin maraqlarının toqquşduğu bir məkanda balansın qorunması hər bir dövlət üçün həssas məsələdir.
AMİP lideri Azərbaycanın mövqeyinin dəyişməz olaraq regionda sülhün, qarşılıqlı hörmətin və beynəlxalq hüquqa əsaslanan əməkdaşlığın təmin edilməsindən ibarət olduğunu vurğulayıb. O əlavə edib ki, Ermənistanın hansı xarici siyasət kursunu seçməsi onun suveren hüququ olsa da, bu siyasətin regionda sabitliyə xidmət etməsi, revanşizmə və yeni qarşıdurmalara zəmin yaratmaması əsas şərtdir.
Əlizadənin sözlərinə görə, davamlı sülh yalnız regional əməkdaşlığın gücləndirilməsi və dövlətlərin bir-birinin suverenliyinə və ərazi bütövlüyünə hörmət etməsi əsasında mümkündür.
Dəniz NƏSİRLİ
