Xaqani Cəfərli:“Türkiyə İraqa qarşı əməliyyatları dəstəkləmədiyi üçün Vaşinqton Ankara ilə əməkdaşlığının səviyyəsini aşağı salıb”
ABŞ və İsrailinin İrana hücumuna qarşı hazırda net və açıq şəkildə çıxış edən, mövqe ortaya qoyan ölkə Türkiyədir.Türkiyə prezidenti Rəcəb Tayyib Ərdoğan ABŞ və İsrailin İranla müharibəsi fonunda sərt bəyanatla çıxış edib. Ərdoğan münaqişəyə vaxtında müdaxilə olunmasa, bunun həm regional, həm də qlobal təhlükəsizlik üçün ağır nəticələr doğuracağını bildirib.
Ərdoğan vurğulayıb ki, davam edən qarşıdurma iqtisadi və geosiyasi qeyri-müəyyənliyi daha da dərinləşdirir və belə bir prosesə heç bir ölkə uzun müddət tab gətirə bilməz. Onun sözlərinə görə, böhran nəzarətdən çıxarsa, təsirləri bütün dünyaya yayılacaq.
Türkiyə lideri çağırış edərək qeyd edib ki, alov daha da güclənmədən söndürülməli, münaqişənin genişlənməsinin qarşısı təcili şəkildə alınmalıdır.
Bu vəziyyət müharibədən sonra ABŞ-Türkiyə münasibətlərinin necə olacağını göstərir?
Politoloq Xaqani Cəfərli baki-xeber.com-a bildirdi ki, ABŞ üçün belə məqamlarda müttəfiqlərinin davranışı bir sınaqdır. “Vaşinqtonun müttəfiqləri ilə münasibətlərinə bu sınaqların nəticələri çox təsir edir. Məsələn, Türkiyə İraqa qarşı əməliyyatları dəstəkləmədiyi üçün Vaşinqton Ankara ilə əməkdaşlığının səviyyəsini aşağı salıb.
İrana qarşı əməliyat da gec-tez başa çatacaq. Bu əməliyat zamanı dövlətlərin davranışı Vaşinqtonun gələcək münasibətlərinin müəyyən olunmasına ciddi təsir edəcək. Türkiyənin hazırkı mövqeyi, xüsusilə Türkiyə cəmiyyətinin davranışı Vaşinqtonda narahatlıqla izlənir”.
X.Cəfərli qeyd etdi ki, İrana qarşı əməliyyatlar başa çatandan sonra Yaxın Şərqdə geosiyasi vəziyyət tamamilə dəyişəcək. “İsrailin liderliyi ilə yeni geosiyasi vəziyyət yaranacaq ki, bu Türkiyənin əleyhinə olacaq. Üstəlik ABŞ-ın da Türkiyəyə Konqres səviyyəsində təzyiqləri artacaq. Bütün bunları öncədən görən türk siyasi şərhçilər Rəcəb Tayyip Ərdoğan hakimiyyətini Azərbaycanın imkanlarından istifadə edərək İsraillə münasibətləri normallaşdırmağa çağırırlar. Təəssüf ki, belə çağrışlar hələlik ciddi nəticə vermir. Azərbaycandan verilən mesajlar da hələlik heç bir nəticə vermir. Əgər Türkiyə dövləti siyasətində ciddi dəyişiklik etməsə, Türkiyə cəmiyyəti anti-İsrail isterikasına son qoyması Türkiyə ikinci İrana çevriləcək. Yəni, ABŞ və İsrailin təzyiqləri bu dəfə Türkiyəyə qarşı yönələcək. İrandan fərqli olaraq Türkiyənin belə təzyiqlərə uzun müddət davam gətirmək imkanı yoxdur”-deyə X.Cəfərli bildirdi.
İradə SARIYEVA
