Ramil Məmmədli: “Rusiyanın S-300 və digər HHM vasitələrini İrana verməsi problemlidir”
ABŞ İranı vurana qədər belə informasiyalar yayılırdı ki, guya Rusiya bu ölkəni zəruri hava hücumundan müdafiə vasitələri ilə təmin edib, S-300 raket kompleksləri verib və s. Ancaq bu dəfəki hücumda da bunların heç biri özünü göstərmədi.
Halbuki, 2022-ci ilin fevralında Rusiya Ukraynaya hücum edəndə İran rejimi Rusiyaya təkcə minlərlə “Şahed” PUA-ları ilə deyil, həm də təlimatçılarla, mühəndislərlə və bu dronların Rusiyada istehsalı üçün lazım olan bütün məlumatlarla, eləcə də raket istehsalını artırmaq üçün əlində olan bütün mövcud texnologiyalarla təmin etdi. Bəs bütün bunların qarşılığında Rusiyanın İran hakimiyyətinə istər ötən ilin yayındakı 12 günlük müharibədə, istərsə də bugünkü fəlakət həddinə yaxınlaşan ağır vəziyyətdə dəstəyi nədən ibarətdir? Axı 2025-ci ildə Rusiya və İran Hərtərəfli Strateji Tərəfdaşlıq Müqaviləsini imzalayıblar.
Sözügedən məsələyə aydınlıq gətirən hərbi ekspert Ramil Məmmədli baki-xeber.com-a açıqlamasında Rusiyanın İrana hərbi dəstək məsələsində aciz duruma düşməsini bir sıra amillərlə əlaqələndirdi: “Burada bir neçə səbəbin olması ehtimal edilir. Demək doğru olmaz ki, Rusiya İrana heç bir silah yardımı etmir. Silah yardımı edir, amma bu, yetərli səviyyədə deyil. Problem ondadır ki, Rusiya özünün bütün hərbi resurslarını Ukrayna müharibəsinə yönəldib. Rusiya nə qədər böyük silah arsenalına malik olsa da, hazırda İrana ciddi yardım etmək gücündə deyil. Ona görə ki, Rusiya Şimali Koreyadan sursat və mərmi alır. Ukraynada gedən müharibənin intensivliyi silah və sursata tələbatı artırır. Başqa bir tərəfdən Ukrayna raket və zərbə dronları ilə Rusiyanın dərinliklərində yerləşən enerji və digər vacib məntəqələri hədəf alır. Rusiya Ukraynadan atılan bütün raket və PUA-ları zərərsizləşdirə bilmir. Belə olan halda Rusiyanın S-300 və digər HHM vasitələrini İrana verməsi problemlidir. Ən nəhayət, Rusiya ilə İran arasında münasibətlər strateji tərəfdaşlıq səviyyəsindədir. Bu, konkret müttəfiqlik demək deyil. Müttəfiqlik qarşılıqlı hərbi öhdəlikləri nəzərdə tutur. İranla imzalanmış Strateji Tərəfdaşlıq sənədində isə birbaşa hərbi yardım maddəsi yoxdur. Orada qeyd edilib ki, tərəflərdən birinə təcavüz olarsa, həmin təcavüzkar ölkə ilə əməkdaşlıq edilməyəcək”.
Vidadi ORDAHALLI
