Arzuxan Əlizadə: “ABŞ-İran müharibəsinin Ukraynaya mənfi baxımdan təsiri gözlənilmir”
ABŞ-İsrail alyansının İrana qarşı hücumu qısa müddətdə ciddi itkilərə səbəb olub. İranın Ali rəhbəri Əli Xamenei, müdafiə naziri, baş qərargah rəisi, SEPAH komandirləri, kəşfiyyat rəhbərləri daxil olmaqla, 50-yə qədər yüksək vəzifəli şəxs öldürülüb.
Ölkənin kritik müdafiə strukturları - HHM vasitələri, ballistik raketlərin idarəetmə məntəqələri, hərbi bazalar, ordu və donanma qərargahları intensiv şəkildə havadan və dənizdən bombardman edilir. İran da aktiv müqavimət göstərir. Ordu ABŞ və İsrailin ətraf ölkələrdəki hərbi bazalarını, kəşfiyyat mərkəzlərini, dəniz donanmasını, hava limanlarını, eləcə də İsrailin paytaxtını ballistik raketlərdən atəşə tutur.
Bütün bunların fonunda maraqlıdır, ABŞ-İran müharibəsi Ukraynada gedən müharibəyə necə təsir edəcək? Belə fikirlər səslənir ki, hazırda Rusiya-Ukrayna müharibəsinin taleyi həm də ABŞ-ın İranla apardığı müharibənin necə bitəcəyindən asılıdır. Əgər ABŞ İranda uğur qazanmasa, Ukraynada müharibə daha bir və yaxud da iki il davam edə bilər. Yox əgər ABŞ İranda istəklərinə çatsa, bu Ukraynada müharibənin tez bitməsinə müsbət təsir edəcək.
Sözügedən məsələ ilə bağlı fikirlərini baki-xeber.com-la bölüşən AMİP sədri, millət vəkili Arzuxan Əlizadə hesab edir ki, ABŞ-la İsrailin İrana qarşı apardığı müharibənin Ukraynada vəziyyətə ciddi mənfi təsir edəcəyi real deyil: “Bunun bir neçə səbəbi var. Əvvəla, Ukrayna dörd ildir böyük fədakarlıqla işğalçı Rusiyanın qarşısında duruş gətirir. Bəli, bu, Ukraynaya baha başa gəlir. Ölkənin şəhərləri, kəndləri, enerji infrastrukturu Rusiya tərəfindən viran qoyulur, mülki insanlar qətlə yetirilir. Ukrayna müqavimət göstərmək üçün böyük resurslar sərf edir. Ancaq bu müharibə Rusiyaya da ucuz başa gəlmir. Rusiya böyük sayda əsgər, hərbi texnika itirir. Hər keçən gün bu itkilərin sayı daha da artır. Üstəlik, Rusiya iqtisadiyyatı müharibədən ciddi zərər görür. Rusiyanın gündəlik maliyyə itkiləri bir neçə milyard dollar təşkil edir. Bundan əlavə, müharibə Rusiyanın öz sərhədləri daxilində onun bütün Avropa hissəsinə yayılıb. Ukrayna Silahlı Qüvvələri hər gün Rusiya şəhərlərinin infrastrukturuna zərbələr endirir, neft zavodlarını vurur, elektrik və istiliklə bağlı problemlər yaradır. Ölkənin demoqrafik vəziyyəti getdikcə pisləşir, hər il ölənlərin sayı yeni doğulanları xeyli üstələyir. Digər tərəfdən onsuz da Tramp prezident vəzifəsini icra etməyə başlayandan sonra ABŞ Ukraynaya silah yardımı etmir. Söhbət ABŞ-ın öz vəsaiti hesabına Ukraynaya etdiyi yardımdan gedir. Ukraynaya lazım olan silah və iqtisadi yardımı Avropa İttifaqı göstərir. Daha dəqiq desək Aİ-nin bir neçə ölkəsi istehsal etdiyi silahları Ukraynaya verir. Hansı silah ki onlarda istehsal edilmir, onu ABŞ-dan pulla alıb Ukraynaya göndərirlər. Bu gün ABŞ-ın öz hesabına Ukraynaya etdiyi yardım peyklərdən əldə edilən kəşfiyyat məlumatlarıdır. Bu baxımdan ABŞ-İran müharibəsinin Ukraynaya mənfi baxımdan təsiri gözlənilmir. Nəzərə almaq lazımdır ki, Avropa ölkələri İrana qarşı müharibəyə qoşulmayıb. Əgər Avropa müharibəyə qoşulsaydı o zaman Ukrayna üçün problem yaranardı”.
Vidadi ORDAHALLI
