Məhərrəm Zülfüqarlı: “Rusiya kimi avtoritar ölkədə İstintaq Komitəsi bir qərar çıxarsın, digəri başqa bir qərar, bu mümkün deyil”
Azərbaycan və Rusiya AZAL təyyarəsinin qəzası ilə bağlı yaxın vaxtlarda addımlar atacaqlar. Bu barədə Prezident İlham Əliyevin Rusiya Federasiyası Hökuməti Sədrinin müavini, Hökumətlərarası Komissiyanın həmsədri Aleksey Overçuku qəbulu zamanı bildirilib.
Söhbət zamanı qeyd edilib ki, Azərbaycan və Rusiya liderlərinin 2025-ci il oktyabrın 9-da Düşənbədə keçirilən görüşündə əldə etdikləri razılaşmalara uyğun olaraq, tərəflər 2024-cü il dekabrın 25-də AZAL təyyarəsinin qəzaya uğraması nəticəsində yaranan problemlərin həlli üzrə yaxın vaxtlarda kompleks praktik addımlar atacaqlar.
Axı bir müddət əvvəl Rusiya İstintaq Komitəsi bununla bağlı cinayət işinə xitam vermişdi. İndi də Overçuk Prezidentlə görüşündə deyir ki, AZAL təyyarəsinin qəzası ilə bağlı yaxın vaxtlarda addımlar atacaqlar. Nədir bu Rusiya hakimiyyətində sözügedən məsələ ilə bağlı belə bir birinə zidd, təkzibedici mövqelər? Təyyarəmizin vurulması ilə bağlı belə ziddiyyətli mövqelər nə ilə bağlıdır?
Sözügedən məsələ ilə bağlı fikirlərini baki-xeber.com-la bölüşən tarix elmləri doktoru, professor Məhərrəm Zülfüqarlı hesab edir ki, Rusiyanın belə təzadlı mövqe sərgiləməsi bir sıra amillərlə bağlıdır: “2024-cü ilin dekabrında mülki təyyarəmiz Rusiya tərəfindən vurulduqdan sonra müəyyən gözləntilər var idi. Azərbaycan gözləyirdi ki, buna görə rəsmi səviyyədə Rusiya üzr istəyəcək, dəymiş zərərə görə kompensasiya ödəyəcək, cinayətkarlar məsuliyyətə cəlb ediləcək və s. Bunların heç biri baş vermədi. İndi isə ABŞ İsraillə birlikdə İrana hücum edəndən sonra birdən birə Aleksey Overçukun Bakıya səfəri, təyyarə məsələsini qaldırması onu göstərir ki, Rusiya da artıq narahat olmağa başlayıb. Beynəlxalq güclərin İran kimi ölkələrdə olan rejimlərə qarşı mübarizə aparmasından çəkinməyə başlayıblar. Rusiyanın 4 ildir Ukraynada apardığı işğalçı siyasət artıq iflasa uğrayıb. Belə bir zamanda Azərbaycan kimi dövlətlə də münasibətlərin daha da korlanması Rusiyanın marağına uyğun deyil. Fikrimcə, məhz buna görə yenidən bu məsələyə qayıtdılar. Yoxsa Rusiya kimi avtoritar ölkədə İstintaq Komitəsi bir qərar çıxarsın, digəri başqa bir qərar, bu mümkün deyil. Bütün bunlar Kremldən idarə edilir. Rusiya tarixən verdiyi sözə əməl etməyən bir dövlətdir. Məsələn, Ukrayna ilə bağlı 2014-cü ildən əvvəl dediyi fikirlər indiki siyasətlə tamamilə ziddiyyət təşkil edir. Deməyim odur ki, Rusiyanın beynəlxalq müstəvidə mövqeyi daha da zəifləsə, təyyarəmizin vurulması ilə bağlı obyektiv mövqe ortaya qoyacaq. Bunun əksi baş versə, Rusiya təyyarə ilə bağlı konkret addımlar atmayacaq. Çünki Rusiya beynəlxalq hüquqa hörmət edən ölkə deyil. Bütün hallarda Overçukun açıqlaması Azərbaycanın gücünü göstərir. Azərbaycan hakimiyyətinin yeritdiyi siyasətin uğurudur ki, Rusiya kimi böyük dövlət yenidən bu məsələyə qayıdır və dövlətimizin haqlı tələbinə əməl edəcəyinə söz verir. Biz də istərdik ki, Rusiya verdiyi sözə əməl etsin”.
Vidadi ORDAHALLI
