Sahil Kərimli: “...Başsağlığı məktubunun da mətni çox açıq-aydın şəkildə Azərbaycanın mövqeyini ortaya qoymuş olur”
Azərbaycan Prezidenti İlham Əliyev İran İslam Respublikasının Prezidenti Məsud Pezeşkiana bu ölkənin Ali Rəhbəri Ayətullah Seyid Əli Xameneinin ölümü ilə bağlıı İrana başsağlığı verdi. Qonşuluq çərçivəsində, regional sülh baxımından, müharibənin dayandırılmasına təsir baxımından Əliyevin addımını necə dəyərləndirmək olar?
Politoloq Sahil Kərimli baki-xeber.com-a bildirdi ki, Azərbaycan dünyada və bölgəmizdə daim sülh və təhlükəsizliyin qorunub saxlanılması üçün bütün imkanlarından istifadə edib. “Azərbaycanın daimi siyasi kursu bu istiqamətdə formalaşdırılıb. Xüsusilə də Azərbaycan həm Ermənistanla sülh müqaviləsinin imzalanması, həm də qonşularla sülh və təhlükəsizlik şəraitində münasibətlərin inkişaf etdirilməsi istiqamətində son dövrlər də aktiv fəaliyyətini davam etdirir.
Son günlər ABŞ-İsrail birləşməsinin İranla qarşıdurması, İrana qarşı həyata keçirilən genişmiqyaslı hərbi müdaxilə əlbəttə ki, bölgəmiz üçün çox ciddi təhdidlər yaradır, bölgədə sülh və təhlükəsizliyə ciddi zərərlər gətirir. Azərbaycanın mövqeyi həmişə olduğu kimi bəllidir. Azərbaycan Prezidenti İlham Əliyev həm bu qarşı durmadan əvvəl, həm də son günlərdə baş verən hadisələr fonunda ölkəmizin qətiyyətli və birmənalı mövqeyini ortaya qoyub. Azərbaycan dövləti İrana qarşı həyata keçirilən müdaxilədən narahatlığını bildirib. Bu istiqamətdə dost və qardaş ölkələrlə məsləhətləşmələr və təmaslar bu gün də davam etdirilir. Təbiidir ki, Azərbaycan Prezidentinin İran Prezidentinə başsağlığı göndərməsi və bu başsağlığı məktubunun da mətni çox açıq-aydın şəkildə Azərbaycanın mövqeyini ortaya qoymuş olur”.
S.Kərimlinin sözlərinə görə, uzun müddət idi təxribat xarakterli fikirlər də söylənilirdi ki, ABŞ-ın İrana hücumu zamanı guya Azərbaycan ərazisindən istifadə ediləcək. S.Kərimli vurğuladı ki, amma Azərbaycanın həmişə olduğu kimi növbəti dəfə də milli və dövlətçilik, mehriban qonşuluq maraqlarına sadiq qalaraq bu məsələdə qətiyyətli mövqeyini ortaya qoydu. “Əlbəttə, nəinki İran digər ölkələrlə də bağlı mövqeyimizi ortaya qoymuşuq ki, Azərbaycan ərazisindən heç bir ölkəyə qarşı istifadə olunmayacaq. 2005-ci ildə Azərbaycanla İran arasında qarşılıqlı təhlükəsizliyin təmin olunması ilə bağlı memerandum imzalanmışdı. Biz bunu xüsusi xatırlatmalıyıq. Bu memeranduma sadiq qalaraq bu gün Azərbaycan yenə də İrana qarşı yönələ biləcək hər hansısa bir addımda qətiyyətli şəkildə iştirak etmir və bundan daim imtina edir. Hadisələrin faciəvi şəkildə davam etməsi, yəni İrana qarşı müdaxilənin artması, vəziyyətin gərginləşməsi fonunda əlbəttə ki, Azərbaycanın mövqeyi yenə də ortadadır. Biz bölgədə sülh və təhlükəsizlik istəyirik. Azərbaycan Prezidenti İlham Əliyev bölgədə müharibənin dayandırılması və buna təsiri baxımından həmişə müəyyən addımllar atıb, bu gün də atmaqdadır. Hesab edirəm ki, Prezident İlham Əliyevin bu məsələlərdə mövqeyi və vasitəçilik addımları da ola və bu addımlar da müsbət şəkildə nəticələnə bilər”-deyə S.Kərimli qeyd etdi.
İradə SARIYEVA
