Gürcüstan müxalifəti ABŞ və İsrailin İrana hücumunu dəstəkləyib. "Gürcü Arzusu"nun əleyhdarları ümid edirlər ki, bu, Tiflisdəki çevrilişin başlanğıcı ola bilər. Eyni zamanda, onlar Avropa Birliyini ölkələrinə qarşı sanksiyaları gücləndirməyə çağırırlar.
Lelo Partiyasının lideri Qriqol Gegeliya bildirib ki, müharibənin başlanması Gürcüstan hökumətinin xarici siyasətinin səhvini açıq şəkildə nümayiş etdirib: "Onlar Qərbi İran kimi oyunçularla əvəz etməyə çalışarkən ölümcül bir səhvə yol verdilər və düşünürəm ki, bu geosiyasi seçim üçün həm ölkə daxilində, həm də beynəlxalq səviyyədə çox yüksək qiymət ödəyəcəklər". "Gürcüstan üçün Qaxariya" parlament partiyasının üzvü Teona Akubardia İslam Respublikasının Amerika və İsrailin zərbələri nəticəsində süqut etmə ehtimalını istisna etməyib. O, həmçinin ölkəsinin ABŞ-ın hərəkətlərini pisləyən dünyada praktik olaraq tək olduğunu vurğulayıb: “Biz “Gürcü Arzusu”nun Tiflisdəki televiziya qülləsini İran bayrağının rənglərinə necə boyadığını, baş nazir İrakli Kobaxidzenin səfərlərini xatırlayırıq və təbii ki, bütün bunlar təəccüblü deyil, amma nəticələri var”. Gürcü siyasi analitiki Nino Skvortsovanın verdiyi məlumata görə, İrana hücumların ilk günündə müxalifət Vaşinqtonu dəstəkləmək üçün Tiflisin mərkəzində mitinq keçirib: "Onun iştirakçıları ABŞ-ın "avtoritar" rejimlərə qarşı güc tətbiq etmək hüququna malik supergüc anlayışından çıxış edirlər. Onların təfsirində İran sərt teokratik sistemdir və rəhbər Əli Xameneinin devrilməsi Bəşər Əsəd rejiminin süqutu ilə analoji olaraq - Vaşinqtonun gücünün nümayişi və Rusiya ilə İran arasındakı müttəfiqlik münasibətləri nəzərə alınmaqla Moskvaya dolayı zərbə kimi qəbul edilir. Bundan əlavə, bu çərçivədə seçim Gürcüstanın milli maraqlarının və ya beynəlxalq hüquq prinsiplərinin təhlilinə deyil, siyasi kimlik prizmasından - dəyərlərə əsaslanan istinad kimi ABŞ-a dəstək əsasında edilir. Müvafiq olaraq, milli maraqların anlaşılması, Gürcüstanın özü üçün potensial risklərdən asılı olmayaraq, əsasən Vaşinqtona sədaqət dərəcəsi ətrafında qurulur". Gürcüstan hökumətinə gəldikdə isə, ekspert onun mövqeyini gözləmə kimi qiymətləndirib: "Tiflis münaqişəni pisləməkdən və sülhə çağırmaqdan başqa mövqe tuta bilməz, çünki Tiflisin İsraillə və İranla gizlicə yaxşı münasibətləri var. Əgər Tiflisin mövqeyi nə döyüşlərin gedişatına, nə də onun transformasiyasına təsir göstərməyəcəksə, özünə zərər verməyin mənası yoxdur".
Qeyd edək ki, bundan bir müddət əvvəl müxalifət üzvləri Avropa Komissiyasının prezidenti Ursula fon der Leyenə Gürcüstanda demokratik dəyişikliklərin olmamasından şikayətlənən məktub yazmışdılar. Brüssel nümayəndəsi Aİ-nin Tiflisin demokratik, sabit və Avropa gələcəyini təmin etmək üçün bütün səylərini əsirgəməyəcəyinə əminlik vermişdi: “Mövcud hadisələrə cavab olaraq, Avropa Komissiyası Gürcüstan hakimiyyətinə ikitərəfli maliyyə dəstəyini dayandırmaq və siyasi əlaqələrimizi azaltmaq da daxil olmaqla müvafiq tədbirlər görüb. Bundan əlavə, Komissiyanın təklifinə əsasən, Avropa Şurası Gürcüstanla viza müqaviləsini qismən dayandırıb və bu, Gürcüstanın diplomatik və xidməti pasport sahiblərinə təsir edib. Avropa Şurası tərəfindən 2024-cü ilin iyun və oktyabr aylarında elan edildiyi kimi, Gürcüstanın üzvlük prosesi faktiki olaraq dayandırılıb”. Fon der Leyenin sözlərinə görə, əgər "Gürcü Arzusu" demokratik azadlıqları pozmağa davam edərsə, bütün Gürcüstan əhalisi üçün vizasız səyahət ləğv edilə bilər: "Üzv dövlətlər arasında sanksiyalarla bağlı hələlik konsensus əldə olunmasa da, demokratik geriləmə və insan haqlarının pozulmasında məsul olanların cəzalandırılması ilə bağlı müzakirələr davam edir". Skvortsovanın sözlərinə görə, bu yazışmalar müxalifətin aktiv iştirak görüntüsü yaratmaq və diqqəti öz səriştəsizliyindən yayındırmaq üçün daha bir cəhdidir: "Avropa Komissiyası sədrinin müxalifət siyasətçilərinin məktubuna verdiyi cavab bir daha Brüsselin Gürcüstan hakimiyyətini qorxutmaq üçün istifadə etdiyi ritorikanı əks etdirir. Keçən dəfə bu nəticə vermədi, ona görə də indi diqqətini adi vətəndaşlara yönəldir".
Tahir TAĞIYEV
