Əli Orucov: "Donald Trampın ritorikası davakar, təcavüzkar və qeyri-standartdır"
Amerikanın Nümayəndələr Palatasında demokratların azlıq lideri Həkim Ceffris CNN-ə verdiyi müsahibədə bildirib ki, ABŞ prezidenti Donald Trump İranla qarşıdurma kontekstində bu ölkəyə qarşı başladılan hərbi əməliyyatlar barədə heç bir əsaslandırma təqdim etməyib. O vurğulayıb ki, İranın ABŞ-a hücum etməyə hazırlaşdığına dair istinad edilən kəşfiyyat məlumatları ictimaiyyətə göstərilməyib və bu məlumatların verilməsi lazımdır.
Ceffris əlavə edib ki, amerikalılar öz hökumətinin diqqətini daxili problemlərə - həyat səviyyəsinin yaxşılaşdırılması və qiymət artımının qarşısının alınması üzərində cəmləşdirməsini istəyir və ABŞ-ın “sonsuz xarici müharibəyə” cəlb edilməsinin düzgün olmadığını düşünürlər.
O, həmçinin bildirib ki, Konstitusiyaya görə müharibəni elan etmək səlahiyyəti təkcə Konqresdədir və bu səlahiyyət prezidentin təkbaşına qərarverməsindən daha vacibdir.
Beləliklə, ABŞ daxilində İranla qarşıdurma barədə rəsmi arqumentlərin kifayət qədər təqdim olunmadığı, həmçinin prezidentin hərəkətlərinə dair parlament səviyyəsində tənqidlərin olduğu bildirilir.
Amerika müxalifətinin Trampa qarşı çıxması nə ilə nəticələnə bilər?
Siyasi şərhçi Əli Orucov "Bakı-Xəbər" nəşrinə açıqlamasında bildirib ki, Donald Trampın ABŞ Konqresinə məlumat vermədən və icazə almadan İsraillə birlikdə İranı təcavüzü təkcə Birləşmiş Ştatların Konstitusiyasının pozulması kimi deyil, eyni zamanda beynəlxalq hüququn heçə sayılması deməkdir: "Onsuz da son dönəmlər güc amili həlledici və əsas vasitə kimi açıq şəkildə istifadə olunmaqdadır. Güc hesabına maraqların təmin və yaxud sülh amili Tramp hakimiyyətinin xarici siyasətinin ana xəttini təşkil edir. Ağ Ev rəhbəri özü 8 müharibənin dayandırdığını mütəmadi təkrarlamağı sevsə də, onun prezidentliyi dövründə bir neçə dövlətə hərbi müdaxilə edib. Venesuelanın prezidenti qaçırılıb, İrana həm ötən ilin yayında, həm indi hava hücumları gerçəkləşdirib. Donald Trampın ritorikası davakar, təcavüzkar və qeyri-standartdır. Hətta, vəziyyət o həddə çatıb ki, Birləşmiş Ştatların ənənəvi Qərb müttəfiqləri ilə də narazılıqlar və güvənsizlik dərinləşməkdədir. Qabaqdan aralıq seçkilər gəlir. Tampın Respublikaçılar Partiyası səs itirməkdədir. Əgər İranda, Yaxın Şərqdə ilişib qalsa onun üçün ciddi itkilərlə dücar olacağı şübhə doğurmur. Amerika cəmiyyətinin də müharibəyə etirarazı genişlənəcək. Əslində İrana hücum İsrailin fitfası idi və Trampı da Netanyahu təhrik etdi. Danışıqlar prosesinin ortasında, ötən ildə olduğu kimi, hərbi müdaxilə Təl-Əvivə lazım idi".
Akif NƏSİRLİ
