Əli Orucov: “Katolikos sona qədər dirənəcək”
Karolikos II Qareginin əleyhinə çıxan arxiyepiskopların sıraları genişlənir. Belə ki, erməni kilsəsinin yenilənməsi prosesinə qoşulan arxiyepiskopların sayı 16-ya çatıb. Bundan əvvəl hazırkı katolikosa müxalif olan 10 yepiskop erməni kilsəsinin yenilənməsi üzrə koordinasiya şurasının yaradıldığını elan edib.
Şuranın qəbul etdiyi sənəddə kilsədə islahatların təşviqi, hazırkı kilsə başçısının vəzifədən uzaqlaşdırılması, katolikosun yerinə müvəqqəti rəhbərin seçilməsi, kilsənin nizamnaməsinin qəbulu və bütün ermənilərin katolikosunun müəyyən olunmuş qaydada seçilməsi nəzərdə tutulur.
Sözügedən məsələni baki-xeber.com-a şərh edən AMİP funksioneri Əli Orucovun fikrincə, bütün bunlar onu göstərir ki, Paşinyan hakimiyyəti II Qaregini Erməni Apostol Kilsəsindən uzaqlaşdırmaqda qərarlıdır: “Ancaq Ermənistanda seçkilərinin yaxınlaşdığını nəzərə alsaq II Qareginin öz xoşu ilə geri çəkiləcəyi real deyil. Ona görə ki, katolikosun arxasında dayanan Rusiya bunda maraqlı deyil. Moskvadan hansı təlimat gələcəksə, II Qaregin o addımı atacaq. Rusiyanın məqsədi odur ki, iyunda keçiriləcək parlament seçkiləri ilə bağlı Ermənistanda vəziyyət gərginləşsin. Revanşist və Rusiyaya bağlı müxalifətin mövqeləri onsuz da zəifdir. Ona görə də Rusiyanın əsas məqsədi kilsə ətrafında vəziyyəti gərginləşdirməklə erməni cəmiyyətini Paşinyana qarşı qaldırmaqdır. Bu baxımdan hesab edirəm ki, II Qaregin sona qədər dirənəcək. Bu günlərdə Paşinyan bildirib ki, bəzi qüvvələr kilsəni Ermənistan Respublikasına qarşı yönəlmiş addımlar üçün dayaq nöqtəsinə çevirməyə çalışırlar. O, buna imkan verməyəcəklərini, katolikos II Qareginin də Serj Sarkisyan kimi gedəcəyini bəyan edib. Fikrimcə, qarşıdakı aylarda II Qareginə qarşı çıxan yepiskopların sayı daha da artacaq”.
Vidadi ORDAHALLI
