Akif Nağı: “...Xərc çəkib onların meyitlərini ölkələrinə göndərməsinlər”
Erməni bloger Roman Bağdasaryan sosial şəbəkə hesabında Rusiya tərəfindən Ukraynada vuruşaraq ölən ermənilərlə bağlı ilginc məlumatlar yayıb. O, yazır ki, bu müharibədə ölənlərin sayı son iki ay ərzində 245 nəfər (3 Qarabağ sakini, 18 Ermənistan vətəndaşı, qalanları isə Rusiya vətəndaşı) artıb. İndiyə qədər Rusiya tərəfində döyüşən 7186 erməni ölüb. Onlar 60-65% müqaviləli əsgər, 15% çağırışçı, 20% isə cinayətkar və ya cəbhəyə göndərilməkdə ittiham olunanlardır. 20 mindən çox erməni yaralanıb.
“Təxminən 900 ailə şəxsən mənə yaxınlarını tapmaq üçün müraciət edib. Putin uğrunda döyüşərək itkin düşmüş ermənilərin sayı 1600-1700 nəfərdir. İtkin düşənlər 99,99% ölmüşlərdir. Ölənlərin bəziləri ailələrinə pul ödəməmək üçün cəbhə yaxınlığında kremasiya edilib”-deyə Bağdasaryan yazıb.
Qeyd edək ki, Rusiya-Ukrayna müharibəsi başlayandan indiyə qədər Rusiyanın öz əsgərlərin, onun tərəfindən ölənlərin bir hissəsinin cəsədlərini krematoriyada yandırdığı barədə məlumatlar dolaşır. Ekspertlər hesab edir ki, Rusiya müharibədə ölən insanlara görə onların ailələrinə pul ödəməmək üçün belə edir.
Sözügedən müharibədə həlak olan ermənilərə qarşı da analoji addım atılır, onların meyitləri kremasiya edilir. Ekspertlər deyir ki, həlak olan ermənilərin meyitləri kremasiya edilirsə onlardan heç bir iz-toz qalmır, nəticədə ailələri onları itkin kimi axtarır.
“Ən asan üsul kimi meyitləri yandırır və ölənləri “itkin” kimi qeydə alır”
Azad Vətən Partiyasının sədri Akif Nağı baki-xeber.com-a bildirdi ki, Rusiya-Ukrayna müharibəsində iştirak edən, döyüşən, həlak olan, itkin düşən ermənlərin sayı ilə bağlı erməni mənbələrinin yaydığı rəqəmlər o qədər də etibarlı deyil. “Rusların itkiləri çoxdur. Orada ermənilərin döyüşüb döyüşmədiyini demək çətindir. Yəni erməni mənbələrinə istinadən bu barədə hansısa bir söyləmək çətin məsələdir. Onların mənbələri inandırıcı deyil. Otada olan rəqəmlərə görə bu qədər erməni ölübsə, onda görün rusların özündən nə qədər ölən olub. Mən də mətbuat səhifələrindən oxumuşam ki, bu müharibədə ölənlərin meyitləri qaytarılmır, onlar itkin sayılır. Rusiyada onu etmək bir qədər asandır. Çünki orada orduya gedənləri o qədər də axtaran yoxdur. Amma müəyyən qisim var ki, onları axtarırlar. Hətta Putinin yaratdığı rejim də imkan vermir ki, insanlar səslərini çıxarsınlar. Ona görə də o meyitlərin yandırılması mümkündür. Çünki o meyitləri ailələrinə çatdırmaq həm əlavə xərc tələb edir, həm də ölkə daxilində kütləvi etirazlar doğura bilər.
Hesab edirəm ki, bu fakt diqqətə alınmalıdır. Beynəlxalq qurumlar tərəfindən ayrıca komissiya yaradılıb bunlar yoxlanıla da bilər. Çünki müharibədə ölənlərin yaxınlarının icazəsi olmadan onların meyitlərinin kremasiya edilməsi beynəlxalq normalara ziddir. Bunun üçün yalnız o insanların yaxınlarının icazəsi olmalıdır”.
A.Nağı qeyd etdi ki, ermənilərin meyitlərinin kremasiya edilməsi haqda məlumat olsa da, amma azərbaycanlılar haqda belə bir məlumat yoxdur. “Orada ölən ermənilərin nəşləri ona görə kremasiya edilir ki, xərc çəkib onların meyitlərini ölkələrinə göndərməsinlər. Burada artıq xərcdən yayınma var, həm meyitləri aparmağa pul verməlidirlər, həm ailələrinə ödəniş etməlidirlər. Görünür, Rusiya bunu etmək istəmir. Ən asan üsul kimi meyitləri yandırır və ölənləri “itkin” kimi qeydə alır.
O müharibədə azərbaycanlılar da iştirak edir. Amma azərbaycanlılara qarşı belə bir addımın atıldığı haqda məlumat yoxdur. Olsaydı üzə çıxardı. Çünki Azərbaycanda öz övladlarının, yaxınlarının taleyi ilə bağlı hər kəs düşünür. Ona görə də azərbaycanlılara qarşı bunu edə bilməzlər. Amma başqa öz xalqlarına, ermənilərə və xalqlara qarşı bunu böyük ehtimalla edə bilərlər. Bu cinayəti törətdiyinə görə Putin başqa ağır maddə ilə zamanında cavab verməli olacaq”-deyə A.Nağı qeyd etdi.
İradə SARIYEVA
