Faiq Ələkbərli: “...Pezeşkian istefa verməməlidir, çünki onun istefası müəyyən qüvvələrin əlinə fürsət verə bilər”
Hazırda İranda çox dəhşətli proseslər gedir. Bu ölkənin müxtəlif şəhələrində ardıcıl aksiyalar keçirilir, molla rejiminin varlığına son qoyulmasının vaxtı çatdığına dair çağrışlar eşidilir.
Xalqla SEPAH arasında baş verən qarşıdurmalarda onlarla insan həlak olub, yüzlərlə insan yaralanıb. Xeyli sayda insan isə həbs edilib. İranda baş verən proseslər fonunda prezident Məsud Pezeşkianı istefaya çağırırlar. Bu barədə sosial mediada çağırışlar səslənməkdədir. Bu gün İranın daxilində prezident Pezeşkianla bağlı iki xətt mövcuddur.
Qeyd ediliyi kimi İranın daxilindən Pezeşkianı istefaya çağıranlar var. Bu qəbildən olanlar deyirlər ki, doktor, istefa ver keç xalqın tərəfinə, tarixdə adın yaxsi qalsın. Bəziləri də deyir ki, Pezeşkian İrandakı bütün xalqların seçdiyi legitim prezidentdir və o, istefaya getməməlidir. Bu da aydındır ki, İran hökumətindən ancaq Pezeşkian camaatın səsinə səs verir, xalqın haqlı iradını cavalandırmağa çalışır.
“İranın daxilindəki şahçılar və…”
AMEA-nın Fəlsəfə və Sosiologiya İnstitutunun şöbə müdiri, fəlsəfə doktoru, siyasi ekspert Faiq Ələkbərli baki-xeber.com-a bildirdi ki, indiki halda İran adlanan ölkədə icra hakimiyyətinin başında dayanan prezident Məsud Pezeşkianın istefa verməsini düzgün hesab etmir: “Pezeşkianı istefaya çağırmağın özü kökündən yanlışdır. İranda istefaya verməli olan bir nəfər varsa o da şübhəsiz ki, ali dini rəhbər Seyid Əli Xameneidir. Çünki İran daxilindəki etirazlar Pezeşkiana qarşı yönəlməyib, dini ali rəhbərliyin 47 ildir həyata keçirdiyi yarıtmaz siyasətə qarşı yönəlib. Burada hədəf Pezeşkian deyil.
Pezeşkianın hakimiyyətdə qalması xalq üçün daha çox əlverişlidir. Ali dini rəhbərlik onsuz da gedəcək. Ancaq Pezeşkianın hakimiyyətdə qalması İran adlanan ölkənin bütün vətəndaşları, xüsusən də Azərbaycan türkləri üçün çox önəmlidir”.
F.Ələkbərli qeyd etdi ki, istər rejim dəyişimi, istər İranın parçalanması, istər federallaşması baş versin, fərqi yoxdur, amma orada öz milli və sosial kimliyini türk kimi tamamlayan bir prezidentə Güney Azərbaycan türklərinin, bütövlükdə türklərin ehtiyacı var. “Proseslərin bu həddə gəlib çatmasının əsas səbəbkarları əlbəttə, məhz dini ali rəhbərlik, islam adı altına sığınanlardır. Şübhəsiz ki, burada İsrail və ABŞ tərəfindən şahçıların gündəmə gətirilməsi təsadüfi deyil. İranın daxilindəki şahçılar və digəriləri, eləcə də onları idarə edən xarici qüvvələr türklərin yenidən hakimiyyətə gəlməsini istəmirlər. Ola bilsin, Pezeşkilanı istefaya səsləyənlər arasında bunlar da olsun. Çağrışlara baxmayaraq Pezeşkian istefa verməməlidir, çünki onun istefası müəyyən qüvvələrin əlinə fürsət verə bilər. İran adlanan ölkədə xalq Pezeşkianın timsalında əsl prezident görürlər. 50 il Pəhləvilər, şah rejimi, 50 ilə yaxın bir dövr ərzində din pərdəsinə bürünən molla rejimi hakimiyyətdə olub. 100 illik bir dövr ərzində əhali zülm çəkib. Bu gün türkün varlığını dansalar İran adlı ölkənin sabahı olmaz. İndi şahçılar, mücahidçilər və digəriləri ortaya çıxıb. Amma orada türkün varlığı həmişə önəmli olub. Biz orada X əsr hakim millət olmuşuq, dövlətlər yaratmışıq. İranda hansısa yeni bir quruluşun yaradılması türklərin iştirakı olmadan mümkün deyil. Məsələləri düzgün qiymətləndirmək lazımdır. Məhz Pezeşkianın prezident seçilməsi təsadüfi olmadı. Rejim öz varlığını Pezeşkianın üzərindən davam etdirmək istəyir. Pezeşkian da ağıllı adamdır və iç siyasətdə nəyin baş verdiyini bilir. Türkün varlığının orada dirçəldilməsi üçün o, bizim üçün önəmlidir”-deyə F.Ələkbərli qetd etdi.
İradə SARIYEVA
