Atası ilə İrandan qaçanda 19 yaşı var idi. Bircə gün də hakimiyyətdə olmamışdı. Başqa ölkələrin çörəyi ilə mədəsini, yad ideyalarla başını dolduraraq bu gün 66 yaşına gəlib çatıb.
Atası qaçana kimi ölkəni ailəlikcə elə hala gətirmişdilər ki, mollalar gələndə bir adam onu müdafiə etmədi. Atası, anası, bacısı və qardaşı faciəli şəkildə mühacirətdə öldülər. Ölkədə yaslarını belə tutan olmadı. İsrail İranı bombalayanda İsrailə səfər etdi, bu gün İran Amerikanın hücum təhlükəsində olarkən Misirə gəlib, 46 ildir din diktaturasında yaşayan və çətin mübarizə aparan iranlılara ağıl öyrətmək istəyir - "elə edin, belə edin!
Vaxtilə atasının qovulduğu hakimiyyətə can atır.
Hansı təcrübə ilə? İrandan qaçanda təcrübəsiz, qayğısız və harın həyat yaşamış bir gənc idi. 46 illik mühacirət dövründə isə İranla bağlı bir siyasi partiya, siyasi dərnək belə yaratmadı.
Hansı haqla? Atasının İranı "ailə kefxanasına" çevirdiyi bəs deyilmiş, üstəlik başqa ölkələr İranı bombalayanda qeyrətə gəlib bir kəlmə demədi ki, "bu mənim ata-ana vətənimdir, bunu etməyin!"...
Hansı təcrübə, hansı haqla İran hakimiyyətinə can atırsan, Rza Pəhləvi?!
İran xalqı hansı hakimiyyətdə yaşamaq istədiyini özü həll edəcək və etməlidir...
Pəhləvilərsiz...
Aydın QULİYEV
