“Terrorsuz Türkiyə” planında fasilə və Suriyada PKK- ya bağlı olduğu deyilən qrupların fəallaşması təsadüfə oxşamır. Bunlar Öcalanın və PKK- nın arxasında duranların yeni planları xatirinə Türkiyəyə təzyiq xarakterli gedişlərə çox bənzəyir. Ölkənin daxilində də buna meylli və ya bunun içində öz qrup maraqlarını görənlərin olduğu istisna deyil. PKK layihəsində güdülən "qədim" strategiyanın dəyişməsi artıq real görünür.
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
"Öcalan və onun himayədarları ilk başdan Türkiyədən ayrı bir Kürdüstan dövləti yaratmaq məqsədi güdürdülərsə, bu gün böyük ehtimalla, ABŞ və İsraildən alınmış təlimata uyğun olaraq Türkiyənin daxilində özünün parlamenti və müstəqil siyasəti olan bir muxtar Kürdüstanın yaradılmasını hədəfləyiblər. PKK və onun uzantısı olduğu deyilən Suriya Demokratik qüvvələrinin ( SDQ) Hələbdə silahlı müqavimətə başlamalarının kökündə duran hədəf, məncə, Türkiyəni "muxtar Kürdüstan" planına uyuşdurmaq məqsədi güdür...
Bu nöqteyi-nəzərdən, "terrorsuz Türkiyə" nin ideya müəllifi Baxçəlinin partiya müavini Fəti Yıldızın dünənki bəyanatı çox ilginc görünür: "Terrorsuz Türkiyə bu günlərdə 3-cü dəfə parlamentin komissiyasında müzakirə olunacaq, Türkiyənin unitarlıq kimi fundamental prinsipinin dəyişməsindən söhbət gedə bilməz"...Bu son fikir niyə dilə gətirilib?...
Demək, hələlik açıq deyiıməsə də , Türkiyənin qarşısında " muxtar Kürdüstan"ın naminə unitarlıq prinsipinin federativliklə əvəzlənməsi kimi dəyişiklik şərtinin, ya tələbinin qoyulduğu barədə şübhələr böyükdür...
Yoxsa, niyə xeyli vaxtdır İmralıda Öcalanla danışıqlara fasilə verilib? Niyə Öcalandan yeni xəbərlər gəlmir? Niyə PKK Öcalanın çağırışına tam uyğunlaşaraq Suriyada da silahı tam yerə qoymur? Niyə Tramp çox təhlükəli niyyətlə bəyanat verir ki, biz Suriya hökuməti ilə də, Suriya Demokratik Qüvvələri ilə ( PKK- nın Suriya qolu ) də yaxşı davranırıq?!"...
Hansısa siyasi məqsəd naminə Türkiyənin "unitar dövlət" prinsipinin güzəşt edilməsi bütün Türk dünyasına BÖYÜK ZƏRBƏ ola bilər... Allah qıymasın"...
Tahir TAĞIYEV
