Əli Mustafa: “Hər hansı sülhməramlı qüvvələrin orada yerləşdirilməsi onların planlarına maneə deməkdir”
Rusiya Ukraynada Qərb ölkələrindən qüvvələrin yerləşdirilməsini qeyri-mümkün sayaraq qətiyyətlə rədd edib. Rusiya Xarici İşlər Nazirliyinin bununla bağlı şərhində qeyd edilib:
“Sənəd sülh yolu ilə tənzimləmədən çox uzaq alınıb. O, davamlı sülh və təhlükəsizliyə deyil, militarizasiyanın, eskalasiyanın davam etməsinə hədəflənib”. O da qeyd edilib ki, Ukrayna ərazisində Qərb ölkələrinin hərbi bölmələrinin, digər infrastrukturun yerləşdirilməsi xarici müdaxilə sayılacaq, "onlara Rusiya Silahlı Qüvvələrinin qanuni hədəfi kimi baxılacaq”.
O da məlumdur ki, Parisdə keçirilən “İstəyənlər koalisiyası”nın əldə etdiyi razılaşma müharibədən sonrakı dövrə aiddir. Yəni sülh razılaşması əldə edildikdən sonra Ukraynaya necə təhlükəsizlik zəmanətləri veriləcək. Ukraynaya veriləcək təhlükəsizlik zəmanətləri isə orada sülhməramlı qüvvələrin yerləşdirilməsini də nəzərdə tutub. Rusiya isə o sülhməramlı qüvvələrin yerləşdirilməsinin əleyhinə çıxış edir. Halbuki, sülhməramlı qüvvələr hərbi baza, hücum xarakterli qoşunlar demək deyil. Məgər sülhməramlı qüvvə hansısa ölkənin hərbi bazasıdır ki, onu hədəf alasan? Sülhməramlı qüvvələr məsələsinə Rusiyanın indidən belə aqressiv və inkarçı yanaşması, Rusiyanın Ukraynada sülh müqaviləsi imzalanmasında həqiqətən maraqlı olmadığını göstərən fakt sayıla bilərmi?
Sözügedən məsələni baki-xeber.com-a şərh edən siyasi ekspert Əli Mustafanın fikrincə, Rusiyanın Ukraynaya qarşı qoyduğu şərtlər suveren bir dövlətə yönələn tələblər deyil: “Bu, onu deməyə əsas verir ki, Rusiya Ukraynanı bütünlüklə işğal etmək planından imtina etməyib. Hər hansı sülhməramlı qüvvələrin orada yerləşdirilməsi onların bu planlarına maneə deməkdir. Bax buna görə Moskva istənilən sülhməramlıların yerləşdirilməsinə qarşı qətiyyətlə qarşı çıxır. Budur məsələnin kökündə dayanan əsas faktor. Çünki sülhməramlıların mövcudluğu təhlükəsizlik zəmanətinin hardasa bir elementidir. Rusiya üçün beynəlxalq hüquq yalnız kağız parçasıdır. Bu dövlət yalnız gücün qarşısında geri çəkilir. Avropa bu təşəbbüslə özünü qorumaq istəyir. Çünki Ukrayna Rusiyanın nəzarətinə keçsə, Avropanın təhlükəsizliyi ciddi təhdid altına düşəcək. Avropa İttifaqı həm də buna görə çox narahatdır”.
Vidadi ORDAHALLI
