Sahil Kərimli: “Azərbaycanın regionlar arası “canlı körpü və etibarlı tərəfdaş” rolunu gücləndirməsi...”
Azərbaycan 2025-ci ildə xarici siyasətdə mühüm uğurlar əldə edib. Bura Çinlə hərtərəfli strateji tərəfdaşlığın rəsmiləşdirilməsi, D-8 təşkilatına yeganə yeni üzv kimi qəbul olunması və Mərkəzi Asiya Məşvərət Şurasına tamhüquqlu üzv seçilməsi və digər məsələlər daxildir. Azərbaycanın regionlararası “canlı körpü və etibarlı tərəfdaş” rolunu gücləndirməsi, tranzit həcmlərinin artması və yeni enerji-rəqəmsal layihələrə start verilməsi, il ərzində çoxsaylı beynəlxalq zirvələr və forumların, o cümlədən Xankəndi, Şuşa və Qəbələdə keçirilən tədbirlərin Azərbaycanın artan siyasi nüfuzunu nümayiş etdirməsi deməkdir.
2025-ci ildə Azərbaycan fəal, təşəbbüskar və çoxistiqamətli xarici siyasətini davam etdirərək ABŞ, Çin, Türkiyə və Avrasiya məkanında mövqelərini gücləndirib; Vaşinqtonda imzalanan Azərbaycan–Ermənistan Birgə Bəyannaməsi regional sülhün əsasını qoyub. Azərbaycan artıq “orta güc” kimi qəbul olunur, 27 ölkə ilə strateji tərəfdaşlıq və müttəfiqlik münasibətlərinə malikdir. Azərbaycan Türk Dövlətləri Təşkilatında aparıcı rol, D-8-ə yeni üzvlük, İƏT-in Xankəndi Zirvə görüşü və Mərkəzi Asiya platformasında tamhüquqlu üzvlük vasitəsilə beynəlxalq nüfuzunu əhəmiyyətli dərəcədə artırıb və əsas regional–qlobal əməkdaşlıq mərkəzlərindən birinə çevrilib. 2025-ci ildə Azərbaycan Prezidenti 20 dəfə xarici ölkələrə işgüzar və dövlət səfərləri edib.
Prezident İlham Əliyev yanvarın 5-də yerli televiziya kanallarına müsahibəsində 2025-ci ildə Azərbaycanın xarici siyasət sahəsində əldə etdiyi uğurlardan da danışıb.
Prezident Əliyev bildirib: “Mən hesab edirdim ki, böyük əhəmiyyət daşıyan hadisələrdən biri də bizim Çinlə olan strateji tərəfdaşlığımızdır. Keçən il mənim Çinə dövlət səfərim zamanı Hərtərəfli strateji tərəfdaşlıq haqqında Birgə Bəyannamə imzalanmışdır və bu da çox böyük uğur sayıla bilər. Çünki Çin də dünyada aparıcı ölkələrdən biridir və bu siyasi çərçivə, siyasi platforma, əlbəttə ki, bizim uğurlu diplomatiyamızın təzahürü sayıla bilər.
Digər tərəfdən, biz D-8 təşkilatına üzv olduq. Mən bunu da çox böyük nailiyyət kimi qiymətləndirirəm. Çünki bu təşkilat 30 ilə yaxındır ki, yaradılmışdır və yarandığı gündən yeni üzv qəbul etməmişdir. Ona görə bu günə qədər adı da D-8-dir. Yeganə yeni üzv Azərbaycan olmuşdur. Nəzərə alsaq ki, bu təşkilatda müsəlman dünyasının ən böyük ölkələri birləşir, Azərbaycanı dəvət etmək və bizi seçmək, əgər belə demək mümkündürsə, əlbəttə ki, böyük uğur sayıla bilər. Təkcə onu demək kifayətdir ki, bu təşkilatda birləşən ölkələrin ümumi əhalisi bir milyarddan, ümumi iqtisadiyyatı dörd trilyondan çoxdur. Azərbaycan nə əhali, nə iqtisadiyyat baxımından böyük ölkə sayıla bilməz. Bizim orada artıq rəsmən iştirakımız, əlbəttə ki, bizə olan hörmətin əlamətidir və bizim apardığımız müstəqil siyasətin nəticəsidir və dərhal biz fəal işlərə başladıq. Bizim təşəbbüsümüzlə Azərbaycanda təşkilatın bir neçə mərkəzi yaradılmışdır - media, iqlim, ekologiya, energetika, nəqliyyat və biz də təbii ki, bu təşkilatda fəal üzv kimi iştirak edəcəyik.
Xarici siyasətlə bağlı digər önəmli nailiyyət Mərkəzi Asiya Məşvərət Şurasına tamhüquqlu üzv seçilməyimizdir. Hesab edirəm ki, bu da nadir hadisə sayıla bilər. Çünki təbii ki, coğrafi nöqteyi-nəzərdən biz Mərkəzi Asiyada yox, Cənubi Qafqazda yerləşirik. Ancaq Mərkəzi Asiya ölkələri ilə həm ikitərəfli, həm də çoxtərəfli formatlarda o qədər sıx əlaqələrimiz var və son illər o qədər çox layihələr icra edilir ki, artıq bu ölkələr yekdilliklə bizi tamhüquqlu üzv seçdilər. Biz bunu da böyük bir siyasi və diplomatik uğur hesab edə bilərik. Mən Prezident kimi artıq iki il ardıcıllıqla fəxri qonaq kimi Zirvə görüşlərinə dəvət olunurdum. Amma iştirakımla keçirilən üçüncü Zirvə Görüşündə artıq tamhüquqlu üzv seçildik. Əlbəttə ki, bu gün təkcə bizim bölgəmiz üçün yox, dünya üçün Mərkəzi Asiya-Azərbaycan birliyi və C5-in C6-ya çevrilməsi böyük əhəmiyyət daşıyır. Çünki bağlantılar, nəqliyyat, logistika bu gün bir çox aparıcı beynəlxalq aktor üçün böyük önəm daşıyır və burada Mərkəzi Asiyanı Qərblə coğrafi nöqteyi-nəzərdən birləşdirə biləcək yeganə etibarlı ölkə Azərbaycandır. Təbii ki, coğrafi nöqteyi-nəzərdən digər marşrutlardan da istifadə oluna bilər...”
“Bunlar ölkəmizin 2025-ci ildə əldə etdiyi çox ciddi uğurlardır”
Politoloq Sahil Kərimli Azərbaycanın 2025-ci ildə xarici siyasətdə qazandığı uğurlar haqda baki-xeber.com-a bildirdi ki, Prezident İlham Əliyevin yerli televiziya kanallarına müsahibəsi həm daxildə, həm də xaricdə böyük rezonans doğurub. Prezidentin bu müsahibəsinin, verdiyi mesajların beynəlxalq medianın gündəmində də özünə böyük yer tutduğunu deyən S.Kərimli qeyd etdi ki, bu müsbət əks-səda yaradıb. “Xüsusilə də Azərbaycan Prezidentinin ölkəmizin 2025-ci ildəki xarici siyasəti, ümumiyyətlə son illər həyata keçirilən xarici siyasət strategiyası ilə bağlı verdiyi mühüm mesajlar vurğulanmalıdır. Azərbaycanın dünyanın əsas güclərindən olan Çinlə hərtərəfli strateji əməkdaşlığın rəsmiləşdirilməsi ilə bağlı əldə etdiyi uğur, eyni zamanda D-8 təşkilatına yeganə yeni üzv kimi qəbul olunması, Mərkəzi Asiya Məşvərət Şurasına tam hüquqlu üzv seçilməsi Azərbaycanın regionlar arası “canlı körpü və etibarlı tərəfdaş” rolunu gücləndirməsi, tranzit imkanlarının artırılması, yeni enerji layihələrinin həyata keçirilməsi, alternativ enerji resurslarının gücləndirilməsi ilə bağlı Prezidentin verdiyi bəyanatlar, səsləndirdiyi fikirlər çox ciddi məqamları özündə əks etdirir. Bütün bunlar ölkəmizin 2025-ci ildə əldə etdiyi çox ciddi uğurlardır”.
S.Kərimli vurğuladı ki, dünyada çox ciddi proseslər baş verir, gərginliklər var, yeni dünya nizamı formalaşır, yeni reallıqlar cərəyan edir, qanlı toqquşmalar, müharibələr, dövlətlərin milli təhlükəsizliklərinə, suverenliklərinə qarşı həyata keçirilən təhdidlər fonunda bu gün Azərbaycan tam siyasi və iqtisadi qüdrətini nümayiş etdirir. “Azərbaycan ilk növbədə təhlükəsizliyini təmin edir və bununla paralel olaraq da iqtisadi əməkdaşlığı, iqtisadi şaxələndirməni həyata keçirir. Ölkəmiz regionda, Cənubi Qafqazda bütün dünya üçün çox ciddi, inamlı və etibarlı tərəfdaşlardan biridir, bölgəmizin yeganə iqtisadi və siyasi güc sahibi kimi daim dünyanın diqqət mərkəzində dayanır. Bu baxımdan bir çox dünya ölkələri, bir qədər əvvəl sadaladığım təşkilatlar Azərbaycana böyük maraq göstərir və bizimlə əməkdaşlığa can atır. Azərbaycanın həyata keçirdiyi hər bir nəhəng enerji, nəqliyyat-kommunikasiya layihələr dünya üçün böyük iqtisadi və eyni zamanda siyasi töhfədir. Bu isə Azərbaycanın gələcəkdə daha da güclənməsinə və möhkəmlənməsinə gətirib çıxaran amillərdən biridir”-deyə S.Kərimli qeyd etdi.
İradə SARIYEVA
